دۋشانبەدە پەداگوگيكالىق شەبەرلىك ورتالىعىنىڭ تاجىكستاننىڭ ۇلتتىق ءبىلىم بەرۋ جۇيەسىن ىلگەرىلەتۋ بويىنشا اۋقىمدى جوباسى اياقتالدى. ەۋروپالىق وداق بۇل ماڭىزدى جۇمىستى ەلىمىزگە سەنىپ تاپسىرعان ەدى. تاجىك پەداگوگتەرى العاش رەت 2025 جىلى ەلدىك جانە جەكە ەمتيحان رەتىندە قابىلدايتىن PISA جاھاندىق زەرتتەۋىنە قاتىسۋدى جوسپارلاپ وتىر. سول سەبەپتى دە تاجىكستاندا مەكتەپتەردى تۇبەگەيلى وزگەرتۋ جانە پەداگوگتەردى كاسىبي دامىتۋ بويىنشا جۇيەلى جۇمىس باستالعان-تۇعىن.
– ءبىز الەمدىك ءبىلىم بەرۋ كەڭىستىگىنە ەنۋگە دايىنبىز ءارى جاڭا ستاندارتتارعا ۇمتىلامىز. PISA-عا قاتىسۋ تۋرالى ستراتەگيالىق شەشىم بارلىق مۇعالىمگە ۇلكەن جاڭالىق ءارى دەمەۋ بولدى, – دەپ قۇتتىقتادى تاجىكستاننىڭ ءبىلىم جانە عىلىم ءمينيسترى راحيمدجون سايدزودا.
ءبىرىنشى بولىپ وقۋدى رەسپۋبليكالىق, وبلىستىق مۇعالىمدەردىڭ بىلىكتىلىگىن ارتتىرۋ ينستيتۋتتارىنىڭ توپ-مەنەدجەرلەرى باستادى. سونىمەن قاتار ءار وڭىردەن وكىلدەر كەلىپ, بارلىق ايماقتاعى مەكتەپ قاۋىمداستىقتارىنا ءوز تاجىريبەلەرىمەن ءبولىستى.
– تاجىكستان كاسىبيلىككە قازاقستانداعى ارىپتەستەرىمەن بىرگە قادام باستى, تابىستى ىنتىماقتاستىق ءبىزدىڭ مۇعالىمدەردىڭ كاسىبي ءوسۋىنىڭ جاڭا كەزەڭىن بەلگىلەيدى, – دەدى ءبىلىم بەرۋ قىزمەتكەرلەرىنىڭ بىلىكتىلىگىن ارتتىرۋ رەسپۋبليكالىق ينستيتۋتىنىڭ ديرەكتورى ناۆرۋز ميرزوزودا.
سۇرانىسقا يە باعدارلامالار جاھاندىق پەداگوگيكالىق ترەندتەر كونتەكستىندەگى ستراتەگيالىق ماڭىزى بار ەڭ ءساتتى شەشىمدەردى قامتىدى. وقىتۋشىلاردىڭ مەتا-پاندىك قۇزىرەتتىلىكتەرىن كەڭەيتۋ جانە وقۋشىلاردىڭ فۋنكتسيونالدىق ساۋاتتىلىعىن دامىتۋ سياقتى وزەكتى تاقىرىپتار ەرەكشە قىزىعۋشىلىق تۋدىردى. راۋشان ابىشەۆا مەن تالعات مۋكۋتوۆ دۋشانبەگە ءبىرىنشى بولىپ ۇشىپ كەلىپ, ەۋروپالىق وداقتىڭ جاڭا باعدارلاماسىندا العاش جۇمىس ىستەي باستادى. ەلىمىزدەن بارعان مامانداردىڭ ارقايسىسى ءبىلىم بەرۋدى جاڭا دەڭگەيگە كوتەرۋدىڭ جاۋاپكەرشىلىگىن سەزىنىپ, ىنتا-شىنتاسىمەن كىرىستى. تاجىك ءبىلىمىنىڭ توپ-مەنەدجەرلەرىنە ارنالعان ارنايى سەسسيادا پەداگوگيكالىق شەبەرلىك ورتالىعىنىڭ ديرەكتورى جانبوتا كابدىكاريموۆا كەز كەلگەن جوبانىڭ تابىستى بولۋى ءۇشىن مىندەتتى – ستراتەگيالىق جوسپارلاۋ, كوشباسشىلىق ستاندارتتار, كوماندا قۇرۋ, قولدانبالى شەشىمدەر جانە باسقا دا باسىمدىقتاردى تالدادى. ماۋسىم جوباسى تاجىكستاننىڭ ەۋروپالىق وداقتىڭ ءبىلىم بەرۋ باعدارلامالارىن كەڭەيتۋگە مۇددەلى ەكەنىن, ەل ۇلتتىق ءبىلىم بەرۋ جۇيەسىندە ۇلكەن ماقساتقا دايىندالىپ جاتقانىن راستادى.
