فوتو:قر كولىك مينيسترلىگىنىڭ ءباسپاسوز قىزمەتى
ءىس-شارا ورتالىق ازيا ەلدەرىنىڭ جانە ءدالىز بويىندا ورنالاسقان باسقا ەلدەردىڭ, سونداي-اق حالىقارالىق قارجى ينستيتۋتتارى مەن ەۋرووداق قۇرامىنا كىرمەيتىن G7 ەلدەرىنىڭ وكىلدەرىنىڭ قاتىسۋىمەن ءوتتى.
كولىك ءمينيسترى مارات قاراباەۆتىڭ كولىك ينفراقۇرىلىمىن دامىتۋ جانە كولىك بايلانىستارىن كۇشەيتۋ وڭىرلەردىڭ ەكونوميكالىق ءوسۋى مەن وركەندەۋى بارىسىندا ماڭىزدى ءرول اتقاراتىندىعىن اتاپ ءوتتى.
«ۇيلەستىرۋ پلاتفورماسىنىڭ قۇرىلۋى بىزگە ورتاق ماقساتتارعا جەتۋ ءۇشىن كۇشىمىزدى بىرىكتىرۋگە, تاجىريبە مەن پىكىر الماسۋعا بىرەگەي مۇمكىندىك بەرەدى. بۇل جۇمىسقا ازەربايجان, ارمەنيا, گرۋزيا, سونداي-اق تۇركيادان كەلگەن ارىپتەستەرىمىز شاقىرىلعانىن اتاپ وتكىم كەلەدى. بۇل ءوز كەزەگىندە ترانسكاسپي حالىقارالىق كولىك باعىتىن دامىتۋ بويىنشا ءىرى جانە تۇراقتى ماقساتتاردى ىسكە اسىرۋ اياسىندا ماڭىزدى ءرول اتقارادى», دەدى ۆەدومستۆو باسشىسى.
سونداي-اق مينيستر قاتىسۋشى ەلدەر مەن ۇيىمداردىڭ وكىلدەرىنە بىرەگەي الاڭ قۇرۋعا قاتىسىپ, قىزىعۋشىلىق تانىتقاندارى ءۇشىن ءارى ەۋروپالىق وداققا كورسەتىلگەن قولداۋ مەن ورتالىق ازيا ەلدەرىن دامىتۋعا باعىتتالعان جۇمىسى ءۇشىن العىس ءبىلدىردى.
«ترانسكاسپي حالىقارالىق كولىك مارشرۋتى ءۇشىن قۇرىلعان ۇيلەستىرۋ پلاتفورماسى ورتالىق ازيا مەن ەۋروپانىڭ اراسىن جاقىنداتۋعا باعىتتالعان ىنتىماقتاستىعىمىز بارىسىندا العا جاسالعان ەلەۋلى قادام. تۇراقتى كولىك بايلانىسى ايماقتىڭ ەكونوميكالىق ءوسۋىن جانە ونىڭ ەۋروپامەن بايلانىسىن نىعايتۋ ءۇشىن وتە ماڭىزدى. ءبىز سەرىكتەستەرىمىزگە دامۋ جانە قورشاعان ورتانى قورعاۋ ماقساتتارىنا قول جەتكىزۋدە قولداۋ كورسەتۋگە نيەتتىمىز», دەدى حالىقارالىق سەرىكتەستىك جونىندەگى باس ديرەكتوراتتىڭ ءبىرىنشى دارەجەلى كەڭەسشىسى حەنريك حولولەي.
مايا باكران ۇيلەستىرۋ پلاتفورماسى ءمۋلتيمودالدى باعىتقا اينالۋعا ىقپال ەتەتىنىن تىلگە تيەك ەتتى.
«ۇيلەستىرۋ پلاتفورماسى ترانسكاسپي حالىقارالىق كولىك باعىتىن ەۋروپانى, كاۆكازدى جانە ورتالىق ازيانى بايلانىستىراتىن مۋلتيمودالدى جانە زاماناۋي باعىتقا اينالدىرۋعا ىقپال ەتەدى. ءارتۇرلى مۇددەلى تاراپتاردىڭ ۇيلەستىرۋ ارەكەتتەرى ايماقتىڭ تۇراقتى ەكونوميكالىق دامۋىنا ۇلەس قوسادى», دەدى ەۋروپالىق ۇتقىرلىق جانە كولىك كوميسسياسى باس ديرەكتورىنىڭ ورىنباسارى مايا باكران.
تۇتاستاي العاندا, پلاتفورما اتالعان ءدالىزدىڭ جۇمىسىن ىلگەرىلەتۋگە جانە ورتالىق ازياداعى ينفراقۇرىلىم سالاسىنداعى باسىم جوبالاردى ىسكە اسىرۋ جونىندەگى كۇش-جىگەردى ۇيلەستىرۋگە ىقپال ەتەدى. ول سونداي-اق تەمىرجول, جول جانە پورت ينفراقۇرىلىمىنا ينۆەستيتسيالاردى ىنتالاندىرادى جانە ۇيلەستىرەدى.
ايتا كەتەيىك, ەۋرووداق ۇزاق ۋاقىت بويى ءوڭىردىڭ سەنىمدى سەرىكتەسى. سايكەسىنشە ينفراقۇرىلىمدى جاقسارتۋعا جانە ەكونوميكالىق بايلانىستاردى نىعايتۋعا, تۇراقتى دامۋدى ىلگەرىلەتۋگە ىقپال ەتەدى. جاڭادان قۇرىلعان پلاتفورما شەڭبەرىندە بىرلەسكەن جۇمىس تەك كولىك ينفراقۇرىلىمىن جاقسارتۋعا عانا ەمەس, سونىمەن قاتار ەكونوميكالىق بايلانىستاردى ايتارلىقتاي نىعايتۋعا, كولىك دالىزدەرىنىڭ قاۋىپسىزدىگى مەن تۇراقتىلىعىن ارتتىرۋعا, سونداي-اق كولىك سەكتورىندا يننوۆاتسيالار مەن وزىق تەحنولوگيالاردى ەنگىزۋدى جەدەلدەتۋگە مۇمكىندىك بەرەدى.
قىرمىزى جۇماعاليقىزى,
ەۇۋ ستۋدەنتى
