جارقىن سىزدىققىزى بۇل جولدا ۇزدىكسىز وقىدى, تىنىمسىز ەڭبەكتەندى. اناسىنىڭ ء«بىزدىڭ ۇيگە ءبىر دارىگەر كەرەك», دەگەن ءبىر اۋىز ءسوزىن جەرگە تاستاماعان ول «انام, قولىمنان كەلەتىنىن بىلگەن ەكەن عوي», دەيدى. بالا كەزدەن كەلە جاتقان ارمانى – تەلەجۋرناليست بولۋ ەدى. سودان بولار الدىنا الاڭداپ كەلگەن جۇكتى انالاردىڭ الدىمەن جىلى سوزىمەن جانىن شۋاققا بولەيدى. سوسىن بارىپ قانا ەم-دومىنا كىرىسەدى.
وسىلايشا, جارقىن سىزدىققىزى 1996 جىلى قاراعاندىنىڭ مەديتسينالىق ينستيتۋتىنىڭ جالپى مەديتسينالىق فاكۋلتەتىنە وقۋعا تۇسكەن. 2002 جىلى ەمدەۋ فاكۋلتەتىندە اكۋشەر-گينەكولوگ ماماندىعىن تەرەڭدەتىپ وقىپ, ودان كەيىن تاعى ءبىر جىلدىق ءبىلىمىن ينتەرناتۋرا ارقىلى جەتىلدىردى. ءبىلىم الىپ ءجۇرىپ, پراكتيكاعا دا قاتىسىپ, تاجىريبەسىن ابدەن تولىقتىرعان جاس مەيىرگەر ءىسى ديپلومىنا قول جەتكىزگەن سوڭ العاشقى ەڭبەك جولىن سولتۇستىك قازاقستان وبلىسى شال اقىن اۋدانىنداعى ورتالىق اۋرۋحانانىڭ بوسانۋ جانە گينەكولوگيا بولىمشەسىنىڭ مەڭگەرۋشىسى بولىپ باستادى. سوندا بەس جىل ەڭبەك ەتىپ, ەكىنشى دارىگەرلىك كاتەگورياسىن الدى. اۋداندىق اۋرۋحانادان بىلىكتىلىگىن مولايتىپ العان ول قايتا قاراعاندىعا قونىس اۋداردى. وبلىستىق پەرزەنتحانادا 2022 جىلعا دەيىن اكۋشەر-گينەكولوگ بولىپ ەڭبەك ەتەدى. وسى ۋاقىت ارالىعىندا ايماققا مىقتى اكۋشەر رەتىندە اتى تانىلدى. جۇكتى انالاردىڭ بارلىعى تاجىريبەسى تولىققان, انا مەن بالا دەنساۋلىعىنىڭ بىلگىرى بولعان جارقىن سىزدىققىزىن ارنايى ىزدەپ كەلەدى ەكەن. ەڭبەگى ەلەنىپ, جوعارى ساناتتاعى دارىگەر اتاندى. جارقىن سىزدىققىزى 2022 جىلدان باستاپ №2 پەريناتالدىق ورتالىقتىڭ مەڭگەرۋشىسى. ياعني بىلگىر مامان, بىلىكتى باسشى پريشاحتينسكىدەگى پەرزەنتحاناعا جەتەكشىلىك ەتىپ وتىر.
جارقىن سىزدىققىزىنىڭ مەديتسينا سالاسىنداعى جالپى ەڭبەك ءوتىلى – 25 جىل. وسى ءبىر جىلدار ۋاعىندا قانشاما قىزىقپەن دە, قيىندىقپەن دە بەتپە-بەت كەلگەن.
جۇمىسىنا العاش كىرىسكەن جىلى شالعاي اۋىلداعى ءبىر انانىڭ تولعاعى جەتىپ, ءوز كولىكتەرىمەن اۋدان ورتالىعىنا كەلە جاتادى. كۇن بولسا, 40 گرادۋس اياز. وعان الاڭداعان جاس اكۋشەر جەدەل-جاردەم كولىگىمەن ولارعا قارسى بەت الادى. سودان ورتا جولدا كەزىگىپ, جەدەل-جاردەم كولىگىنىڭ ىشىندە اسپاي-ساسپاي امان-ەسەن بوساندىرادى. «دەگەنمەن, سول جولى جاۋاپكەرشىلىكتى قاتتى سەزىندىم. سىرتتا اياز قىسىپ تۇر. اسا قاتتى كەرەك-جاراعىمىز دا جوق. ءبىر ءوزىم عانا. ونىڭ ۇستىنە ەندى عانا جۇمىسقا قابىلدانعان كەزىم. سودان باستاپ ءار انا مەن بالاعا ۇلكەن جاۋاپكەرشىلىكپەن, اسا ۇقىپتىلىقپەن قاراۋ كەرەگىن ءتۇسىندىم. ويتكەنى ءبىر ەمەس, ەكى ادامنىڭ دەنساۋلىعى مويىنىڭدا تۇرادى», دەيدى بىلىكتى اكۋشەر.
