مامىر ايىنىڭ ورتا شەنىنەن بەرى رەسپۋبليكالىق عارىشتىق بايلانىس ورتالىعىنىڭ سەپ بولۋىمەن بىرنەشە مەكتەپكە «Starlink» جۇيەسىن ورناتۋ جۇمىستارى باستالدى. وبلىستىق اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسى اتالعان ورتالىقپەن 145,5 ملن تەڭگە قاراجاتقا كەلىسىمشارت جاساسقان.
«SpaceX» كومپانياسىنىڭ سپۋتنيكتىك جۇيەسى شالعاي جەردەگى جۇرتشىلىقتىڭ ساپالى ينتەرنەتكە قول جەتكىزۋىنە ايتارلىقتاي سەرپىن بولىپ تۇر. اسىرەسە مۇنداي وزىق تەحنولوگيا الىستا جاتقان اۋىل مەكتەپتەرىنە اۋاداي قاجەت دۇنيە. ازىرگە ونداعى مەكتەپتەرگە تولىققاندى پروۆايدەر ورناتا قويۋ قيىن ەكەنى راس-تى. بىراق قۇرىلىپ جاتقان جاڭا جۇيە مۇنداي كەدەرگىگە قاراماي, اۋىل بالالارىنىڭ ساپالى ءبىلىم الۋىنا جول اشادى. ياعني كومپانيا جەر شارىنىڭ كەز كەلگەن نۇكتەسىنە عالامتور جەلىسىن تارتا الاتىنىمەن ەرەكشە. وسى جوبانىڭ ارقاسىندا كوپتەگەن شالعايداعى ەلدى مەكەن جوعارى جىلدامدىقتى ينتەرنەتكە قول جەتكىزىپ, ءبىلىم بەرۋدىڭ عانا ەمەس, مەديتسينانىڭ دامۋىنا دا مۇمكىندىك الىپ وتىر.
– جاڭا تەحنولوگيا سىمسىز, ياعني سپۋتنيك جۇيەسى ارقىلى ينتەرنەت تاراتادى. مۇنىڭ مۇمكىنشىلىگى زور. قوماقتى قارجى جۇمسالادى ەكەن دەگەن سۇراق تۋىنداۋى مۇمكىن. بىراق كادىمگى ءداستۇرلى ينتەرنەت تارتىلعانشا جاڭا جۇيە قىزمەتىن اتقارا تۇرادى. قارجىلاندىرۋ ماسەلەسى وبلىس بيۋدجەتىنەن جۇزەگە اسادى, – دەيدى وبلىستىق اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسى باسشىسىنىڭ ورىنباسارى مەيىرجان جۇماحانوۆ.
قازىردىڭ وزىندە ايماعىمىزداعى 106 مەكتەپتىڭ 42-ءسى «Starlink» ينتەرنەتىنە قوسىلىپ ۇلگەردى. قالعان 64 مەكتەپتى شىلدە ايىنىڭ سوڭىنا دەيىن قوسىپ بىتەمىز دەيدى جاۋاپتىلار.
ال اي سايىنعى ابونەنتتىك تولەمىنە كەلەتىن بولساق, ءبىر مەكتەپ ءۇشىن 149 774 تەڭگەنى قۇرايدى. جىلىنا شامامەن 1 ملن 800 مىڭ تەڭگە شىعادى. بۇعان دەيىن كوكپەكتى اۋلىنىڭ مەكتەبى جىلدام ينتەرنەتتەن جۇرداي ەدى. بۇل ءبىلىم وشاعىندا 487 بالا ءبىلىم الادى. بۇعان دەيىن «قازاقتەلەكومنىڭ» سەكۋندىنا 8 مەگابيتتىك عالامتور جۇيەسىن پايدالانىپ كەلگەن. «Starlink» ورناتىلعاننان سوڭ مۇنداعى ينتەرنەتتىڭ جىلدامدىعى 10 ەسەگە وسكەن كورىنەدى.
– «Starlink» جۇيەسى بىزگە 25 مامىردا ورناتىلدى. مۇعالىمدەر مەن وقۋشىلار ريزا. مەكتەبىمىزدە 4 ينفورماتيكا كابينەتى, وندا 100 كومپيۋتەر بار. بۇرىنعى ينتەرنەتىمىزدىڭ جىلدامدىعى وتە تومەن ەدى. بارلىق كومپيۋتەردى بىردەن پايدالانۋ مۇمكىن بولمايتىن. ەندى, مىنە, ماسەلەمىز وڭىنان شەشىلدى. وقۋشىلارىمىزدىڭ باعاسىن ەلەكتروندى «Bilimal» جۋرنالى ارقىلى قويامىز. «BilimLand», «TopIQ» سىندى ەلەكتروندى قولدانبالاردى دا ءجيى پايدالانامىز. بۇدان بولەك, ۇلتتىق بىرىڭعاي دەرەكقور بار. وندا مەكتەپتىڭ بارلىق كەرەك مالىمەتى جۇكتەلەدى. زاماننىڭ دامىعان ۋاعىندا كەز كەلگەن وقۋشى ينتەراكتيۆتى نەگىزدە ءبىلىم العىسى كەلەدى. اسىرەسە اۋىل بالالارى. سول سەبەپتى, وسىنداي يگى ىسكە اتسالىسقان بارلىق قۇزىرلى ورگانعا العىسىمىزدى ايتامىز. جاڭا وقۋ جىلىندا جاڭا ينتەرنەت جۇيەسىمەن وقۋشىلارىمىزعا ساپالى ءبىلىم, سانالى تاربيە بەرەمىز, – دەيدى كوكپەكتى جالپى ءبىلىم بەرۋ مەكتەبىنىڭ ديرەكتورى گاۋحارتاس جايمينا.
وزىق جوبا ويداعىداي اياقتالسا, وندا 8,5 مىڭعا جۋىق وقۋشى جىلدامدىعى جوعارى عالامتور جەلىسىنە قول جەتكىزىپ, ءبىلىمىن تەرەڭدەتە الادى.
جوعارىدا ايتا وتكەنىمىزدەي, بۇل جاڭا تەحنولوگيا ەلدى مەكەندەرگە تالشىقتى-وپتيكالىق بايلانىس جەلىلەرى تولىعىمەن جەتكىزىلگەنگە دەيىن قىزمەت اتقارادى. «قولجەتىمدى ينتەرنەت» ۇلتتىق جوباسى اياسىندا 2027 جىلدىڭ سوڭىنا دەيىن وبلىستىڭ 164 ەلدى مەكەنىنە تالشىقتى-وپتيكالىق بايلانىس جەلىلەرىن تارتۋ كوزدەلگەن.
قاراعاندى وبلىسى