– حالىقارالىق سەرتيفيكات الۋ جوبانىڭ ءاربىر قاتىسۋشىسى ءۇشىن جانە رەسپۋبليكامىزدىڭ بارلىق پەداگوگتەرى ءۇشىن ماڭىزدى وقيعا بولدى, جاڭا وقۋ جىلىنان باستاپ ءبىز بارلىق مەكتەپ پەن ءۋالاياتتا قازاقستاندىق ستاندارتتاردى ەنگىزۋدى باستايمىز. ورتالىقتىڭ ACQUIN ەۋروپالىق اككرەديتتەۋ, سەرتيفيكاتتاۋ جانە ساپانى قامتاماسىز ەتۋ ينستيتۋتىنىڭ ينستيتۋتسيونالدى اككرەديتاتسياسىن, بىرنەشە باعدارلامالىق سەرتيفيكاتىن العانىن ماقتان تۇتامىز, – دەپ لەبىزىن ءبىلدىردى ەلوردالىق ءبىلىم بەرۋ قىزمەتكەرلەرىنىڭ بىلىكتىلىگىن ارتتىرۋ ينستيتۋتىنىڭ ديرەكتورى شاۆكات كاريمزودا.
شىلدە-تامىز ايلارىندا پەداگوگيكالىق شەبەرلىك ورتالىعىمەن بىرگە 1200-دەن استام دۋشانبەلىك مۇعالىمدەر وقىتۋ بويىنشا جاڭا جوبانى باستايدى. استانادان فۋنكتسيونالدىق ساۋاتتىلىقتىڭ ءارتۇرلى تۇرلەرىن – وقۋ, ماتەماتيكالىق, جاراتىلىستانۋ-عىلىمي, قارجىلىق, سونداي-اق جاھاندىق قۇزىرەتتىلىك پەن كرەاتيۆتى ويلاۋدى دامىتۋعا ماماندانعان ۇزدىك ترەنەرلەردىڭ ۇلكەن پەداگوگيكالىق توبى بارماق.
ەسكە سالا كەتەيىك, پەداگوگيكالىق شەبەرلىك ورتالىعى ەلىمىزدىڭ زياتكەرلىك تەحنولوگيالاردى الەمدىك بىلىمگە جۇيەلى تاراتۋدى جالعاستىرىپ جاتىر. ورتالىقتا ازەربايجان, تۇرىكمەنستان, قىرعىز رەسپۋبليكاسى, وزبەكستان, حانتى-مانسى اۆتونوميالىق وكرۋگى, ارمەنيا مۇعالىمدەرى وقىدى, سونىمەن قاتار 2024 جىلى مالاۆيدەگى «Nalikule College of Education» (افريكا) پەداگوگيكالىق كوللەدجىنىڭ مۇعالىمدەرىن وقىتۋ جۇيەسى بار.