ءتۇرلى قىزىقتارعا دا تاپ بولىپ جاتادى. اسىرەسە اق كويلەكپەن كەلگەن قالىڭدىقتى بوساندىرىپ العانىن ءالى قىزىق قىلىپ ايتادى. «سول جولى جەدەل-جاردەم كولىگى قۇيعىتىپ كەلىپ, سيگنالىن قايتا-قايتا باسا بەردى. ىشىندەگى جۇرگىزۋشى «كەلىن كەلدى, كەلىن كەلدى», دەپ داۋىستاپ شىقتى. ءبىز تۇسىنبەي تۇرمىز. سويتسەك, تويدا وتىرىپ تولعاعى جەتكەن كەلىنشەك ەكەن. پەرزەنتحاناعا كادىمگى اق كويلەكپەن كىرگىزىپ الدىق. امان-ەسەن بوساندى. ونى ەستىگەن تويدا وتىرعان تۋىستارى پەرزەنتحاناعا كەلىپ, ارمەن قاراي دۋمانداتقان. وسى ءبىر ەرەكشە ءسات ەسىمىزدە», دەپ جىلى ەستەلىگىن جىميىپ جەتكىزدى ابزال جان.
ارداقتى اكۋشەر جىل سايىن ءبىلىمىن جەتىلدىرىپ, تاجىريبەسىن تەرەڭدەتىپ وتىرادى. ۇنەمى ىزدەنىس ۇستىندە. ونسىز تاعى بولمايدى دەيدى. ويتكەنى مەديتسينا عىلىمى دا كوز ىلەستىرمەس جىلدامدىقپەن دامىپ كەلەدى. وزىق تەحنولوگيانى وقىپ, ءبىلۋدى وزىنە تالاپ ەتىپ قويعان. ءار جىلى يزرايل, تۇركيا, رەسەي ەلدەرىنە بارىپ, ارنايى كۋرستاردى وقىدى. ول مەملەكەتتەردىڭ انا مەن بالا دەنساۋلىعىنا قالاي قارايتىنىن, قانداي كومەك كورسەتەتىنىن وقىپ-توقيدى. سول ارقىلى تاجىريبەسىن بايىتىپ, كاسىبيلىگىن شىڭدايدى.
جارقىن سىزدىققىزىنىڭ كوپ جىلعى ەڭبەگى ەلەۋسىز قالعان ەمەس. «التىن دارىگەر» مەدالىنە, «كاسىپوداققا سىڭىرگەن ەڭبەگى ءۇشىن» توسبەلگىسىنە يە بولعان. الدىڭعى جىلى مينيسترلىكتىڭ «دەنساۋلىق ساقتاۋ سالاسىنىڭ ۇزدىگى» مارتەبەلى ماراپاتىنا قول جەتكىزگەن.
ەڭبەك جولىندا مۇنداي بيىك دارەجەگە قول جەتكىزۋىنە ومىرلىك جولداسىنىڭ دا قولداۋى بار. مۇنى اكۋشەر بىزگە بىلاي جەتكىزدى: «جان-جارىم ەكەۋمىز سوناۋ ستۋدەنت كەزىمىزدە وتاۋ قۇردىق. ءومىردىڭ ءار باسپالداعىن سودان بەرى بىرگە باسىپ كەلەمىز. ول ماعان, مەن وعان قولداۋ بىلدىرەمىن. ويتكەنى جاۋاپكەرشىلىگى جوعارى جۇمىستىڭ اۋىرتپاشىلىعى ءاردايىم باسىم بولادى. جولداسىم دا مەديتسينا سالاسىندا ەڭبەك ەتەتىندىكتەن, ءبىر-ءبىرىمىزدىڭ جانىمىزدى تۇسىنەمىز».
ءيا, جولداسى سامات نۇركەەۆ تە وبلىستىق كلينيكالىق اۋرۋحانانىڭ بىلىكتى پروكتولوگى, حيرۋرگى. جوعارى ساناتتاعى دارىگەر. «التىن دارىگەر» مەدالىنىڭ يەگەرى. ءبىر شاڭىراقتىڭ استىنداعى ەكى بىردەي «التىن دارىگەر» ءبىر ۇل, ءبىر قىز تاربيەلەپ وتىر. ۇلى ءنۇرالي نازارباەۆ ينتەللەكتۋالدىق مەكتەبىنىڭ 10-سىنىبىن ءبىتىردى, قىزى جانسۇلۋ «مۇراگەر» مەكتەبىنىڭ 5-سىنىبىن ءتامامدادى. ەكەۋى دە اتا-انالارى سەكىلدى «التىن دارىگەر» اتانىپ, ەمدەلۋشىلەرگە شيپا دارىتقىسى كەلەدى.
قاراعاندى وبلىسى
