فوتو: okg.kz
مەملەكەت باسشىسى ەل اينالاسىندا ءونىم وتكىزەتىن وتە ۇلكەن نارىقتار بار ەكەنىن, وندا ساپالى ازىق-ت ۇلىك ونىمدەرى تاپشى بولىپ تۇرعانىن ايتقان ەدى. بۇل ورايدا پرەزيدەنت الداعى ءۇش جىل ىشىندە اگروونەركاسىپتەگى وڭدەلگەن ءونىم ۇلەسىن 70 پايىزعا جەتكىزۋ مىندەتىن جۇكتەدى. كەرەكۋلىك فەرمەرلەر اتالعان ماقسات ۇدەسىنەن شىعۋ ءۇشىن كارتوپ وڭدەۋ ىسىنە باسىمدىق بەرىپ وتىر. بۇل ءۇشىن ەڭ اۋەلى وڭىردە كارتوپ قىتىرلاعىن شىعاراتىن زاۋىت تۇرعىزۋ جوسپارلاندى. باستامانى جەرگىلىكتى كومپانيالاردىڭ ءبىرى قولعا الماقشى. كاسىپورىن ىسكە قوسىلسا, جىلىنا 20 مىڭ تونناعا دەيىن كارتوپ قىتىرلاعىن شىعارۋعا بولادى.
«زاۋىت 2025 جىلى اقسۋ قالاسىندا اشىلۋى كەرەك. جوبانى «Chips Asia» جشس جۇزەگە اسىرادى. قازىر جەر تەلىمى رەسىمدەلگەن, تەحنيكالىق شارتتاردى الۋ بويىنشا جۇمىستار ءجۇرىپ جاتىر. ءىرى كارتوپ وسىرۋشىلەردىڭ ءبىرى «اقتوعاي-اگرو» جشس بىلتىر ەكسپەريمەنت رەتىندە قىتىرلاق وندىرۋگە ارنالعان كارتوپتىڭ «فونتانە» سورتىن 500 گەكتارعا ەگىپ, 9 مىڭ تونناداي ءونىم جينادى. «اقتوعاي- اگرو» – «Chips Asia» كومپانياسى قۇرىلتايشىلارىنىڭ ءبىرى. سوندىقتان بۇل جوبا ۋاقىتىندا جۇزەگە اسادى دەگەن ويدامىز», دەيدى وڭىرلىك اۋىل شارۋاشىلىعى باسقارماسى باسشىسىنىڭ ورىنباسارى ساۋلە شۇكىروۆا.
اتاپ وتەيىك, بىلتىر كۇزدە كەرەكۋلىك كارتوپ وسىرۋشىلەر تىعىرىققا تىرەلدى. فەرمەرلەر 806,4 مىڭ توننا «ەكىنشى نان» جيناپ الدىڭعى جىلعى رەكوردتى بىردەن 133 مىڭ تونناعا جاڭارتقان ەدى. الايدا الا جازداي باپتاپ وسىرگەن جەر ىرىسىن جىلداعىداي كورشىلەس ەلدەرگە توننالاپ ساتىپ الماي قالدى. رەسەيدە كيلوگرامى 25 تەڭگەدەن ساتىلسا, ىشكى نارىقتاعى كوتەرمە باعا كيلوگرامىنا 58-65 تەڭگەدەن بولعانى ءمالىم. مۇنداي ءتيىمسىز باعا كوپتەگەن شارۋاشىلىقتىڭ شىعىنىن جابۋعا مۇمكىندىك بەرمەي, سالدارىنان كەي فەرمەرلەر زور شىعىنعا ۇشىرادى. ايماقتا كارتوپ وسىرۋمەن 142 شارۋاشىلىق شۇعىلدانسا, ونىڭ 96-سى – ءىرى فەرمەرلىك شارۋاشىلىقتار. وبلىستا جالپى سىيىمدىلىعى 495 مىڭ توننانى قۇرايتىن 149 كوكونىس ساقتايتىن قويما بولسا, ونىڭ ىشىندە 455 مىڭ توننا ءونىمدى زاماناۋي جابدىقتالعان قويمالاردا ساقتاۋدىڭ مۇمكىندىگى بار. چەرنوياركا القابىندا 1-2 گەكتاردان كارتوپ سالاتىندار دا بار. مۇنداي ۇساق شارۋا قوجالىقتارى ءۇشىن ءوز ونىمدەرىن ساتۋدا بيىل دا قيىندىقتار تۋىنداۋى مۇمكىن دەپ بولجاپ وتىر ماماندار.
اۋىل شارۋاشىلىعى باسقارماسى قايتا وڭدەۋدى جانە كووپەراتسيانى دامىتۋ ءبولىمىنىڭ باس مامانى تاتيانا ناگۋلا وبلىس تۇرعىندارى جىلىنا نەبارى 75,5 مىڭ توننا كارتوپ تۇتىناتىنىن ايتادى. ال بىلتىر جينالعان كارتوپ بۇل سۇرانىستان 12 ەسە اسىپ تۇسكەن. بيىل ەرتىس-بايان وڭىرىندە جالپى قۇنى 50 ملرد تەڭگەدەن اساتىن 35 ينۆەستيتسيالىق جوبا جۇزەگە اسىپ جاتىر. جىل سوڭىنا دەيىن 90 مىڭ توننا ءونىم سىياتىن 10 كوكونىس ساقتاۋ قويماسى اشىلادى دەپ جوسپارلانعان.
پاۆلودار وبلىسى
