ەندى مۇمكىندىگى شەكتەۋلى جەرلەستەرىمىز سىرتتان مامان ىزدەمەيدى, ارباسىنىڭ اقاۋى بار بولشەكتەرىن باسقا جاققا جوندەتىپ, ۋاقىتىن جوعالتپايدى. جاڭادان اشىلعان قىزمەت كورسەتۋ ورتالىعى قاجەت نارسەنىڭ ءبارىن تەگىن جاسايدى. ەگەر جوندەۋ ۋاقىتى سوزىلاتىن بولسا, ورنىنا ۋاقىتشا باسقا اربا بەرەدى.
سەرۆيستىك ورتالىقتىڭ جىل سايىن 300-گە دەيىن مۇگەدەكتەر ارباسىن جوندەي الاتىن مۇمكىندىگى بار. ورتالىققا جۇگىنگەن جانداردىڭ ارباسىنىڭ كىناراتىن نە سەبەپتەن ەكەنىن انىقتاپ, بىردەن جوندەۋمەن اينالىسادى. شەبەرحانادا اربانىڭ ورىندىعىن جاڭالاۋ, دوڭگەلەگىن اۋىستىرۋ سەكىلدى قوسىمشا قىزمەتتەرىن پايدالانۋعا بولادى. ونىمەن قوسا, وسىنداعى ماماندار اربانى قالاي دۇرىس پايدالانۋ كەرەكتىگىن, ونىڭ كۇتىمىن ۇيرەتەدى.
– مۇمكىندىگى شەكتەۋلى جاندارعا ارنالعان اربالار – ءموبيلدى بولۋعا مۇمكىندىك بەرەتىن جالعىز كولىك قۇرالى. ەگەر ول بۇزىلسا, ايتارلىقتاي قيىندىققا تاپ بولامىز. بۇرىن اربامنىڭ بۇزىلعان بولشەكتەرىن جوندەتۋ ءۇشىن رەسەيگە جىبەرەتىنمىن. ونىڭ جوندەۋى بار, بارىپ كەلۋى بار, ءبىراز ۋاقىت الاتىن. كادىمگىدەي قينالىپ قالاتىن ەدىم. ال ۇساق-تۇيەك جوندەيتىن شارۋالارى بولسا, دانەكەرلەۋشىلەرگە, شينومونتاجداعى قىزمەتكەرلەرگە جۇگىنەتىن ەدىك. كوبىسى جوندەۋگە كەلىسپەيتىن. ويتكەنى ءبۇلدىرىپ الامىز دەپ الاڭدايتىن. وتكەن جىلى مۇگەدەكتىگى بار ادامداردىڭ اتىنان ايماق باسشىسى ەرماعانبەت بولەكپاەۆقا قالادا سەرۆيستىك ورتالىق اشۋدى وتىنگەن بولاتىنمىن. مىنە, ءبىزدىڭ وتىنىشىمىزگە قۇلاق ءتۇردى. ەندى ءبىز مۇندا اربامىزدى جوندەتۋگە كەلەمىز, يا بولماسا شەبەردى ۇيگە شاقىرا الامىز, – دەيدى وبلىس اكىمىنىڭ مۇگەدەكتىگى بار ادامدار ماسەلەلەرى جونىندەگى كەڭەسشىسى نياز سۇندەتاليەۆ.
جاڭا ورتالىقتا 12 ادام قىزمەت كورسەتەدى. ونىڭ سەگىزى – مۇمكىندىگى شەكتەۋلى جاندار.
– قىزمەت كورسەتۋ ورتالىعىندا مۇگەدەكتىگى بار ادامدار ارباسىز قالۋدىڭ قانداي بولاتىنىن ءوز باسىنان وتكەرگەن, مۇمكىندىگى شەكتەۋلى شەبەرلەر جۇمىس ىستەيتىن بولادى. ءبىز بارلىعى 12 ادامدى جينادىق, ونىڭ سەگىزى – مۇمكىندىگى شەكتەۋلى جاندار. جوندەۋ مەن تەحنيكالىق قىزمەت كورسەتۋدەن بولەك, بىزدە اربانى دۇرىس تاڭداۋ قىزمەتى دە بار. سونىمەن قوسا ماماندارىمىز قاجەت بولعان جاعدايدا كەلۋشىلەرگە تسيفرلىق قىزمەتتەردى الۋعا كومەكتەسەدى. بۇل – ءبىزدىڭ ەكىنشى فيليالىمىز. العاشقىسىن سەگىز جىل بۇرىن استانادا اشقانبىز. ونداعى جۇمىس وتە جاقسى ءجۇرىپ جاتىر, – دەيدى «دوس» تاۋەلسىز ءومىر» قوعامدىق بىرلەستىگىنىڭ توراعاسى دينا ەسىلدينوۆا.
ورتالىقتىڭ اشىلۋ سالتاناتىندا بىرلەستىكتىڭ قۇرىلتايشىلارى پاراارمرەستلينگتەن الەم چەمپيونى نيكيتا ەرماكوۆقا جانە ەرەكشە بالانىڭ اناسى گۇليزار احمەتوۆاعا زاماناۋي مۇگەدەكتەر ارباسىن تارتۋ ەتتى.
– مەن جالعىزباستى انامىن. باتىر ەسىمدى 12 جاستاعى ۇلىمدى تاربيەلەپ وتىرمىن. بالا كەزىنەن سال اۋرۋىمەن اۋىرادى. جاقىندا ءبىزدىڭ كىرەبەرىستە تۇرعان قىمبات اربامىزدى قيراتىپ كەتتى. مەن بۇل جونىندە الەۋمەتتىك جەلىگە جازعان ەدىم. سوندا كوپتەگەن جاقسى ادام قولۇشىن سوزۋعا دايىن ەكەنىن ءبىلدىردى. جاقسىلىعىن جاريا ەتكىسى كەلمەگەن ءبىر جومارت جۇرەك اعامىز سەرۋەندەۋگە ارنالعان جاڭا اربا سىيلاعان. مىنە, ەندى قوعامدىق بىرلەستىك بىزگە ءۇي ىشىندە جۇرەتىن ءبىر اربا سىيلاپ, قۋانتىپ جاتىر, – دەيدى گۇليزار احمەتوۆا.
ءيا, مۇمكىندىگى شەكتەۋلى جاندار ەندى استىنداعى اربالارىن الىستان جوندەتپەيتىن بولدى. ءارى كەرەك-جاراعىنا وسى ءبىر ورتالىقتىڭ كومەگىمەن قول جەتكىزە الادى. بۇل دا بولسا ينۆاورتالىقتىڭ وراسان يگىلىگى دەر ەدىك.
قاراعاندى وبلىسى
