تىڭنان تۇرەن سالعان شاحماتشى وسى جەتىستىگىنىڭ ەسەسىنە الەم كۋبوگىنە جولداما الدى. 20 جاسقا دەيىنگى شاحماتشىلار سىنعا تۇسكەن الامانعا الەمنىڭ تۇكپىر-تۇكپىرىنەن 123 قاتىسۋشى جينالدى. ونىڭ ىشىندە تالاي جارىستا جۇلدەلى بولعان 13 گروسسمەيستەر, 27 حالىقارالىق شەبەر توبە كورسەتتى. قازىبەك جارىستىڭ شەشۋشى كەزەڭىندە وسىعان دەيىن جولدارى تۇيىسكەن باستى قارسىلاسى – ارمەنيالىق گروسسمەيستەر ماميكون گاريبياندى جەڭدى. وسىلايشا, وتانداسىمىز كلاسسيكالىق شاحماتتان 11 تۋردا 8,5 ۇپاي جيعان. سونىمەن, حالىقارالىق جارىستا كۇمىس جۇلدەنى ارمەنيالىق ەمين وگانيان ەنشىلەسە, سەرب گروسسمەيستەرى لۋكا بۋديساۆلەۆيچ ءۇشىنشى ورىندى جەڭىپ الدى.
ەل تاريحىندا مۇنداي ايتۋلى جەڭىسكە 3 شاحماتشىمىز جەتكەن ەدى. وسىعان دەيىن 20 جاسقا دەيىنگى شاحماتشىلار اراسىندا دارمەن سادۋاقاسوۆ (1998 جىلى), دينارا سادۋاقاسوۆا (2016) مەن جانسايا ابدىمالىك (2017) الەم چەمپيونى اتانعان. ەندى وسى قاتارعا قازىبەك نوگەربەك قوسىلىپ وتىر. ەسكە سالار بولساق, قازىبەك وسىدان 2 جىل بۇرىن گرەكيادا وتكەن 18 جاسقا دەيىنگى شاحماتشىلار اراسىندا وتكەن الەم چەمپيوناتىندا دا راپيد پەن بليتس باعىتتارى بويىنشا جەڭىمپاز اتانعان ەدى. سپورتشىمىز وسى جولى دا مىقتىلىعىن دالەلدەپ, جەڭىس تۇعىرىنا كوتەرىلدى. قازىبەك نوگەربەكتىڭ كەزەكتى جەڭىسى قۇتتى بولسىن دەپ, الەم كۋبوگىندە تابىس تىلەيمىز!
