سيمفونيالىق وركەستر بۇل كونتسەرتكە تىڭعىلىقتى دايىندالعانى كورىنىپ تۇر. العاشقى ساتتەن-اق زالعا لىق تولى كورەرمەندى كلاسسيكالىق مۋزىكانىڭ قۇدىرەتى بيلەپ الدى. ۆ.موتسارت, ي.باح, ا.مارچەللو, دج.ءروسسينيدىڭ ايگىلى تۋىندىلارى ورىندالىپ, جۇرتشىلىقتىڭ تالعامىمەن ۇيلەسىپ جاتتى دەۋگە بولادى. ەڭ اۋەلى مۋزىكانتتار دج.ءروسسينيدىڭ «الجيردەگى يتاليالىق قىز» وپەراسىنان ۋۆەرتيۋرانى ورىندادى. بۇل وپەرانى روسسيني نەبارى 21 جاسىندا, 23 كۇندە جازىپ, يتاليالىق وپەرا تەاترىندا كوشباسشى كومپوزيتور اتانعان. ونداعى ۋۆەرتيۋرا ازىلگە تولى, جاندى, تاقىرىپتاردى الماستىرىپ وتىرۋىمەن ەرەكشەلەنەدى. تۋىندى ءوز زامانىندا تەاترلاردا جىلدام تاراپ, ەسترادالىق كونتسەرتتەردە تانىمال بولعان. ال اۆتورعا سول ۋاقىتتان باستاپ ميلان, ريم, ۆەنەتسيا تەاترلارى ەسىگىن ايقارا اشا باستايدى.
كەشتەگى ەرەكشە نومىرلەردىڭ ءبىرى گوبوي اسپابىمەن ورىندالعان ا.مارچەللونىڭ «Adagio» تۋىندىسى بولدى. گوبوي اسپابىندا وينايتىن استانالىق مۋزىكانت دامەلى ماحپيروۆا بۇل كونتسەرتتىك كەشكە ارنايى كەلىپتى. ول فيلارمونيانىڭ كونتسەرتتىك زالىنداعى اكۋستيكا تالاپقا ساي ەكەنىن, ال وركەستردەگى اتموسفەرالىق اۋان وتە كرەاتيۆتى بولعانىن جەتكىزدى. كونتسەرتكە كەلگەن كورەرمەندەردىڭ ەرەكشە ىقىلاسى ءۇشىن ريزاشىلىعىن ايتىپ, بۇل پاۆلودارلىق ديريجەر بولات راقىمجانوۆتىڭ جەرگىلىكتى جۇرت اراسىنداعى بەدەلى مەن ەڭبەگىنىڭ ناتيجەسى دەپ باعالايتىنىن اتاپ ءوتتى.
«استانا وپەرا» تەاترىنان كەلگەن ديريجەر رۋسلان بايمۇرزين دە سيمفونيالىق وركەستردىڭ كونتسەرتىنەن سوڭ العان اسەرىمەن ءبولىستى.
«كەرەكۋ توپىراعىنا ديريجەر رەتىندە تۇڭعىش رەت تابان تىرەپ وتىرمىن. بۇل جەردەگى سيمفونيالىق وركەستردىڭ وزىندىك باعىتى بار, ابدەن قالىپتاسقان ۇجىم ەكەنى بايقالادى. ماعان وركەسترمەن جۇمىس ىستەۋ ۇنادى, بارلىق اسپاپشىلار, ارتىستەر بىلىكتى, كاسىبي تۇرعىدان جەتىلگەن. ىشەكتى اسپاپتار, ۇرمەلى اسپاپتاردا بولسىن, وتە مىقتى ويناي بىلەتىن مۋزىكانتتار بار. كۇردەلى شىعارمالاردى ۇلكەن ۇيلەسىممەن ءارى ساتىمەن ورىنداپ شىقتىق. جارقىن, مازمۇندى كونتسەرت ءوتتى دەگەن ويدامىن. ال پاۆلودار قالاسىنىڭ ءوزى تاماشا تابيعات اياسىندا, ەلىمىزدەگى ەڭ ۇلكەن ەرتىس وزەنىنىڭ جاعالاۋىندا ورنالاسقان. جەرگىلىكتى مۋزىكا تىڭدارماندارىنا ونەرىمىزدى باعالاپ كەلگەنى ءۇشىن مىڭ العىس», دەدى ەلوردالىق ماەسترو.
ايتىپ وتەيىك, يسا بايزاقوۆ اتىنداعى وبلىستىق فيلارمونيانىڭ سيمفونيالىق وركەسترى بيىل قاڭتار ايىندا يتاليا جۇرتىن قۋانتىپ قايتتى. مۋزىكانتتار يتاليا جانە البانيا وركەسترلەرىمەن بىرگە 7 قالانىڭ كورەرمەنىنە ۇلكەن كونتسەرت ۇسىندى.
پاۆلودار وبلىسى
