جۇمىلا كۇرەسۋ – ءتيىمدى ءتاسىل

بۇگىندە ەسىرتكىمەن كۇرەس مەملەكەت ۇستانعان باعىتتىڭ ءبىر تارماعىنا تەلىنسە دە, ەستى ادامدى ەسىرتىپ-ەلىرتەتىن دۇنيەگە دەگەن قۇمارلىق تىيىلار ەمەس. بۇل الدەكىمدەر ءۇشىن ءبىر ساتتىك ءلاززاتتىڭ كوزى بولسا, ەندى بىرەۋلەر ءۇشىن كولەڭكەلى بيزنەسكە اينالىپ كەتكەن. كەيىنگى بەس جىلدا ەسىرتكى قىلمىستارى بويىنشا 19 مىڭعا جۋىق ادام جاۋاپقا تارتىلعان. وسى ورايدا بىلتىر «Astana Hub» جانە «جاستار رۋحى» جاستار قاناتى «Amanat Tech» حاكاتونىن ۇيىمداستىردى. وندا ەلىمىزدەگى وزەكتى پروبلەمالاردى كرەاتيۆتى جولمەن شەشۋگە ۇمتىلعان دارىندى جاستار ءوز جوبالارىن ۇسىندى. اراسىنان نازارباەۆ زياتكەرلىك مەكتەبى وقۋشىلارىنان قۇرالعان «Shalqyma» كومانداسى جۇلدەلى ورىنعا يە بولدى. ولار ناقتى ۋاقىتتاعى ەسىرتكى قىلمىسىن باقىلاۋ كارتاسى يدەياسىمەن توپ جاردى. باستامانى «Esbol qory» قولداپ, ساندىق كارتا ىسكە قوسىلدى.

– ينتەرنەت بەتتەرىن اشساق, ەسىرتكى ساتۋشىلار ۇستالعانى تۋرالى اقپارات قاپتاپ ءجۇر. قالا بەردى الەۋمەتتىك جە­لىلەردە پاراقتاساق, ەسىرتكى قويىپ كەتۋشىلەردىڭ بەينەجازباسى دا تولىپ تۇر. سوندىقتان ەسىرتكىمەن بايلانىس­تى قىلمىس اتاۋلىنىڭ جولىن كەسۋمەن قاتار, ونىڭ الدىن الۋ ما­سەلەسى باستى نازاردا. ءبىز مەملەكەت باسشىسى قاسىم-جومارت توقاەۆتىڭ «نا­شاقورلىق پەن ەسىرتكى قىلمىسىمەن كۇرەس جالپىۇلتتىق سيپات الۋ كەرەك» دەگەن قاعيداتىنا ساي جۇمىس ىستەپ جاتىرمىز. بۇل كارتانىڭ ىسكە قوسىلۋى – بارلىق ەسىرتكى ساۋداگەرلەرىنە ۇرەي تۋدىراتىنىنا سەنىمدىمىن. ويتكەنى ەsbol.kz سايتىندا كارتا ناقتى ۋاقىت رەجى­مىن­دە جاڭارتىلىپ وتىرادى. كەز كەلگەن بەلسەندى ازامات ەسىرتكى قىلمىسىنىڭ بەلگىلەرىن بايقاسا, بىردەن جۇكتەي الادى. كارتا استانا قالاسىندا ءساتتى جۇزەگە اسىپ, ناقتى ناتيجەلەر كورسەتسە, رەسپۋبليكانىڭ ءار وڭىرىندە ەنگىزىل­مەك­شى, – دەدى «Esbol qory»-نىڭ توراعاسى ­جاندوس اقتاەۆ.