اقتوبەدە ءاليا مولداعۇلوۆانى ەسكە الۋ شاراسى ءوتتى

اقتوبە. 16 قاڭتار. ۇستىمىزدەگى جىلعى 14 قاڭتاردا كەڭەس وداعىنىڭ باتىرى  اليا مولداعۇلوۆانىڭ ەرلىكپەن قازا تاپقانىنا 71 جىل تولدى. وبلىستىق ءبىلىم باسقارماسىنىڭ ۇيىمداستىرۋىمەن جاستاردى وتاندى سۇيۋگە شاقىرۋ, قان مايداندا قازا تاپقان ەرلەردى ەسكە الۋ ماقساتىندا «ماڭگىلىك الاۋ» جانىندا «ەسكە الۋ شىراعى» اكتسياسى ءوتتى. بۇل تۋرالى egemen.kz حابارلادى. شاراعا  ەسەت باتىر اتىنداعى مەكتەپتىڭ تۇلەكتەرى, «سارباز» پاتريوتتىق كلۋبى, «جاس ۇشقىش» مەكتەبى مەن قالالىق «جاس ۇلان» بالالار مەن جاسوسپىرىمدەر ۇيىمىنىڭ مۇشەلەرى قاتىستى. ولار ماڭگىلىك الاۋ جانىنداعى اعاشتان ويىپ جاسالعان 71 سانىنا 71 شىراق جاعىپ, باتىر رۋحىنا تاعزىم ەتتى. «ءاليا مولداعۇلوۆا اسقان ەرلىگىمەن وتانعا, تۋعان جەرگە دەگەن سۇيىسپەنشىلىكتىڭ بيىك ولشەمىن كورسەتتى. 19 جاسىندا قىرشىن كەتكەن قاھارمان قىزدىڭ  ەرلىگى وسكەلەڭ ۇرپاققا ۇلگى. بۇگىن 71 شىراق جاعىپ, باتىر رۋحىنا باس ءيىپ, قازاقتىڭ باتىر قىزىن قۇرمەتتەپ ەسكە الدىق», – دەيدى «قوس شىنار» قايىرىمدىلىق قورى» قوعامدىق بىرلەستىگىنىڭ توراعاسى عالىمجان بايدەربەس. سول كۇنى وسى شارانىڭ جالعاسى رەتىندە №27 مەكتەپ-ليتسەيىنىڭ اكت زالىندا كەڭەس وداعىنىڭ باتىرى ءاليا مولداعۇلوۆانى ەسكە الۋ جانە ءاليا-مانشۇك اتىنداعى «قوس شىنار» قوعامدىق بىرلەستىگىنىڭ 15 جىلدىعىن اتاپ وتۋگە ارنالعان كەش ءوتتى. شارادا «قوس شىنار» قوعامدىق بىرلەستىگى تۋرالى بەينەبايان كورسەتىلدى. كەڭەس وداعىنىڭ باتىرلارى ءاليا مولداعۇلوۆا مەن مانشۇك مامەتوۆانىڭ ەرلىك جولدارىن زەرتتەپ,  ۇرپاققا ۇلاعاتتاپ جۇرگەن بۇل قور قازاقتىڭ قاھارمان قىزدارىنىڭ باتىرلىعىن حالىقتىڭ جادىندا جاڭعىرتىپ وتىرۋ باعىتىندا كوپ شارۋا تىندىردى. كەشتە ءسوز العان بىرلەستىك توراعاسى عالىمجان بايدەربەس شىعىستىڭ قوس شىنارى ءاليا مەن مانشۇكتىڭ  تاعدىرلاس ەكەنىن, ەكەۋىنىڭ اتا-انادان ەرتە جەتىم قالعانىن, مايدانعا ءوز ەرىكتەرىمەن سۇرانىپ اتتانعانىن, قان مايداندا قاھارماندىقتىڭ ەرەن ۇدگىسىن كورسەتىپ, كەڭەس وداعىنىڭ باتىرلارى اتانعانىن, ەكەۋىنىڭ دە ورىس جەرىندە, ءاليا نوۆوسوكولنيكيدە, مانشۇك نەۆەلدە قازا بولىپ, ماڭگىلىككە تىنىستاعانىن جەتكىزدى. شارانىڭ وسى مەكتەپ-ليتسەيدە وتكىزىلۋىنىڭ دە رەتى بار ەكەن. قاشاندا قازاقتىڭ قاھارمان قىزدارىنىڭ باتىرلىعىن ناسيحاتتاۋعا كۇش-جىگەرىن جۇمساپ جۇرگەن ءالياتانۋشى عالىمجان بايدەربەس حالقىمىزدىڭ باتىر قىزدارىنىڭ ەرلىك جولىن بىرىكتىرە ۇلاعاتاۋدى ءجون كورىپ, وسى ءبىلىم وشاعىندا ءاليا مەن مانشۇكتىڭ مۋزەيىن ۇيىمداستىردى. قازىر مۋزەيدە باتىر اپالارىمىز تۋرالى ءبىر مىڭعا جۋىق ەكسپونات بار دەيدى ءوزى. باتىرلارعا قاتىستى ءىس-شارالار ۇدايى وتكىزىلىپ تۇرادى. كەشتە ۇلى وتان سوعىسىنىڭ ارداگەرى الەكسەي پەتروۆ سۇراپىل سوعىستىڭ اۋىرتپالىعىن ايتا كەلىپ, ەلىمىزگە تىنىشتىق تىلەدى, ەلباسىنىڭ مايدانگەرلەردى جاڭا جىلدىق قۇتتىقتاۋىنا ريزاشىلىعىن ءبىلدىردى. مەكتەپ-ليتسەيدىڭ ديرەكتورى ءداۋىر تولەمىسوۆ مۋزەيدىڭ جاس ۇرپاققا پاتريوتتىق تاربيە بەرۋدىڭ ورتالىعىنا اينالىپ وتىرعانىن تىلگە تيەك ەتتى. كەشتە ءسوز العاندار ءاليا مەن مانشۇكتىڭ ەرلىگى كەيىنگى تولقىن جاستارعا ۇلگى بولاتىنىن, حالقىمىز باتىر قىزدارىن ەشقاشان ەستەن شىعارمايتىنىن ايتى. كەشتە وبلىستىق باسقارمالار مەن قوعامدىق ۇيىمدار وكىلدەرى بىرلەستىكتى 15 جىلدعىمەن قۇتتىقتاپ, سىي-سياپاتتارىن جاسادى. شارا بارىسىندا جەرگىلىكتى ونەرپازدار ءان شىرقاپ, بي بيلەدى. ساتىبالدى ءساۋىرباي. دەرەك: egemen.kz. سۋرەت: inform.kz.