ۋنيۆەرسيتەتتىڭ «شاتتىق» اۋەسقوي جاستار تەاترى ساحنالاعان جاڭا قويىلىمنان كورەرمەن زوبالاڭ جىلداردىڭ قاسىرەتىن كورە الدى. اۋەسقوي تەاتر دەمەسەڭىز, ساحناعا الاساپىران قاسىرەتتىڭ تونگەنىن الىپ شىعۋىن, جالىنداعان ستۋدەنت جاستاردىڭ جانارىنان سول كەزەڭگە ەنگەنىن كورگەن كوپشىلىك قوشەمەتپەن باعالادى. اقىننىڭ پوەماداعى «قاراعاندى لاگەرى», «قارلاگ قاقپاسى», «ماموچكينا مولاسى», «قىزجىلاعان», «گەنەرالدىڭ قىزى», «تاس پەن اس», «گارمونشى» سىندى ءار ءبولىمىن اسەرمەن جەتكىزە ءبىلدى. مۇندا قويىلىمنىڭ رەجيسسەرى ءارى جەتەكشىسى رەتىندە ەڭبەك ەتكەن س.سەيفۋللين اتىنداعى قاراعاندى وبلىستىق اكادەميالىق قازاق دراما تەاترىنىڭ اكتەرى احاي جۇمامۇراتوۆتىڭ كاسىبي شەبەرلىگىن, كادەلى ەڭبەگىن ايتا كەتكەنىمىز ءجون.
«ۋنيۆەرسيتەتتىڭ باسقارما توراعاسى-رەكتورى نۇرلان ورىنباسار ۇلى «قارا ورامال» پوەماسىن ساحناعا الىپ شىقساڭ قايتەدى؟» دەپ ۇسىنىس بىلدىرگەن ەدى. تاريحي دۇنيەلەرگە ءوزىمنىڭ دە قىزىعۋشىلىعىم جوعارى. سودان پوەمانى قايتادان وقىپ شىعىپ, ءمان-ماڭىزىنا تەرەڭدەي ءتۇستىم. قويىلىمعا قاتىساتىن ءار ستۋدەنتكە دە ءتۇسىنىپ وقىڭدار دەپ تالاپ قويدىم. شىعارمانى بىرگە تالقىلادىق. سودان سوڭ كۇندەلىكتى تالداپ, وقىعان دۇنيەلەرىمىزگە وقيعا قوسا باستادىق. ودان كەيىن قارلاگ تۋرالى دەرەكتەر ىزدەپ, قويىلىم جەلىسىن سولارعا سۇيەنىپ, سايكەستەندىرىپ قۇراستىرىپ كوردىك. سپەكتاكل بارىسىندا قازاق دالاسىندا قارلاگتىڭ قۇرىلۋى, قازاقتىڭ اياعىنا تۇساۋ سالىنۋى سياقتى كورىنىستەر ورىن الدى», دەيدى رەجيسسەر.
رەجيسسەردىڭ تاعى ءبىر شەبەرلىگى, سپەكتاكلگە سول داۋىردە تۋعان اۋەندەردى پايدالانعان. اتاپ ايتساق, «كىسەن اشقان», «قوڭىر» كۇيلەرى, شاكارىمنىڭ «بۇل ءان بۇرىنعى اننەن وزگەرەك» ءانى سول زاماننىڭ كۇبىرىن جەتكىزدى.
ساكەن تەاترىنىڭ كوركەمدىك جەتەكشىسى ءارى باس رەجيسسەرى ايدىن سالبان قويىلىمنىڭ اسەرلى شىققانىن, ستۋدەنت اكتەرلەردىڭ وزدەرىنە بەكىتىلگەن بەينەلەردى شىنايى جەتكىزگەنىن ايتتى.
«كوپ جەردە كاسىپقوي تەاتر, اۋەسقوي تەاتر دەپ ءبولىپ قاراستىرىپ جاتادى. جالپى, ساحنادا ءومىر كورسەتىلەدى. وسى رەتتە ءومىردىڭ كاسىپقويى مەن اۋەسقويى بولا ما دەگەن سۇراق تۋىندايدى. بۇل جەردە دە ءومىر جاتىر. دەمەك جاستاردىڭ شىعارماشىلىق ۇجىمىن تەاتر دەپ اتاۋعا بولادى. ەندى عانا ءتاي-ءتاي باسايىن دەپ تۇرعان جاس تەاترعا ارقاشان قولداۋ كورسەتۋگە دايىنبىز. قويىلىم اسەرلى بولدى. وزىندىك ادەمى فورماسىن تاپقان. اسىرەسە ستۋدەنتتەردىڭ الپىس ەكى تامىرىن ءيدىرىپ, جۇيكە تالشىقتارىن شىمىرلاتىپ تۇرىپ جان دۇنيەسىمەن ءرولدى سومداۋى – ۇلكەن قۋانىش. تەاتر تىلىمەن ايتقاندا, ەشقانداي فالش جوق. جۇرەكتەن شىققان ءسوز جۇرەككە جەتەرى ءسوزسىز, جۇرەككە جەتتى. تەاترلارىڭىز كوپ جاساسىن!», دەپ ونەرلى ورەندەرگە ريزاشىلىعىن جەتكىزدى.
بۇعان دەيىن رەكتور نۇرلان دۋلاتبەكوۆتىڭ مۇرىندىق بولۋىمەن پوەما الەمنىڭ 16 تىلىنە اۋدارىلىپ, اكادەميك ە.بوكەتوۆ اتىنداعى قاراعاندى ۋنيۆەرسيتەتى باسپاسىنىڭ باسپاحاناسىندا جارىق كورگەن ەدى.
«ادامزاتتىڭ اردا ەمگەن
اسىلدارى,
ارىعانى,
اتىلىپ,
اسىلعانى...
قاراعاندى لاگەرى – قارا ورامال
جيىرماسىنشى
عاسىردىڭ باسىنداعى», – دەپ اياقتالادى ايگىلى شىعارما.
راس, سول ءداۋىردىڭ قاندى قىرعىنى, قاسىرەت-قايعىسى اقىننىڭ قالام قاسيەتىمەن تاعى ءبىر تاريحقا اينالدى. بۇل – وپا مەن جاپا شەككەندەردىڭ رۋحىنا جاسالعان ۇلى تاعزىم. ال پوەمانى سپەكتاكلگە اينالدىرۋ – تاريحي شىعارماعا كورسەتىلگەن ۇلكەن قۇرمەت.
قاراعاندى وبلىسى
