«مۋزەي قىزمەتكەرى ا.پوپوۆ قاسيەتتى كىتاپشانى شامامەن 1950–1960 جىلدار ارالىعىندا قورعا وتكىزگەن ەكەن. ءبىر قىزىعى, مەتالدان جاسالعان قوراپشاعا سالىنعان جيناق ىشىندەگى قۇران اياتتارى اراب تىلىندە قولمەن جازىلعان. قاسيەتتى كىتاپ سالىنعان قوراپشانىڭ ءتۇسى اقشىل-سارى. ونىڭ بەتى ءتۇرلى وسىمدىككە ۇقساس ويۋ-ورنەكپەن بەزەندىرىلگەن», دەيدى وبلىستىق تاريحي-ولكەتانۋ مۋزەيى زەرتتەۋ جۇمىستارىن قامتاماسىز ەتۋ ءبولىمىنىڭ مەڭگەرۋشىسى لاۋرا بايتۇرسىنوۆا.
ءبىر قىزىعى, وڭىردەگى مۋزەيلەردىڭ ءبىرازىندا كونە زاماننان جەتكەن قۇران كىتاپتارى ساقتالعان. تۇرعىنداردىڭ قولىمەن تابىستالعان قاسيەتتى كىتاپتاردىڭ وزىنە ءتان تاريحى دا بار. ال وبلىستىق تاريحي-ولكەتانۋ مۋزەيى قورىندا ساقتالعان بۇل جيناق كولەمىنىڭ شاعىن بولۋىمەن ەرەكشەلەنىپ تۇر.
«وسى كىتاپتى تابىستاعان ا.پوپوۆ ۋاقىتىندا وبلىستىق-تاريحي ولكەتانۋ مۋزەيىندە قىزمەت ەتكەن ەكەن. دەرەككە جۇگىنسەك, قاسيەتتى كىتاپ ا.پوپوۆتىڭ دوسىنا تيەسىلى بولعان. دوسى ومىردەن وتكەننەن كەيىن قۇران اياتتارى جازىلعان شاعىن جيناق مۋزەي قىزمەتكەرىنىڭ قولىنا تۇسكەن. ول بۇل قۇندىلىقتى مۋزەي قورىنا تابىستاۋ تۋرالى شەشىم قابىلداعان», دەيدى مۋزەي قىزمەتكەرى.
«قۇران-تۇمار» دەپ اتالاتىن جادىگەر سىرتىنداعى مەتالدان جاسالعان قوراپشا ايتارلىقتاي كونەرگەنى بايقالىپ تۇر. سىرتقى بۇيىمنىڭ قاي جىلى نەمەسە قاي عاسىردا جاسالعانىن ناقتى ايتۋ قيىن. ايتسە دە, ماماندار مەتالدىڭ ايتارلىقتاي ەسكىرگەنىن ەسكەرىپ, «قۇران-تۇمار» جادىگەرىنىڭ كەم دەگەندە ءبىر عاسىر بۇرىن جاسالعانىن العا تارتىپ وتىر.
تاراز
