وقۋ جىلىنىڭ سوڭىنا قاراي وزا شاپقان دارىندارعا قۇرمەت كورسەتىلدى. پاۆلودار وبلىسىنىڭ اكىمى اسايىن بايحانوۆ دارىندى بالالارمەن, حالىقارالىق, رەسپۋبليكالىق وليمپيادالاردىڭ جەڭىمپازدارىمەن جانە جۇلدەگەرلەرمەن كەزدەسىپ, جەتىستىكتەرىمەن قۇتتىقتادى.
«سىزدەردىڭ حالىقارالىق جانە رەسپۋبليكالىق دەڭگەيدەگى زياتكەرلىك وليمپيادالاردا جەتكەن جەتىستىكتەرىڭىزدىڭ ناتيجەسىندە وبلىسىمىزدىڭ ءبىلىم جۇيەسى جوعارى باعالانادى. كەرەمەت دايىندىق دەڭگەيىن كورسەتتىڭىزدەر. ءبىز سىزدەردى ەرتىستىڭ, پاۆلودار ءوڭىرىنىڭ پاتريوتتارى رەتىندە كورگىمىز كەلەدى», دەدى ءوڭىر باسشىسى.
وليمپيادا جەڭىمپازدارى مەن جۇلدەگەرلەرىنە العىسحاتتار مەن 100 مىڭ تەڭگەلىك سەرتيفيكات تابىس ەتىلدى. سونداي-اق مەكتەپ ۇستازدارىنا وقۋشىلاردى دايارلاعانى, تاربيە بەرگەندەرى, اتا-انالاردى قولداعانى ءۇشىن العىس ايتىلدى.
رەسپۋبليكالىق جانە حالىقارالىق وليمپيادالاردىڭ جەڭىمپازدارىن دايارلاعان ۇستازدارعا اقشالاي سىيلىق تاعايىندالدى. بيىل 45 ۇستاز اتالعان سىيلىقتىڭ يەگەرى اتاندى. ولاردىڭ ىشىندە دارىندى بالالارعا ارنالعان №8 مەكتەپ-ليتسەيىنىڭ فيزيكا مۇعالىمى اناتولي بيليدا مەن ماتەماتيكا مۇعالىمى ليليا ستادنيكوۆا, دارىندى بالالارعا ارنالعان №3 گيمنازيانىڭ فرانتسۋز ءتىلى مۇعالىمى قىمبات باتاەۆا بار.
پاۆلودار وبلىسى
