فوتو: aikyn.kz
ەرلان قارين ماقالاسىندا قازاقستانداعى رەفورمالىق وزگەرىستەردىڭ ەل وركەندەۋى جولىنداعى ىقپالىن سارالاعان. ول مەملەكەتتىڭ مىزعىماس تۇعىرىن قالىپتاستىرۋدا ەسكىشىلدىك پەن وركەنيەتتى دامۋ جولى ەشقاشان ءبىر ارناعا توعىسپايتىنىن اتاپ وتەدى.
«2022 جىلى قوعام وكىلدەرىنىڭ ۇسىنىسىمەن ءماجىلىس جانە ءماسليحات دەپۋتاتتارىن ارالاس سايلاۋ جۇيەسى ەنگىزىلدى. وكىنىشكە قاراي, ءىس جۇزىندە ءبىر مانداتتى وكرۋگتەردىڭ كەيبىرەۋىندە وڭ ۇردىسپەن قاتار جاعىمسىز جايتتار دا بولدى. اشىعىن ايتساق, بىرقاتار وكرۋگتە باعدارلامالار مەن يدەيالارعا نەگىزدەلگەن ەركىن باسەكە تۇرىندەگى ساياسي كۇرەسكە كۋا بولا المادىق. وندا الدىمەن رۋشىلدىققا جول بەرىلدى. ءتىپتى كەيبىر جەردە قىلمىستىق توپتار بيلىككە ەنۋگە دە ارەكەت جاسادى», دەپ كەي باستامالاردىڭ كولەڭكەلى تۇستارىن دا اشىق تالقى تارازىسىنا سالدى.
مەملەكەتتىك كەڭەسشى ماقالاسىندا جاڭا قوعامدىق ەتيكا قالىپتاستىرۋدىڭ ماڭىزىنا توقتالادى.
«جاڭا ساياسي مادەنيەت قالىپتاستىرماي, جاسامپاز قۇندىلىقتار نەگىزىندە قوعامدىق ەتيكانى جاڭارتپاي, ادىلەتتى قوعام قۇرۋ مۇمكىن ەمەس ەكەنى ايدان انىق», دەپ جازدى ەرلان قارين.
ول ماقالاسىندا اتالعان يدەيانى جۇزەگە اسىرۋ شەڭبەرىندە مەملەكەتتىك مىنبەردە اتقارىلىپ جاتقان جۇمىستاردى دا باياندادى.
«ۇلتتىق قۇرىلتايداعى باستامالاردى جۇزەگە اسىرۋ ءۇشىن 40 تارماقتان تۇراتىن كەشەندى جوسپار بەكىتىلدى. وسى قۇجاتتىڭ اياسىندا جىل سوڭىنا دەيىن 9 زاڭ قابىلداۋ جوسپارلانعان. قازىردىڭ وزىندە ونىڭ ۇشەۋىن پارلامەنت ماقۇلداپ, پرەزيدەنت قول قويدى. جاقىندا «زاڭسىز ويىن بيزنەسىنە جانە لۋدومانياعا قارسى ءىس-قيمىل جونىندەگى كەشەندى جوسپار» بەكىتىلەدى. سونداي-اق باسقا دا تۇجىرىمدامالىق قۇجاتتار ازىرلەپ, ناقتى جوبالار مەن ءىس-شارالاردى جۇزەگە اسىرۋ قاراستىرىلعان.
جالپىۇلتتىق قۇندىلىقتاردى ادىستەمەلىك تۇرعىدا نەگىزدەي وتىرىپ, جان-جاقتى دارىپتەۋدىڭ ادەتتەگى جالاڭ ۇگىت-ناسيحاتتان ايىرماشىلىعى – بۇل ءتاسىل بىردەن ناتيجە بەرمەسە دە, ستراتەگيالىق جاعىنان العاندا الدەقايدا ءتيىمدى. جاڭا قۇندىلىقتار جۇيەسى ءار ازاماتتىڭ مىنەز-قۇلقى مەن كۇندەلىكتى ءىس-ارەكەتى ارقىلى قالىپتاسۋى كەرەك. سول سەبەپتى, بيلىك «تازا قازاقستان» ەكولوگيالىق اكتسياسىنا باسا ءمان بەرىپ وتىر», دەپ جازدى مەملەكەتتىك كەڭەسشى.
ەرلان قاريننىڭ ەل دامۋى جولىندا تۇيىندەگەن وزگە دە تۇجىرىمدارىن مىنا جەردەن وقي الاسىزدار.
