جارىستىڭ العاشقى كۇنى مەرگەندەر «ازيا» ءستيلى بويىنشا سىنعا ءتۇستى. بۇل سايىستىڭ ەرەكشەلىگى – اراقاشىقتىعى 30 مەتر بولاتىن شارشى ءپىشىندى ءتورت بۇرىش ءۇش نىسانا قويىلادى. ونىڭ ءبىرىنشىسىنىڭ بەتى باتىسقا قاراي بۇرىپ ورنالاستىرىلسا, ورتاڭعى نىسانا تىكە قاراپ تۇرادى. ءۇشىنشى نىسانا ادەتتەگىندەي ءبىرىنشى نىساناعا قارسى بەتىن شىعىسقا بۇرىپ تۇرادى. ءاربىر نىساناعا وقتىڭ دارىعانىنا قاتىستى ۇپاي بەرىلەتىن ولشەمدەرى بار. بۇل ستيل بويىنشا ماڭعىستاۋلىق مەرگەن وراز ايبەك جەڭىمپاز اتانىپ, التىن مەدال يەگەرى اتانسا, ەكىنشى جانە ءۇشىنشى ورىنداردى قىزىلوردالىق ماحانبەت نۇرمان مەن قاراعاندىلىق مەرگەن ورالحان نۇراسىل ءبولىستى.
ال سايىستىڭ كەلەسى ءتۇرى «تۇرىك» ءستيلى ساراپقا سالىندى. بۇل ءستيلدىڭ ەرەكشەلىگى – مەرگەندەر ءبىر-بىرىنە ۇقسامايتىن ەكى نىساناعا كەزەك-كەزەك وق جىبەرىپ مىقتىنى انىقتادى. اۋەلگى نىسانا «قيعاش اتۋ» دەپ اتالسا, كەلەسىسى «قاباق اتۋ» دەگەن مانگە يە ەكەن. بۇل ءستيلدىڭ باس مەرگەنى رەتىندە الماتىلىق ورەن سارسەنباي ەرعازى تانىلسا, ەكىنشى ورىن جامبىلدىق جاس باباجان بەرىكبولسىنعا بۇيىردى. ءۇشىنشى جۇلدەگە قاراعاندىلىق ورالحان نۇراسىل يە بولدى.
چەمپيوناتتىڭ ءۇشىنشى كەزەڭىندە مەرگەندەر «ماجار» ءستيلى بويىنشا سايىستى. بۇنىڭ ەرەكشەلىگى – ءبىر-بىرىنە ىرگەسى جاپسارلاس ديامەترى 90 سم بولاتىن ءۇش نىسانا قاتار قويىلىپ, مەرگەندەر ونى اتپەن شاۋىپ كەلە جاتىپ اتادى. قانشا وق جۇمسايسىز وعان شەكتەۋ جوق. تەك وق جىبەرۋگە ارنالعان 100 مەترلىك قاشىقتان شىقپاۋ كەرەك. بۇل سايىسقا قاتىسقان 32 مەرگەننىڭ ىشىنەن تۇركىستاندىق لەسبەك عۇمىر التىن مەدالدى جەڭىپ السا, قىزىلوردالىق اسحان زاڭعار كۇمىس, ماڭعىستاۋلىق ادىلگەرەي ايدار قولا مەدال يەگەرى اتاندى.
جارىستىڭ قورىتىندى كەزەڭىندە ءوزىمىزدىڭ «جامبى اتۋ» ءستيلى ساراپقا سالىندى. بۇل ءستيلدىڭ ەرەكشەلەگى – بيىكتىگى جىلقىنىڭ بويىنا شاق كەلەتىن اراسى 10 مەتر ءۇش باعانا ورناتىلىپ, ونىڭ باسىنا ءۇش ءتۇرلى (التىن, كۇمىس, قولا) جامبى-نىسانا ءىلىنىپ قويىلدى. مەرگەندەر وسى ءۇش نىساندى اتىپ سايىسادى. بۇل ستيل بويىنشا تۇركىستاندىق مەرگەن لەسبەك عۇمىر جەڭىمپاز اتانسا, ەكىنشى ورىن تاعى ءبىر تۇركىستاندىق سپورتشى سوۆەتحان راۋانعا, ءۇشىنشى ورىن اقمولالىق بايزۇللا ەراسلانعا بۇيىردى.
