ءىس-شاراعا قورعانىس مينيسترلىگىنىڭ, ۇلتتىق قاۋىپسىزدىك كوميتەتىنىڭ, ىشكى ىستەر مينيسترلىگىنىڭ, توتەنشە جاعدايلار مينيسترلىگىنىڭ باسشىلىعى, اسكەري وقۋ ورىندارىنىڭ باسشىلىق قۇرامى, قارۋلى كۇشتەردىڭ ارداگەرلەرى, كۋرسانتتار مەن تۇلەكتەردىڭ تۋىستارى قاتىستى. ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ تۇلەكتەرى باۋىرجان الپىسباەۆ پەن ءيمانجۇسىپ اسىلبەكوۆ, راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ تۇلەكتەرى بەكجان دايىرباي مەن دياس ومار پرەزيدەنت قاسىم-جومارت توقاەۆتىڭ قولىنان وفيتسەرلىك پوگونداردى الۋ مۇمكىندىگىنە يە بولدى.
– اسكەري ينستيتۋتتان «ينجەنەرلىك قامتاماسىز ەتۋ» باعدارلاماسى بويىنشا ءبىلىم الدىم. ۋاقىت تەز ءوتىپ كەتتى. ەندى قىزمەتتىڭ جاڭا كەزەڭى باستالادى. لەيتەنانتتىق پوگوندى قارۋلى كۇشتەردىڭ جوعارعى باس قولباسشىسىنىڭ قولىنان الۋدىڭ جاۋاپكەرشىلىگى جوعارى. ماعان كورسەتىلگەن بۇل سەنىمدى اقتاۋعا تىرىسامىن, – دەدى تۇلەك ي.اسىلبەكوۆ.
ايتا كەتۋ كەرەك, پوگونداردى سالتاناتتى تۇردە تاپسىرۋ راسىمىنە ۇزدىكتەردىڭ ۇزدىكتەرى كەلدى. ولاردىڭ اراسىندا حالىقارالىق پاندىك وليمپيادالاردىڭ جۇلدەگەرلەرى, سپورت شەبەرلەرى
بار.
قورعانىس ءمينيسترى, گەنەرال-پولكوۆنيك رۋسلان جاقسىلىقوۆ وقۋ ۇزدىكتەرى, قۇرلىق اسكەرلەرى اسكەري ينستيتۋتىنىڭ تۇلەكتەرى دانيار عابيدەن مەن تيمۋر قازيسوۆكە, راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ تۇلەكتەرى الماز دۇيسەنباەۆ پەن قانات مۇراتوۆقا لەيتەنانت پوگوندارىن تاپسىردى.
– «اسكەري ىستەگى كيبەرقاۋىپسىزدىك» ماماندىعىن الدىم. وقۋ بارىسىندا باعدارلامالاۋدى مەڭگەردىم. بيىل تمد ەلدەرى اراسىندا اقپاراتتانۋدان وتكەن حالىقارالىق وليمپياداعا قاتىسۋ ءبىز ءۇشىن ماڭىزدى وقيعا بولدى. وندا جۇلدەلى ورىنعا يە بولدىق. ارينە, مەن لەيتەنانت پوگونىن قورعانىس ءمينيسترىنىڭ قولىنان العانىما قۋانىشتىمىن. بۇل – ۇلكەن سەنىم. سول سەنىمدى اقتاۋعا تىرىسىپ, ادال قىزمەت ەتەمىن, – دەدى لەيتەنانت ا. دۇيسەنباەۆ.
سونىمەن بىرگە قورعانىس ءمينيسترى ش. ءۋاليحانوۆ اتىنداعى اسكەري كوللەدجدىڭ تۇلەكتەرى الىشەر وتەلباەۆ پەن بەگلان تەمىرحانعا, ارميا گەنەرالى س.نۇرماعامبەتوۆ اتىنداعى اسكەري كوللەدجدىڭ تۇلەكتەرى ماقسات ازىقانوۆ پەن نۇربول جۇمابايعا دا كىشى سەرجانت پوگوندارىن تابىس ەتتى.
گەنەرال-پولكوۆنيك رۋسلان جاقسىلىقوۆ تۇلەكتەردى تاريحي وقيعامەن قۇتتىقتاپ, وتانىنا ادال قىزمەت ەتۋگە تىلەك ءبىلدىردى.
