قالا تۇرعىندارىنىڭ دەمالىس ورىندارىنا اينالعان, جاز بويى مادەني, بۇقارالىق سيپاتتاعى ءتۇرلى ءىس-شارا وتەتىن ساياباقتاردى رەتكە كەلتىرۋ, اعاش بۇتالارىن اكتەپ, بىلتىرعى قىستان قالعان قوقىستاردان, قۋراعان شوپتەردەن ارىلتۋ, سىنعان ورىندىقتاردى جوندەۋ, قىش تاقتايشالاردى رەتكە كەلتىرۋ جۇمىستارىمەن قالا تازالىعىنا جاۋاپتى كوممۋنالدىق قىزمەت ماماندارى ەمەس, بارلىق تۇرعىن اينالىسۋعا ءتيىس.
وتكەن اپتادا ورمان شارۋاشىلىعى قىزمەتكەرلەرى, بالىقشىلار قاۋىمداستىعى, ەرىكتىلەر, «جاسىل ەل» ەڭبەك جاساعىنىڭ مۇشەلەرى «تازا قالا – تازا جاعالاۋ» اكتسياسى اياسىندا ەلەك, قارعالى, سازدى وزەندەرىنىڭ جاعاسىنداعى كوممۋنالدىق جاعاجايلاردى رەتكە كەلتىردى. ەلەك وزەنىنىڭ جاعالاۋىن تازالاۋعا شىققان 100 ەرىكتى 8 توننا قوقىس جيناسا, قارعالى وزەنىنىڭ بويىنان 7 توننا قوقىس جينالدى. قالا توڭىرەگىندەگى وزەن ايدىندارى وتە لاس, سۋ ارنالارى بويى مەن وتكەلدەردى كوكتەمگى سۋ تاسقىنىندا جينالعان ءشوپ-شالام مەن سىنعان اعاش بۇتاقتارى تولتىرىپ تاستاعان. وعان تۇرمىستىق قالدىقتار تاعى قوسىلعان. اسىرەسە اقتوبە سۋقويماسىنىڭ جان-جاعى تۇرمىستىق قالدىقتارعا تولى. سونداي-اق «تازا ورمان» اكتسياسى اياسىندا اقتوبە قالاسى زارەچنىي تۇرعىن ءۇي الابىنداعى توعايلاردى ورمان شارۋاشىلىعى مەكەمەسى قىزمەتكەرلەرى «جاسىل ەل» ەڭبەك جاساعىنىڭ مۇشەلەرىمەن بىرگە تازالادى. مۇنداي ءىس-شارا ءبىر مەزگىلدە اقتوبە وبلىسىنىڭ ون ەكى اۋدانىندا جالعاستى.
ءساۋىردىڭ سوڭعى ونكۇندىگىنەن بەرى ەل اۋماعىندا وتكىزىلىپ جاتقان سەنبىلىكتەر تۋعان جەرىنىڭ تابيعاتىنا بەيجاي قارامايتىن تۇرعىنداردىڭ ەرىكتى ءىس-شاراسىنا اينالدى. جازعى كانيكۋل باستالىپ, قولدارى بوساعان ستۋدەنتتەر «تازا قالا – تازا جاعالاۋ» ناۋقانى اياسىندا قولدارىنا تىرما, كۇرەك, سىپىرعىش ۇستاپ, ارنايى قولعاپتار كيىپ, اقتوبە قالاسىنىڭ توڭىرەگىندەگى وزەن جاعالاۋلارىن قوقىستاردان ارىلتۋعا كىرىستى. اقتوبە قالاسى جاستار رەسۋرستىق ورتالىعىنىڭ قىزمەتكەرلەرى الماتى اۋدانىنىڭ پروباتسيا تىزىمىندەگى جاستار جانە ۆولونتەرلەر ەلەك وزەنىنىڭ جاعالاۋىن تازالاۋدى باستادى. «ەكولوگيالىق ءىس-شارانىڭ نەگىزگى ماقساتى – جاسوسپىرىمدەر, جاستار بويىندا ەكولوگيالىق مادەنيەتتى قالىپتاستىرۋ. ويتكەنى تابيعاتتى ايالاۋعا داعدىلانىپ وسكەن جاستار بويىندا ىزگىلىك سەزىم قالىپتاسادى. ول ەشقاشان دا قوقىستى كەز كەلگەن جەرگە لاقتىرمايدى, تابيعاتتى بۇلدىرمەيدى جانە قاتارلاستارىنا ۇلگى بولادى. وسى ارقىلى ادامدارىمىز بويىنا ەكولوگيالىق مادەنيەتتى سىڭىرۋگە ىقپال ەتەمىز», دەيدى اقتوبە قالاسىنىڭ جاستار رەسۋرستىق ورتالىعى» كمم ديرەكتورى س.ارتىعالين.
«تازا قالا – تازا جاعالاۋ» اكتسياسى جىل سوڭىنا دەيىن جالعاساتىن بولادى. تابيعات اياسىنا دەمالۋعا كەلىپ, وزەن جاعالاۋىنا شولمەك, پلاستيك قۇتىلار, باسقا دا تۇرمىستىق قوقىس تاستاپ, اينالاسىن ابدەن لاستاپ كەتەتىن ەرەسەكتەر بالالاردىڭ قوقىس جيناپ جۇرگەنىن كورىپ, ويلانار دەگەن ءۇمىت بار.
اقتوبە وبلىسى
