فوتو: t.me/tipavlo
پاۆلودار وبلىسى پوليتسيا دەپارتامەنتى جەرگىلىكتى پوليتسيا قىزمەتىنىڭ باستىعى قۋانىش مۇستافينوۆ حابارلاعانداي, پاۆلودار-اقسۋ اۆتوجولىندا 15 جاستاعى ەكى ءجاسوسپىرىم مىنگەن سكۋتەر «كاماز»-عا سوعىلعان.
«اپات سالدارىنان تەحنيكا رۋلىندە وتىرعان بالا سول جەردە ءتىل تارتپاي كەتكەن. ال ەكىنشىسى جەدەل جاردەم كولىگىمەن پاۆلودار قالاسىنداعى №1 اۋرۋحاناعا جەتكىزىلگەن. الايدا العان جاراقاتى اۋىر بولىپ, اۋرۋحانادا كوز جۇمدى», دەپ مالىمدەدى پوليتسيادان. وبلىستىق جەدەل جاردەم ستانساسىنىڭ وكىلدەرى كولىك اپاتى جولدىڭ قاراباي اۋىلى اۋماعىندا بولعانىن ايتادى.
ەكى جەدەل جاردەم بريگاداسى جۇمىلدىرىلىپ, ولار وقيعا ورنىنا 9 مينۋتتا جەتكەن. وكىنىشكە قاراي, مەديتسينا قىزمەتكەرلەرى ەكى ءجاسوسپىرىمنىڭ دە ءومىرىن ساقتاپ قالا المادى.
اتالعان وقيعا بويىنشا پوليتسيا قىلمىستىق ءىس قوزعادى. جول-كولىك اپاتىنىڭ سەبەپ-سالدارى ءجىتى تەكسەرىلىپ, سوت-مەديتسينالىق ساراپتاما تاعايىندالدى.
جالپى, جىل باسىنان ەرتىس-بايان وڭىرىندە جول اپاتىنان 3 بالا قازا تاپقان. تاعى 41 ءجاسوسپىرىم اپات سالدارىنان جاراقات العان. ال بالالاردىڭ قاتىسۋىمەن جالپى سانى 36 جول-كولىك وقيعاسى تىركەلگەن. ءتارتىپ ساقشىلارى جازعى دەمالىس كەزەڭىندە ەرەسەكتەردەن بالالاردىڭ قاۋىپسىزدىگىن تۇراقتى نازاردا ۇستاۋدى سۇراپ وتىر. وقيعالاردىڭ 70 پايىزىندا جاياۋ جۇرگىنشىلەر كىنالى بولادى ەكەن. سوڭعى ۋاقىتتا رۋلىندە جاسوسپىرىمدەر وتىرعان موتوتسيكلدەردىڭ, سكۋتەرلەردىڭ قاتىسۋىمەن كەلەڭسىز وقيعالار جيىلەپ كەتكەن.
«بالالار ءوز ەموتسيالارىن باسقارا المايدى, درايۆقا كوبىرەك سۇيەنەدى, جىلدامدىق رەجىمىن ساقتاي المايدى. ال مۇنىڭ سوڭى اۋىر زارداپتارعا اكەلەدى», دەيدى پوليتسەيلەر.
پاۆلودار وبلىسى
