كەلىسىمگە سابين كلەر مەن ساتباەۆ ۋنيۆەرسيتەتىنىڭ حالىقارالىق ىنتىماقتاستىق جانە ستراتەگيالىق دامۋ جونىندەگى ءبىرىنشى پرورەكتورى سامعات ەرمەكباەۆ قول قويدى. وسى كەلىسىمگە سايكەس, ساتباەۆ ۋنيۆەرسيتەتىنىڭ ستۋدەنتتەرى ءۇشىنشى كۋرستى اياقتاعان سوڭ, پەنسيلۆانيا شتاتىنىڭ ۋنيۆەرسيتەتىندە وقۋلارىن جالعاستىرادى, ءسويتىپ بەس جىل وقۋ ىشىندە Penn State شتاتىنىڭ باكالاۆر جانە ماگيستر دارەجەسىن الىپ شىعادى. بۇل رەتتە مىنا ماماندىقتار بويىنشا مامانداندىرىلعان وقىتۋ باعدارلامالارىنا ەرەكشە نازار اۋدارىلادى: كيبەرقاۋىپسىزدىك, مۇناي ينجەنەرياسى, ماتەريالتانۋ جانە گەولوگيا.
«Penn State ءوز تاريحىندا العاش رەت ارىپتەستەرىنە مۇنداي وكىلدى دەلەگاتسيانى جىبەرىپ وتىرعانىن اتاپ وتكىم كەلەدى. ءبىز بىرگە ىسكە قوسقالى وتىرعان ءبىلىم بەرۋ باعدارلاماسى ساتباەۆ ۋنيۆەرسيتەتى ءۇشىن ارنايى ازىرلەنگەن جانە ءوز تۇرىندە وتە ەرەكشە بولىپ سانالادى. دەگەنمەن, ءبىز مۇنىمەن توقتاپ قالمايمىز, ءبىز عىلىمي ىنتىماقتاستىقتى, اكادەميالىق ۇتقىرلىق باعدارلامالارىن ءارى قاراي دامىتامىز, سونىمەن قاتار «3+1+1» فورماتى بويىنشا ءبىلىم بەرۋ باعدارلامالارىنىڭ ءتىزىمىن ۇلعايتۋ مۇمكىندىگىن قاراستىرامىز. سونداي-اق بيىلعى جىلى «بولاشاق» باعدارلاماسى بويىنشا 12 عالىمىمىزدى, «3+1+1» باعدارلاماسى بويىنشا 18 ستۋدەنتتى عىلىمي تاعىلىمدامادان وتۋگە جىبەرۋدى جوسپارلاپ وتىرمىز, بۇل ۋنيۆەرسيتەتىمىزدىڭ ستۋدەنتتەرى مەن عىلىمي قىزمەتكەرلەرىنە جاڭا بەلەستەردى باعىندىرۋعا جول اشادى», دەدى سامعات ەرمەكباەۆ.
ساتباەۆ ۋنيۆەرسيتەتى – قازاق ۇلتتىق تەحنيكالىق زەرتتەۋ ۋنيۆەرسيتەتى حالىقارالىق سەرىكتەستەر شەڭبەرىن كەڭەيتۋ ءۇشىن, اعىلشىن تىلىندە ءبىلىم بەرۋ باعدارلامالارىن ەنگىزۋدە, سونىمەن قاتار QS رەيتينگىندە ۇزدىك 100-گە كىرەتىن تاعى ءۇش ۋنيۆەرسيتەتپەن اكادەميالىق ءبىلىم الماسۋعا جانە قوس ديپلومدىق باعدارلامالاردى قۇرۋعا قاتىسادى. ولار: Sungkyunkwan University (وڭتۇستىك كورەيا), City University of Hong Kong (گونكونگ, قىتاي) جانە Hof University of Applied Sciences (گەرمانيا). وسى ماقساتتا شەتەلدىك پروفەسسورلار شاقىرىپ, باسقا ەلدەردەن قابىلدانعان ستۋدەنتتەر سانىن ۇلعايتۋدا. ساتباەۆ ۋنيۆەرسيتەتىنە بيىل تۇسەتىن بارلىق ستۋدەنتتەر وسى قوس ديپلومدىق باعدارلامالارعا قاتىسۋعا ءوتىنىش بەرە الادى. كەزدەسۋ بارىسىندا تالقىلانعان باستى تاقىرىپتاردىڭ ءبىرى – Penn State فيليالىن اشۋ ماسەلەسى بولدى, بۇل ساتباەۆ ۋنيۆەرسيتەتى باسشىلىعىنىڭ العا قويعان باستى ماقساتى.
«الەمدەگى ءتورت ۇزدىك ۋنيۆەرسيتەتپەن بىرگە قۇرىلعان بىزدەگىدەي باعدارلاما قازاقستاننىڭ باسقا ەشبىر ۋنيۆەرسيتەتىندە جوق», دەپ اتاپ ءوتتى ساتباەۆ ۋنيۆەرسيتەتىنىڭ حالىقارالىق ىنتىماقتاستىق جانە ستراتەگيالىق دامۋ جونىندەگى ءبىرىنشى پرورەكتورى سامعات ەرمەكباەۆ.
ساپار بارىسىندا Penn State ۋنيۆەرسيتەتىنىڭ وكىلدەرى «بولاشاق» باعدارلاماسى بويىنشا شاكىرتاقى العان زەرتتەۋشىلەرمەن, سونداي-اق اكادەميالىق ۇتقىرلىق باعدارلاماسىنا قاتىسۋعا ۇمىتكەر ستۋدەنتتەرمەن كەزدەستى.
«قازاقستان وتە تاماشا ەل, ال ساتباەۆ ۋنيۆەرسيتەتى ءبىز ءۇشىن ستراتەگيالىق ماڭىزدى سەرىكتەس. ءبىز 3+1+1 فورمۋلاسى بويىنشا اكادەميالىق سالادا عانا ەمەس, عىلىمي-زەرتتەۋ سالاسىندا دا ىنتىماقتاستىققا دايىنبىز. ءبىز سونداي-اق اكادەميالىق ۇتقىرلىق اياسىندا ستۋدەنتتەرمەن الماسۋعا مۇددەلىمىز», دەپ اتاپ ءوتتى PennState Global پروۆوست ورىنباسارىنىڭ مىندەتىن اتقارۋشى.
پەنسيلۆانيا مەملەكەتتىك ۋنيۆەرسيتەتى – QS الەمدىك رەيتينگىندە 83-ورىندا تۇرعان اقش-تىڭ مەملەكەتتىك زەرتتەۋ ۋنيۆەرسيتەتى. ۋنيۆەرسيتەت ايۆي ليگاسىنىڭ ۋنيۆەرسيتەتتەرىمەن سالىستىرۋعا بولاتىن جوعارى ساپالى ءبىلىم بەرەدى. ۋنيۆەرسيتەتتىڭ ەنداۋمەنت قورىنىڭ كولەمى 4,55 ميلليارد اقش دوللارىن قۇرايدى.
