بۇعان دەيىن جازعانىمىزداي, وڭىردەگى 600-دەن استام وقۋشىنىڭ قوقىس قالدىقتارىنان جاساعان قولونەر بۇيىمدارى كورمەگە قويىلدى. «كونە تاراز» ەتنومادەني كەشەنىندەگى كورمەگە جينالعان جۇرتشىلىق ءبىلىم الۋشىلاردىڭ ونەرىن جوعارى باعالادى. سونداي-اق بىرنەشە جاس عالىمنىڭ يننوۆاتسيالىق جوباسى دا جۇرتشىلىق تاراپىنان قىزىعۋشىلىق تۋدىردى. اسىرەسە قوقىس قالدىقتارىن وڭدەيتىن زاۋىت جوباسى مامانداردى ءتانتى ەتتى.
جەرگىلىكتى اتقارۋشى بيلىك تاراتقان مالىمەتكە جۇگىنسەك, تۇرار رىسقۇلوۆ اۋدانىندا «ەڭ بەلسەندى تۇرعىن», شۋ اۋدانىندا «ەڭ ۇزدىك اۋلا سىپىرۋشى», قورداي اۋدانىندا «ەڭ ۇزدىك اۋلا», تالاس اۋدانىندا «ەڭ ۇزدىك كوشە» بايقاۋى ۇيىمداستىرىلىپ, جەڭىمپازدار باعالى سىيلىقتارعا يە بولدى.
«تازا قازاقستان» ەكولوگيالىق اكتسياسى باستالعالى بەرى وڭىردەگى ەرىكتى جاستار ءوز قالاۋىمەن بىرقاتار جۇمىستىڭ ساپالى اتقارىلۋىنا مۇرىندىق بولعانىن ايتا كەتكەن ءلازىم.
ۆولونتەرلەردىڭ بەلسەندىلىگىمەن تاراز قالاسىنداعى «مامىر» ساياباعىندا سانيتارلىق-تازالىق جۇمىستارى جۇرگىزىلدى. سونداي-اق باستاۋىن قىرعىز رەسپۋبليكاسىنان الاتىن تالاس وزەنىنىڭ بويى, ايشا ءبيبى, باۋىرجان مومىش ۇلى كوشەلەرىندە ايالدامالاردى بوياۋ مەن جۋ جۇمىستارى تالاپقا ساي اتقارىلدى.
بۇدان بولەك, بايزاق اۋدانىنىڭ ورتالىق ساياباعى, جامبىل اۋدانىنداعى ايشا ءبيبى كەسەنەسىنىڭ ماڭى, قورداي اۋدانىنىڭ ورتالىعى مەن مەركى اۋدانىنداعى سىپاتاي باتىر, سارىسۋ اۋدانىنداعى شوقاي داتقا كەسەنەلەرىنىڭ اينالاسى, شۋ قالاسىنداعى تەمىرجولشىلار ساياباعىندا تازالىق جۇمىستارى جۇرگىزىلدى.
جەرگىلىكتى اتقارۋشى بيلىك كەلتىرگەن دەرەككە سەنسەك, جىل سوڭىنا دەيىن جالعاساتىن ناۋقانعا جامبىلدىقتار ايرىقشا ۇلەس قوسۋعا دايىن ەكەن. وسى جىلى وڭىردەگى جولداردى جوندەۋ جۇمىستارىنا 23,1 ميلليارد تەڭگە قاراستىرىلعان. بۇل قاراجاتقا 469,6 شاقىرىم جول جوندەۋ جوسپارلانعان.
«تازا قازاقستان» اكتسياسى اياسىندا قولعا الىنعان road-ەستافەتاسىنا قاتىسۋشىلار جامبىل وبلىسىنا دا كەلدى. ەلوردا تورىنەن كەلگەن توپ مۇشەلەرىن جامبىلدىق بەلسەندىلەر كۇتىپ الدى. ولار ەكى ءجۇز شاقىرىمنان استام جول بويىندا تازالىق جۇمىستارىن جۇرگىزىپتى.
جالپى, ءوڭىردى اباتتاندىرۋ, كوگالداندىرۋ, سانيتارلىق تازالىق جۇمىستارىنا 10,3 ميلليارد تەڭگە قاراجات بولىنگەن. تۇرعىن ۇيلەر مەن جولداردى جوندەۋ, ساياباقتاردى اباتتاندىرۋ جۇمىستارى جىل سوڭىنا دەيىن جالعاسادى.
جامبىل وبلىسى
