بەلگىلى بولعانداي, تاڭعى ۋاقىتتا 102 ارناسىنا جوعالعان بالا تۋرالى حابار كەلىپ تۇسكەن. قوڭىراۋ شالعان بالانىڭ اناسى بالاسىن اۋلادا ويناپ جۇرگەن جەرىنەن تابا الماي قالعانىن ايتىپ جۇگىنگەن. جاقىندارى بالانى ءوز بەتىمەن ىزدەپ كورگەنىمەن, ىزدەۋ ناتيجە بەرمەگەن.
جەدەل قوڭىراۋ قابىلداعان ءتارتىپ ساقشىلارى بىردەن جىلدام ارەكەتكە كوشىپ, كامەلەتكە تولماعان بالانى ىزدەۋدى دەرەۋ ۇيىمداستىرادى. قوڭىراۋ كەلىپ تۇسكەن ساتتەن قۇقىق قورعاۋ قىزمەتكەرلەرى بالانىڭ بولۋى مۇمكىن بارلىق اۋماقتى تەكسەرۋگە كىرىسكەن. بۇل جەردە قىزمەتشى يتپەن بىرگە كينولوگ ينسپەكتورلار دا ىزدەۋ شاراسىنا جۇدىرىقتاي جۇمىلدىرىلعان. پوليتسەيلەردىڭ سەنىمدى سەرىگىنە اينالعان قىزمەتتىك يت كيىمنەن شىققان ءيىس ارقىلى جوعالعان بالانى ىزدەۋگە كىرىسەدى. ءبىراز ۋاقىتتان كەيىن دان كيىمگە جۇققان يىسپەن بالانىڭ ىزىنە تۇسەدى. ناتيجەسىندە, يت پوليتسيا قىزمەتكەرلەرىن بالا جۇرگەن ءۇيدىڭ اۋماعىنداعى ويىن الاڭدارىنىڭ بىرىنە اپارعان. ءتارتىپ ساقشىلارىنا حابارلاسقان بالانىڭ اناسى كومەك كورسەتىپ, ۇلىن جەدەل ىزدەستىرگەنى ءۇشىن پوليتسەيلەرگە ەرەكشە العىسىن ءبىلدىردى.
نەمىس وۆچاركاسى دان پوليتسيا بولىمشەسىنىڭ كينولوگيالىق قىزمەتىندە ءتورت جىلداي قىزمەت ەتىپ كەلەدى. سودان بەرى قىزمەتتىك يت سەرىكتەستەرىنىڭ سەنىمىنە يە بولىپ, باقىلاۋ جۇمىستارىنا جاقسى ۇيرەتىلدى. ءيىس ىزىنە ءتۇسىپ جوعالعاندى ىزدەۋگە ابدەن داعدىلانعان داننىڭ قابىلەتىنە استانالىقتار دا ءدان ريزا. ەلوردالىق ساقشىلار اۋلادا ەرەسەكتەردىڭ قاراۋىنسىز ويناپ جۇرگەن بالالاردىڭ اداسىپ كەتەتىن جاعدايلار ءجيى بولاتىنىن ايتىپ كەلەدى. بۇعان دەيىن دە قىزمەتتىك يت دان تۇرعىن ءۇيدىڭ اۋلاسىنان شىعىپ كەتكەن 5 جانە 7 جاستاعى ەكى ۇل بالانىڭ دا امان-ەسەن جاقىندارىمەن قاۋىشۋىنا سەبەپكەر بولعان ەكەن.
