اتالعان جوبانىڭ ەلىمىزدە ازىرشە بالاماسى جوق. بۇل EN 206-2017 ەۋروپالىق ستاندارتتارىنا سايكەسەتىن وزىق قۇرىلىس ماتەريالدارىن ەنگىزۋ ءۇشىن قۇرىلعان. كاسىپورىن يننوۆاتسيالىق قۇرىلىس ماتەريالدارى سەگمەنتىندە جول, ونەركاسىپتىك جانە ازاماتتىق قۇرىلىس نارىعىندا جۇمىس ىستەۋگە باعىتتالعان كەلەشەگى مول جوبا.
زاۋىت ءونىمىنىڭ نەگىزىندە وتاندىق عالىمداردىڭ عىلىمي-تەحنيكالىق زەرتتەۋلەرى مەن ازىرلەمەلەرى, اتاپ ايتقاندا, كۇردەلىلىگى جوعارى عيماراتتاردى تۇرعىزاتىن تاۋارلىق قۇيىلعان موديفيكاتسيالانعان بەتون بار. جوبا جەتەكشىسى – ت. باسەنوۆ اتىنداعى ساۋلەت جانە قۇرىلىس ينستيتۋتىنداعى «قۇرىلىس جانە قۇرىلىس ماتەريالدارى» كافەدراسىنىڭ مەڭگەرۋشىسى دانيار احمەتوۆ.
جاڭا زاۋىت باسشىسىنىڭ ايتۋىنشا, كاسىپورىن وزىق تەحنولوگيامەن جانە جوعارى ساپالى قۇيىلعان موديفيكاتسيالانعان بەتوندى وندىرۋگە ءتوزىمدى بىرەگەي قۇرال-جابدىقپەن قامتىلعان. ءبىر جاعىنان, ەلىمىزدە العاش اشىلىپ وتىرعان بۇل زاۋىت ەN 206 جانە گوست 7473 ەۋرو ستاندارتى بويىنشا كەز كەلگەن ماركالى وزدىگىنەن تىعىزدالاتىن جانە قۇيىلاتىن بەتونداردى شىعارۋعا ارنايى جوبالانىپ, تەحنولوگيالىق باعدارلانعان. وزدىگىنەن تىعىزدالعان بەتون العاش رەت 1988 جىلى كۇردەلى گەومەتريالىق پىشىندەگى بەرىك بەتون كونسترۋكتسيالارىن جاساۋ ءۇشىن جاسالعان. سودان بەرى ونى ارنايى بەتوننان ستاندارتتى بەتونعا اينالدىرۋ ماقساتىندا عالىمدار كوپتەگەن زەرتتەۋ جۇرگىزدى. ماماندار جەرگىلىكتى شيكىزات كومپونەنتتەرى مەن تەحنوگەندىك ءوندىرىس قالدىقتارىنداعى بەتون قوسپاسىنىڭ قۇرامىن جوبالادى.
مۇنداي جوعارى تەحنولوگيالىق ماتەريالداردى پايدالانۋ قىسقا مەرزىمدە ماڭىزدى ينفراقۇرىلىمدىق عيماراتتار سالۋعا مۇمكىندىك بەرەدى. بۇل قورشاعان ورتاعا جۇكتەمەنى دە ازايتادى.
ايتا كەتەيىك, جوبانى زاۋىت قۇرىلىسىنا گرانت بولگەن «عىلىم قورى» قولداعان.
