فوتو: gov.kz
بەس بىردەي شەت مەملەكەتتى توعىستىرىپ تۇرعان تەڭىزدىڭ تىلسىمى كوپ, تەڭىزىشىلىك ءتۇرلى اعىستار مەن ۇيىقتار, يىرىمدەر تۋرالى ەشكىم, ياعني عىلىم ناقتى ەش دەرەك بەرە العان جوق. ايتسە دە جاعالاۋداعى شومىلۋعا قاۋىپتى ايماقتاردا سۋعا تۇسپەۋدى جانە قاۋىپسىزدىك ەرەجەلەرىن قاتاڭ ساقتاۋدى قۇزىرلى ورىندار – توتەنشە جاعدايلار باسقارماسى جاز باستالىسىمەن جار سالا ايتىپ, تەڭىز جاعاسىنداعى دەمالۋشىلار اراسىنا بارىپ, الەۋمەتتىك جەلىلەردە تىنباي جارناما جاساپ ساقتاندىرعانمەن, ءدال سول قاۋىپتى ايماقتارعا بارىپ شومىلاتىندار جانە قايعىلى جاعدايعا ۇشىرايتىندار سانى ازايماي كەلەدى.
اقتاۋ قالاسى اۋماعىندا ۇزىندىعى 100 مەتر جانە ەنى 20 مەترگە سوزىلعان شورا سۋ كانالى, 4-شاعىن اۋداندا ورنالاسقان «Caspian Riviera Grand Palace» قوناقۇيىنەن باستاپ 5-شاعىن اۋدانداعى تاراس شەۆچەنكو ەسكەرتكىشىنەن تومەن ءتۇسۋ باعىتىنا قاراي ۇزىندىعى 300 مەتر جانە ەنى 20 مەتر جاعالاۋ ايماعى مەن ۇزىندىعى 3 800 مەتر جانە ەنى 120 مەتر ماەك جشس-نىڭ سۋ كانالىنىڭ جاعالاۋ ايماعى سۋعا تۇسۋگە رۇقسات ەتىلمەگەن ورىندار رەتىندە بەلگىلى. بۇل تۇستاردا ارنايى بەلگىلەر دە بار, ايتسە دە ءدال وسى ورىندارعا كەلىپ قيىن جاعدايعا تاپ بولىپ نەمەسە اجال قۇشىپ جاتاتىنداردىڭ ارەكەتى تۇسىنىكسىز. قازاقتا ايتىلاتىن «اجال ايدايدى» دەگەن وسى بولا ما دەپ ويعا قالاسىڭ...
رۇقسات ەتىلمەگەن قاۋىپتى ورىنداردا سۋعا تۇسەتىندەر كوبىنە قاۋىپتى ورىندار تۋرالى حابارلاماعا قانىق جەرگىلىكتى تۇرعىندار ەكەندىگى دە تاڭداندىرادى. مىسالى, اقتاۋدا شومىلۋعا تىيىم سالىنعان جەرلەردە كەيىنگى 5 جىلدا 16 ادام قازا تاپقان. ال جىل باسىنان بەرى سۋعا تۇسۋگە تىيىم سالىنعان ورىندا ءبىر ادام قايتىس بولدى.
«سۋداعى قاۋىپسىزدىكتىڭ بىرقاتار ەرەجەلەرى بار. اتاپ ايتقاندا, شومىلۋعا جابدىقتالماعان جەرلەردە سۋعا تۇسپەۋ, ماس كۇيدە شومىلماۋ, بالالاردى شومىلۋ ورىندارىندا قاراۋسىز قالدىرماۋ قاجەت. سونداي-اق جاعادان الىس جۇزۋگە, تىيىم سالىنعان جەرلەردە شومىلۋعا بولمايدى. بۇل قاراپايىم ەرەجەلەر ءسىزدىڭ جانە جاقىندارىڭىزدىڭ جازعى دەمالىستى قاۋىپسىز وتكىزۋىنە كومەكتەسەدى. توتەنشە جاعدايلار باسقارماسى قالا تۇرعىندارى مەن قوناقتارىنان قاۋىپسىزدىك ەرەجەلەرىن قاتاڭ ساقتاۋدى سۇرايدى», دەدى اقتاۋ قالالىق توتەنشە جاعدايلار باسقارماسى ازاماتتىق قورعانىس توبىنىڭ وفيتسەرى ازامات تولەگەنوۆ.
ا.تولەگەنوۆ اۋزىن جيعانشا سۋعا تۇسۋگە تىيىم سالىنعان شورا كانالىندا قايعىلى جاعداي بولدى. شومىلۋعا بارعان اكەلى-بالالى ەكەۋدىڭ جاندارمەن اكەسى قۇتقارىلىپ, ۇلى سۋعا باتىپ كەتتى. ءدال وسى قارساڭدا ماڭعىستاۋدا تەڭىزگە باتىپ بارا جاتقان ايەل قۇتقارىلدى.
سۋ – ءتىلسىز جاۋ, سوندىقتان ءجۇزۋ بىلمەگەن جاننىڭ جاعادان ۇزاماعانى ءجون, الايدا دەمالۋشىلار بۇل قاراپايىم مىسالدى بۇزىپ ءوتىپ, تەڭىزدىڭ تەرەڭىنە قاراي ۇمتىلاتىنىن قايتەرسىڭ.
جاز باستالدى, تەڭىز العاشقى قۇرباندارىن جۇتىپ ۇلگەردى. جاز دەمالىسى جاقسى-اق, بىراق تۇرعىندار مەن قوناقتاردىڭ سۋ ماڭىندا ساقتىقتى ۇمىتپاعانى دۇرىس بولار ەدى.
ماڭعىستاۋ وبلىسى
