پاۆلودار وبلىسىنىڭ جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسىنىڭ باس مامانى جانەل اسايىنوۆانىڭ ايتۋىنشا, قازىرگى ۋاقىتقا دەيىن ەرتىس وزەنى جايىلمالارىنىڭ 125,2 مىڭ گەكتارى حيميالىق وڭدەۋدەن وتكەن. ماماندار وزەن بويىمەن جالپى ۇزىندىعى 1 800 شاقىرىم بولاتىن اۋماقتى ءۇش مارتە اۋەدەن وڭدەپ شىقتى. ال 59 اۋىلدىق ەلدى مەكەندە بارەرلىك وڭدەۋ جۇرگىزىلىپ جاتىر. وڭدەۋ كولەمى مەن اۋداندارى ەداۋىر ۇلعايعانىن ەسكەرسەك, بيولوگيالىق جانە حيميالىق پرەپاراتتاردىڭ كولەمى دە ارتقان. اتاپ ايتقاندا, 157 توننا بيولوگيالىق جانە 11,4 مىڭ ليتر حيميالىق پرەپارات قاراستىرىلعان. بۇل ءىس-شارالارعا وبلىستىق بيۋدجەتتەن 2,9 ملرد تەڭگە بولىنگەن ەدى.
وڭدەلگەن اۋماقتاردى كولەمىنە قاراي بولەتىن بولسا, مىناداي تسيفرلار شىعادى: پاۆلودار قالاسى – 31,9 مىڭ گەكتار, اكسۋ قالاسى اۋماعى – 15 مىڭ گەكتار, تەرەڭكول اۋدانى – 19,6 مىڭ گەكتار, اقتوعاي اۋدانى – 19,6 مىڭ گەكتار, پاۆلودار اۋدانى – 29,5 مىڭ گەكتار, ەرتىس اۋدانى –9,2 مىڭ گەكتار, جەلەزين اۋدانى – 384 گەكتار.
«بيىل كوكتەمدە ەرتىس ارناسىنان شىققاننان باستاپ عىلىمي توپتىڭ سۇيەمەلدەۋىمەن شىبىن-شىركەيلەردىڭ دامۋى زەرتتەلدى. سونىڭ ناتيجەسىندە مەردىگەر ۇيىمعا وڭدەۋ جۇمىستارى بويىنشا نۇسقاۋلىقتار بەرىلىپ وتىردى. كوكتەمنىڭ سالقىن بولۋى قانسورعىش جاندىكتەردىڭ دەرناسىلدەرىنىڭ دامۋىنىڭ ءبىراز تەجەلۋىنە ىقپال ەتتى. وسىنى پايدالانىپ مەردىگەر ۇيىم تولىعىمەن وڭدەۋ جۇمىستارىن جۇرگىزدى. اۋەلى بيولوگيالىق پرەپاراتپەن, ال سۋ ارناسىنا كىرگەن سوڭ شالشىق سۋلار حيميالىق پرەپاراتپەن وڭدەلدى. اۆيا جانە جاياۋ وندەۋشىلەردىڭ ارقاسىندا پرەپاراتتاردىڭ تيىمدىلىگى 90%-دان جوعارى كورسەتكىشكە قول جەتكىزدى. قازىرگى كەزدە قولجەتىمسىز (جاياۋ جانە اۆياتسيامەن وندەۋگە مۇمكىندىك جوق) جەرلەردەن قاناتتانىپ ۇشىپ شىققان شىبىن-شىركەيگە قارسى بارەرلىك وڭدەۋ جۇمىستارى جۇرگىزىلىپ جاتىر», دەيدى ج.اسايىنوۆا.
عىلىمي توپتىڭ فەنولوگيالىق باقىلاۋلارى كۇندەلىكتى نەگىزدە جۇرگىزىلەدى. ولاردىڭ بولجامى بويىنشا سۋ مولشەرىنىڭ كوپ بولۋىنا بايلانىستى وڭدەۋ جۇمىستارى شىلدە ايىنىڭ ورتاسىنا دەيىن جالعاسۋى مۇمكىن. قازىرگى تاڭدا ەرتىس وزەڭىنىڭ جاعالاۋىندا ورنالاسقان ەلدى مەكەندەردە سارى ماساعا قارسى بارەرلىك وڭدەۋ جۇمىستارى جالعاسىپ جاتىر.
پاۆلودار وبلىسى
