قازىر كومپانيا جاساندى ينتەللەكت نەگىزىندە نەبىر جاڭا جۇيەلەردى ازىرلەۋمەن اينالىسادى. ونىڭ باستى ءونىمى – تەمىرجول كولىگىمەن جۇك تاسىمالىن جۇيەلى جوسپارلايتىن «MultiCode» جۇيەسى. ول تەمىرجول كولىگىمەن جۇك تاسىمالىن جوسپارلاۋ ماسەلەسىن شەشەدى. بۇل باعىتتا قانداي ماسەلە بار؟ مىسالى, تاۋاردى تاسىمالداۋ ءۇشىن شارتتى تۇردە 50 ۆاگون سۇراپ ءتۇرلى كومپانيالار كەلەدى. تاپسىرىستىڭ ءبارى WhatsApp ارقىلى قابىلدانادى. ايدىڭ باسىندا بەلگىلى ءبىر مامان تاپسىرىستاردى بولەدى. بىراق مىندەتتەردى مەرزىمىندە ورىنداۋ ءۇشىن كولىك جەتە مە, جوق پا – ەشكىم الدىن الا سانامايدى. بۇدان باسقا ۆاگونداردىڭ بەلگىلى ءبىر سانى قانشا ۋاقىت جولدا تۇراتىنى نەمەسە بوس جۇرەتىنى تۇسىنىكسىز. بۇل – بەرگى جاعى. ارعى جاعىندا ءبىرشاما دۇنيە بار. تاۋاردىڭ ساپاسى, جەتۋ ۋاقىتى, ءارتۇرلى قىلمىستىق وقيعالار سىندى ماسەلەلەر دە كوبىنە قاراۋسىز قالادى. ال ءانۋاردىڭ توبى بارلىعىن اشىق فورماتقا شىعارىپ, جاساندى ينتەللەكت كومەگىن قوسىپ, تسيفرلاندىرۋ ارقىلى شەشۋگە تىرىسادى. قازىر وتاندىق ستارتاپتىڭ جۇيەسىندە 71 مىڭ ۆاگون بار, ال باسقارۋدى تسيفرلاندىرۋ جوسپارىندا بۇكىل الەم بويىنشا 3,5 ملن ۆاگون تۇر.
– ءبىز ۆاگون وپەراتورلارى ءۇشىن جاساندى ينتەللەكت نەگىزىندە باعدارلامالىق جاساقتاما جاسايمىز. باستى ماقساتىمىز – زاماناۋي تەحنولوگيالاردىڭ كومەگىمەن تەمىرجول لوگيستيكاسىن ءتيىمدى ەتۋ. باسىندا جارتى جىلداي ءتۇرلى تاپسىرىستار نەگىزىندە الگوريتمدى سىنادىق. دەرەكتەر نەگىزىندە ۆاگونداردىڭ بوس ءجۇرىسىن كەم دەگەندە 10%, ال دۇرىسىندا 40%-عا قىسقارتۋعا بولاتىنىن كوردىك. بۇل ايىنا قوسىمشا ونداعان مىڭ دوللار تابىس تابۋعا مۇمكىندىك بەرەدى. ءبىزدىڭ جاساقتامانىڭ تارتىمدىلىعىن جەتىلدىرۋ ءۇشىن تولىققاندى SaaS-ءونىم جاساۋدى شەشتىك. دەرەكتەردى الا وتىرىپ, جۇيە ۆاگون جولدا كوپ تۇرماۋى نەمەسە بوس كەلمەۋى ءۇشىن قاشان, قايدا باراتىنىن انىقتايدى, – دەيدى ءانۋار سارسەمبينوۆ.
قازىر كوپتەگەن ۆاگون پاركتەرى ەسكى رەسەيلىك سوفت ERP-ءدى قولدانىپ ءجۇر. ول تاپسىرىستار سانىن, جۇكتىڭ باعىتىن, جۇرگەن شاقىرىمدى, ۇلكەن كولەمدەگى اقپاراتتى وڭدەي المايدى. الايدا تيىمدىلىكتى ارتتىرۋ ءۇشىن وسىنىڭ ءبارى قاجەت. ال ءانۋار جۇك تاسىمالىنىڭ بارلىق قىر-سىرىن ءبىلىپ, جۇيەسىنە قوسقان. سوندا دا رەسەيلىك كومپانيالاردىڭ سۇرانىستا ەكەنى قىنجىلتادى.
– ءىس جۇزىندە بىلاي. قاتە ەسەپتەردىڭ كەسىرىنەن كومپانيا تاۋلىگىنە 200 كم جىلدامدىقپەن جۇرەتىن ۆاگون جۇكتى 5 كۇننەن كەيىن 1000 شاقىرىمدىق سوڭعى نۇكتەدە تۇسىرەدى دەپ ەسەپتەيدى. الايدا دەرەكتەر ونىڭ ەكىتالاي ەكەنىن كورسەتەدى. ونىڭ ۇستىنە بەكەتتەردىڭ ماۋسىمدىق جۇكتەمەسى فاكتورى بار. شىن مانىندە, جۇك دىتتەگەن جەرىنە 8 كۇندە جەتەدى. ءسويتىپ, جوسپارلاۋ قاتە بولعان كەزدە ۆاگوندار 3 كۇن بوس تۇرادى. ۋاقىت كەتەدى, ءتىپتى زاتتار ءب ۇلىنۋى دە مۇمكىن. قارجىلىق ماسەلەنى ايتپاسا دا بولادى. ءبىزدىڭ جۇيە كورسەتىلگەن كەزەڭدەگى تاسىمالدىڭ بارلىق مۇمكىن نۇسقالارىن ىرىكتەپ, تاريحي دەرەكتەردى قولدانا وتىرىپ كوبىرەك تابىس تۇسىرەتىن نەمەسە ۆاگونداردىڭ بوس ءجۇرىسىن ازايتاتىن جوسپاردى ديسپەتچەرگە بەرەدى, – دەپ ءتۇسىندىردى ول.
ءبىر قىزىعى, لوگيستيكا سالاسىندا «جوعالعان» ۆاگوندار ماسەلەسى بار. پاركتە مىڭداعان ۆاگون بولسا, كەيبىرى بايقالماي قالۋى مۇمكىن. بوس ۆاگوندار بار ەكەنى ديسپەتچەردىڭ ەسىنەن شىعىپ كەتىپ جاتادى. وعان ماماندار كۋا. وسىلايشا, تاۋلىگىنە 40-50 ۆاگون «جوعالۋى» مۇمكىن. تاڭعالارلىعى بۇل جاعدايعا ءبارى ۇيرەنگەن, كوندىككەن. سويتە تۇرا كومپانيالار اجەپتاۋىر تابىستان قاعىلىپ وتىرادى. ال مىنا جوبا وسى ماسەلەلەردىڭ ءبارىن قاداعالاپ, شەشپەك. ولار قازىر تمد ەلدەرى, سوسىن الەم نارىعىنا شىعۋعا ۇمتىلىپ جاتىر. ءۇندىستان, لاتىن امەريكاسى, اقش نارىقتارىن ءتيىمدى دەپ ويلايدى. ونىڭ ۇستىنە بۇل ەلدەردەگى ماسەلە بىزدىكىمەن ۇقساس. ءانۋار الدىنا تەمىرجول كولىگىمەن شەكتەلمەيمىز, ۇشاق, كەمە, فۋرالاردى تسيفرلاندىرۋ جوسپاردا بار دەپ ۇلكەن ماقسات قويىپتى. لايىم سولاي بولعاي.
