«جاسىل ەل» ەڭبەك جاساعىنىڭ 100-گە جۋىق مۇشەسى سۋقويماسى مەن وزەن جاعالاۋلارىنان 150 توننا قوقىس جيناپ, قالالىق پوليگونعا اپارىپ توكتى. مۇنىمەن ءبىر كەزدە ەڭبەك جاساعىنىڭ ءبىر توپ مۇشەسى قالاداعى «عاشىقتار اللەياسىن» تازارتىپ, وسى جەردەن 40 توننا قوقىس شىعاردى.
ءۇش وزەننىڭ بويىندا بىرنەشە قوعامدىق جاعاجاي بار. بۇل جەرلەرگە سۋعا تۇسۋگە كەلگەن اعايىن تاماق قالدىقتارىن, پلاستيك قۇتىلاردى تاستاپ كەتەدى. جازداي, قىستاي جينالعان تۇرمىستىق قالدىقتار كوكتەمدە سۋ كەلگەندە توڭىرەكتى تۇگەل لاستايدى. ونىڭ ۇستىنە, بيىلعى سۋ تاسقىنىنان كەيىن تال-تەرەكتىڭ اراسى قۋراعان شوپتەر مەن سىنعان بۇتاقتارعا تولىپ قالدى. قۋراعان ءشوپ پەن قوقىس كۇن ىسىعاندا ءورتتىڭ شىعۋىنا سەبەپشى.
«جاسىل ەل» جاستار ەڭبەك جاساقتارى وبلىستىق شتابى جانە «اتامەكەن» ستۋدەنتتىك وتريادتار بىرلەستىگىنىڭ توراعاسى نۇرجان شاڭعىتباەۆتىڭ ايتۋىنشا, بيىل «جاسىل ەل» جاساعىنا 1860 جاستى جۇمىسپەن قامتۋ جوسپارلانىپ وتىر. ولار اباتتاندىرۋ, كوگالداندىرۋ جانە قۇرىلىس وتريادتارىندا ءبىر اي ەڭبەك ەتىپ, 130-160 مىڭ تەڭگە ارالىعىندا جالاقى الادى.
«سۋ تاسقىنىنا بايلانىستى بيىل جۇمىستى ەرتە باستادىق. ەڭبەك جاساعىنا ءساۋىر ايىندا وبلىس ورتالىعىنان 38 جۇمىسسىز جاس تارتىلىپ, ولار تاسقىننان زارداپ شەككەن زەينەتكەرلەر ۇيلەرىن تازارتۋعا كومەكتەستى. ءۇش ايدان بەرى «تازا قالا», «تازا جاعالاۋ» اكتسياسى اياسىندا قالا كوشەلەرى, وزەن جاعالاۋلارى, قاراۋسىز قالعان قوعامدىق جاعاجايلاردى تازارتۋ جۇمىستارى بەلسەندى جۇرگىزىلىپ جاتىر. ەڭبەك جاساعى مۇشەلەرىنىڭ تاعى ءبىر توبى قازىرگى ۋاقىتتا كوشەتتەردى كۇتىپ-باپتايدى جانە كوگالداندىرۋ جۇمىستارىمەن اينالىسادى. ءساۋىر, مامىر, ناۋرىز ايلارىندا «جاسىل ەلدە» 918 جاس جۇمىس ىستەسە, شىلدە ايىندا 596 بالا قابىلدانادى.
ەڭبەك جاساعىندا اباتتاندىرۋ, كوگالداندىرۋ جانە قۇرىلىس سالاسى بويىنشا بىرنەشە شاعىن جاساق قۇرىلدى. كوگالداندىرۋ جۇمىستارىنا تارتىلعاندار ورمان شارۋاشىلىعى مەكەمەلەرىنە قاراستى تالىمباقتاردا جۇمىس ىستەپ, 130 مىڭ تەڭگە جالاقى الادى. اباتتاندىرۋ باعىتى تازالىق جۇمىستارىن قامتيدى. سەنبىلىككە بەلسەندى شىعىپ جاتقان وسى جاساق قۇرامىنداعى بالالار. بۇل جەردە ەڭبەك ەتەتىندەر 150 مىڭ تەڭگە جالاقى السا, قۇرىلىس جۇمىستارىنا تارتىلعاندار 160 مىڭ تەڭگە الادى. بىراق قۇرىلىسقا 18 جاستان اسقانداردى الامىز», دەيدى «جاسىل ەل» جاستار ەڭبەك جاساقتارى وبلىستىق شتاب جەتەكشىسى نۇرجان شاڭعىتباەۆ.
«جاسىل ەل» جاساعىنا 16-35 جاس اراسىنداعى كەز كەلگەن ادام مۇشە بولا الادى. ونىڭ قۇرامىندا مەكتەپتىڭ جوعارى سىنىپ وقۋشىلارى, جۇمىسسىز جاستار, جوو جانە ورتا ارناۋلى كاسىپتىك وقۋ ورىندارى ستۋدەنتتەرى بار. ءبىر ەرەكشەلىگى, ءبىر بالا ءبىر اي عانا ەڭبەك ەتەدى. «جاسىل ەل» قاتارىنا جازىلعىسى كەلەتىن بالالار سانى وتە كوپ بولعاندىقتان, ەڭبەك ەتكىسى كەلگەن بار بالاعا مۇمكىندىك بەرۋ كەرەك.
بۇگىندە سۋ تاسقىنىنان زارداپ شەككەن تۇرعىندارعا ايتەكە بي, ويىل, قوبدا, تەمىر اۋداندارىندا باسپانا قۇرىلىستارى باستالدى. «جاسىل ەل» جاساعىنىڭ ءبىر بريگاداسى قازىر ويىل اۋدانىنداعى قۇرىلىستا ءجۇر. وبلىس ورتالىعىندا ۇيلەرىن سۋ باسقان تۇرعىندار ءۇشىن ازىرشە قۇرىلىس باستالعان جوق. ەگەر قۇرىلىس قازىعى قادالسا, كومەككە «جاسىل ەل» ەڭبەك جاساعىنىڭ ءبىر بريگاداسى ءازىر تۇر.
«تازا قازاقستان» رەسپۋبليكالىق اكتسياسى اياسىندا ەلىمىزدە ءوتىپ جاتقان سەنبىلىكتەرگە اقتوبە وبلىسىنىڭ اۋىل تۇرعىندارى وسىلايشا بەلسەندى قاتىسىپ جاتىر. وتكەن سەنبىلىككە ءبىر مەزگىلدە مىڭنان استام اقتوبەلىكتىڭ شىعۋى تۋعان جەرىنىڭ تابيعاتىنا بەيجاي قارامايتىنداردىڭ كوپ ەكەندىگىن كورسەتەدى. ايتا كەتەرلىك ءبىر ماسەلە – ادامدارىمىز قوقىستى كوشەگە تاستاماۋ مادەنيەتىن بويلارىنا سىڭىرسە, ءار اپتا سايىن قالادان دا, دالادان دا توننا-توننا قوقىس شىقپاس ەدى.
اقتوبە وبلىسى
