راديو جۋرناليستيكا سالاسىندا ۇزاق جىل قىزمەت ەتكەن عاليا قۇسايىنقىزى كوپشىلىككە ء«اربىر ۇيگە راديو قاجەت», «تىعدىرلاردى بىرىكتىرگەن – قازاقستان», «ۇلتىن ۇلىقتاعان اسىل انا», ء«ومىر شىڭى» ەڭبەكتەرىمەن تانىس. ال بيىل جارىققا شىققان «تۇلعالار – عاجاپ جاندار» كىتابى – جۋرناليستيكاداعى ىزدەنىس ىزدەرىنەن تۋعان مازمۇندى تۋىندى. مۇندا ۇلت رۋحانياتىنا سۇبەلى ۇلەس قوسقان قايراتكەر ازاماتتاردىڭ كىسىلىك كەلبەتى, دەگدار بولمىسى حاقىندا باياندالادى. «تۇلعالىق تۇعىرعا كىمدەر لايىق؟» دەگەن سۇراعىمىزعا اۆتور بىلاي دەپ جاۋاپ بەرگەن ەدى:
«تۇلعا دەپ ءومىردىڭ بارلىق قيىندىعى مەن جاقسىلىعىن كورگەن, اق پەن قارانى اجىراتا الاتىن, ءوزىنىڭ ءار ءىس-ارەكەتتەرىنە جاۋاپ بەرەتىن, ءوزى جەكە شەشىم قابىلدايتىن, الدىنا قويعان ماقساتتارىنا جەتەتىن ادام دەپ تۇسىنەمىن. تۇلعا باسقا ادامدارعا ۇقسامايدى. ولاردىڭ ومىرگە دەگەن كوزقاراسى ەرەكشە. ونداي جاندار كوپتىڭ ءبىرى ەمەس. ونىڭ دەربەس پىكىرى بار. ول – باسقانىڭ جەتەگىندە جۇرمەيدى, كەرىسىنشە سوڭىنان كوپشىلىكتى ەرتە بىلەتىن ادام. ويتكەنى ونىڭ بويىندا كوشباسشىلىق قاسيەت بار. وسىنداي جاندار قازىرگى قوعامعا كەرەك. سول سەبەپتى ىلگەرىدەگى جانە ءوزىم كورگەن, مويىنداعان تۇلعالاردىڭ عيبراتتى عۇمىرىن قاعازعا ءتۇسىرۋدى ماقسات ەتتىم»,
دەدى ع. بالتاباي.
اۆتور كىتابىندا بەلگىلى يسا بايزاقوۆ, فاريزا وڭعارسىنوۆا, «قازاقتىڭ لەۆيتانى» اتانعان انۋاربەك بايجانباەۆ سىندى تۇلعالاردىڭ ءومىرى مەن شىعارماشىلىعىنان باستاپ كوپشىلىككە بەيمالىم العاشقى تەاتر اكتريساسىنىڭ ءبىرى ءشاربانۋ بايزاقوۆا, العاشقى قازاق جۋرناليست قىزدارىنىڭ ءبىرى ءلازيزا سەرعازينانىڭ تاعىلىمدى تاعدىرىن ءسوز ەتەدى.
مازمۇندى كەشتە مەملەكەت جانە قوعام قايراتكەرى رىستى جۇمابەكوۆا, الماتى اۋداندىق ارداگەرلەر ۇيىمىنىڭ توراعاسى مارات مۇستافين, ارداگەر-ۇستاز ەركىن داۋەش ۇلى, باسقا دا ازاماتتار اقجارما تىلەكتەرىن ايتىپ, كىتاپ اۆتورىنا زور دەنساۋلىق, شىعارماشىلىق تابىس تىلەدى.
