فوتو: «باتىس» وڭىرلىك قولباسشىلىعىنىڭ ءباسپاسوز قىزمەتى
وسىدان تۋرا سەگىز جىل بۇرىن ورىن العان قاندى وقيعا ءالى كۇنگە دەيىن ەسىمىزدە. 2016 جىلى 5 ماۋسىمدا ۇلتتىق ۇلان اسكەري قىزمەتشىلەرى جانىن بەرىپ, قاۋىپتىڭ الدىن الىپ قىلمىسكەرلەردىڭ ويى جۇزەگە اسپادى. وسىناۋ قارۋلى قارسىلاسپەن قاقتىعىس كەزىندە ۇلتتىق ۇلاننىڭ «باتىس» وڭىرلىك قولباسشىلىعىنا قاراستى اقتوبە قالاسىندا ورنالاسقان 6655 اسكەري ءبولىمىنىڭ ءۇش اسكەري قىزمەتشىسى مايور دانيەل مايلىباەۆ, كىشى سەرجانت بەرىكجان قاليەۆ, قاتارداعى جاۋىنگەر دوسبول ساپار اسكەري قالاشىققا شابۋىل جاساعان كەزدە باتىلدىق پەن جانقيارلىق تانىتىپ, وقيعا ورنىندا ەرلىكپەن قازا تاپقان بولاتىن. بۇگىندە اراعا سەگىز جىل سالىپ قازا تاپقان اسكەري قىزمەتشىلەردى ەسكە الۋ ءۇشىن ۇلتتىق ۇلان جاۋىنگەرلەرى, قوناقتار مەن اسكەري قىزمەتشىلەر ءبولىم اۋماعىندا ورناتىلعان مەموريالعا گۇل شوقتارىن قويدى, سونداي-اق قازا تاپقان ۇلاندىقتاردى ءبىر مينۋت ۇنسىزدىكپەن ەسكە الدى.
ال, اسكەري مىندەتىن ورىنداۋدا كورسەتكەن ەرەن ەرلىگى مەن قايتپاس قايسارلىقتارى ءۇشىن مايور دانيەل مايلىباەۆ ءىى دارەجەلى «ايبىن» وردەنىمەن (قايتىس بولعاننان كەيىن), كىشى سەرجانت بەرىكجان قاليەۆ (قايتىس بولعاننان كەيىن), قاتارداعى دوسبول ساپار (قايتىس بولعاننان كەيىن), قاتارداعى باقتيار قايىربەكوۆ ءىىى دارەجەلى «ايبىن» وردەنىمەن ناگرادتالسا, قاتارداعىلار سىرىم سۇندەتوۆ پەن دەنيس چەرنىشوۆ «جاۋىنگەرلىك ەرلىگى ءۇشىن» مەدالىمەن ناگرادتالعان بولاتىن.
