«نۇرا – بەرەكەلى اۋىل. ءبىز ءتورت ت ۇلىك ءوسىرىپ, باقشا سالىپ, ءوز ەڭبەگىمىزبەن كۇن كورىپ وتىرعان جاندارمىز. اتا-بابامىزدىڭ قونىسىن تاستاپ ەشقايدا كەتپەيمىز. اۋىلىمىزدى ساقتاپ قالعىمىز كەلگەنىمەن, مەكتەبى بولماسا, جۇرت بالاسىن وقىتۋ ءۇشىن جان-جاققا كوشىپ كەتەدى. اسىرەسە جاستار تۇرمايدى. مىنە, جاز باستالدى. بىراق قۇرىلىستىڭ قازىعى قاعىلىپ جاتقان جوق. ءۇيىمىز قاشان سالىنىپ بىتەدى؟ وسىعان الاڭداۋلىمىز. ءبىزدىڭ اۋىلعا جاڭا مەكتەپ كەرەك. بۇرىن سالىنعان جاڭا مەكتەبىمىز ساۋىردەن بەرى سۋ ورتاسىندا تۇر. ول ەندى پايداعا اسپايتىن قۇرىلىس. اۋىلدىڭ سىرتىنداعى بيىكتەۋ دوڭدەگى سارىوبادا جاڭا باسپانالار تۇرعىزىلادى دەپ ايتىلىپ جاتىر. نۇرانىڭ جۇرتى دا وسى جەردى قالاپ وتىر. بۇل جەرگە قانشا ءۇي سالىناتىنىن ناقتى كورسەتىپ, تۇرعىندارعا ەسەپ بەرسە دەيمىز», دەيدى ىرعىز اۋدانى نۇرا ەلدى مەكەنىنىڭ تۇرعىنى قايرات ايجارقىن ۇلى.
ەۆاكۋاتسيالىق ورتالىقتا تۇرىپ جاتقان ءۇش اۋىلدىڭ تۇرعىندارى نۇرا اۋىلىنىڭ قىر بەتىندەگى سارىوبادا سالىناتىن بولسا, قۇجات جۇزىندە شەشىم شىعارىپ, جەرىمىزدى ناقتى بەلگىلەسە, مامىر اۋىلىنا بوگەت سالىنسا دەگەن ءوتىنىش تالابىن ايتىپ وتىر. ونىمەن قوسا جۇرت جاڭا ۇيلەردىڭ گاز قوندىرعىسىمەن جابدىقتالعانىن سۇرايدى. ويتكەنى ونسىز دا ءۇيسىز قالىپ, دۇنيە-مۇلكىنەن ايرىلعان جۇرت قىستاي كومىر مەن وتىن ىزدەپ تاعى اۋرەلەنەدى. ولارعا گازبەن جىلىتىلاتىن ۇيلەردە تۇرۋ ىڭعايلى», دەگەن نۇرا اۋىلىنىڭ تۇرعىنى, ءۇيى سۋعا كەتكەن ق.ايجارقىن ۇلىنىڭ ساۋالىمەن ىرعىز اۋدانىنىڭ اكىمى نۇرلان قىزبەرگەنوۆكە حابارلاستىق. اۋدان باسشىسى ۇيلەرى سۋ استىندا قالعان نۇرا, مامىر, بەلشەر ەلدى مەكەنىنىڭ تۇرعىندارى ءۇشىن ىرعىز اۋدانىنىڭ ورتالىعىندا جاڭا ءۇي قۇرىلىسى سالىنا باستاعانىن ايتتى. نۇرا اۋىلىنىڭ قاسىنداعى سارىوبادا جەر بەلگىلەنىپ, جاقىن ارالىقتا قۇرىلىس باستالاتىنىن حابارلادى. سونداي-اق ۇيلەرى سۋعا كەتكەن اۋدان تۇرعىندارىنا بىرجولعى الەۋمەتتىك تولەمدەر تولىق تولەنىپتى.
وبلىس اكىمى ءباسپاسوز قىزمەتىنىڭ جەتەكشىسى گۇلباعدا كوبەەۆانىڭ حابارلاۋىنشا, ىرعىز اۋدانىنىڭ ورتالىعىنداعى ەۆاكۋاتسيالىق ورتالىقتا ءالى كۇنگە دەيىن ادامدار تۇرىپ جاتىر. ويتكەنى تاسقىن سۋدىڭ بەتى ءالى قايتپاعاندىقتان, نۇرادا سۋ باسقان ۇيلەردى باعالاۋ مۇمكىن بولماي تۇر. ال ىرعىز اۋدانى بويىنشا ۇيلەرى سۋعا كەتكەن ادامدارعا بىرجولعى الەۋمەتتىك تولەمدەر, مال شىعىنى تولەمدەرى بەرىلدى. ۇيلەردى باعالاۋ جۇمىستارى سۋ قايتقان سوڭ باستالماقشى.
ماۋسىم ايى تۋسا دا, تورعايدىڭ سۋى ءالى قايتقان جوق. تۇرعىندار كوكتەمدە سۋ بۇزىپ كەتكەن «نۇرا-ىرعىز» تاسجولىمەن قازىر اۋىر جۇك كولىكتەرى وتە الماي جاتقاندىعىن, ونى كوتەرۋگە وبلىس ورتالىعىنان قوسىمشا تەحنيكا جەتكىزىلۋىن سۇرايدى.
اقتوبە وبلىسى
