قىزىلوردادا جالعان اقشا جاساۋعا قارسى ءىس-ارەكەتتەر تالقىلاندى

استانا. 16 قاڭتار. قىزىلوردا وبلىسى بويىنشا كاسىپكەرلەر پالاتاسى مەن قىزىلوردا وبلىسى بويىنشا مەملەكەتتىك كىرىستەر دەپارتامەنتى ەكونوميكالىق تەرگەۋ قىزمەتىنىڭ ۇيىمداستىرۋىمەن «جالعان اقشا جاساۋ», وعان قارسى ءىس-ارەكەتتەر مەن پروبلەمالار, جويۋعا ۇسىنىستار» تاقىرىبىندا وبلىستىق پروكۋراتۋرا, ۇلتتىق بانك, ەكىنشى دەڭگەيدەگى بانك وكىلدەرى جانە كاسىپكەرلەردىڭ قاتىسۋىمەن بىرلەسكەن «دوڭگەلەك ۇستەل» ءوتتى. ەكونوميكالىق قىلمىستىڭ جالپى ۇلەسىندە جالعان اقشا جاساۋ فاكتىسى 15 %-دى قۇرايدى. وسى ورايدا, قىزىلوردا وبلىسى بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى عاني سەيتجان ۇلى ءوز سوزىندە ەكونوميكالىق تەرگەۋ قىزمەتى جالعان اقشا جاساۋ جانە ساقتاۋ, وتكىزۋ فاكتىلەرىنە قارسى ءىس-ارەكەت بويىنشا قىزىلوردا وبلىسىندا ورىن الىپ جاتقان جاعدايدى حابارلادى. اتالعان قىلمىستى ۋاقىتىلى اشۋ جانە كىنالىلەردى جازالاۋ ماسەلەسى بۇگىندە وزەكتى بولىپ وتىر. وتكەن جىلى جالعان اقشا جاساۋ فاكتىسى بويىنشا 10 قىلمىستىق ءىس تىركەلسە, بيىلعى جىلدىڭ قاڭتار ايىنىڭ وزىندە جالعان اقشا تابىلعان ەكى فاكتى بار. قىلمىستىڭ اتالعان ساناتىن انىقتاۋ كوبىنە كاسىپكەرلەر مەن بانك قىزمەتكەرلەرىنىڭ جالعان كۋپيۋرانىڭ تابىلعاندىعى تۋرالى ۋاقىتىلى حابارلانۋىنا, جالعان اقشا قاراجاتىن وتكىزگەن ءاربىر جەر بويىنشا قۇقىق قورعاۋ ورگاندارىنىڭ تەز ارادا ارەكەت ەتۋىنە بايلانىستى. «دوڭگەلەك ۇستەل» بارىسىندا شارانى ۇيىمداستىرۋشىلار جالعان اقشا جاساۋشىلىق سىندى تەرىس قىلىقتاردى تۇبىرىمەن جويۋدا بارلىق كۇشتى بىرىكتىرۋ قاجەتتىلىگىن ايتىپ, كاسىپكەرلەر مەن بانك قىزمەتكەرلەرىن ساۋدا كاسسالىق ەسەپتەۋ جۇرگىزۋ كەزىندە قولما-قول اقشا قاراجاتىن مەيلىنشە ازايتۋعا, عالامتور رەسۋرستارىن پايدالانۋعا شاقىردى. جولدىباي بازار. دەرەك, سۋرەت: قىزىلوردا وبلىسى كاسىپكەرلەر پالاتاسىنىڭ ءباسپاسوز قىزمەتى.