سۋرەتتەردى تۇسىرگەن – اۆتور
عاسىر باسىندا ادەبيەتكە كەلگەن اقىن-جازۋشىلاردىڭ بارلىعى دا ازاتتىق تاڭىنىڭ دۇبىرىمەن ويانعاندار ەدى. سولاردىڭ ىشىندە ەرتىس-بايان جەرىندە دۇنيەگە كەلگەن جۇسىپبەك ايماۋىت ۇلى, قوشكە كەمەڭگەر ۇلى, جۇمات شانين, سۇلتانماحمۇت تورايعىر ۇلى, ءسابيت دونەنتاەۆ, يسا بايزاقوۆ, ديحان ابىلەۆ تاعى باسقا كورنەكتى تۇلعالاردى ەرەكشە اتاپ وتۋگە بولادى.
وسى كەزەڭدەگى ۇلت ادەبيەتىن كوركەمدىك-ەستەتيكالىق تۇرعىدان بايىتا تۇسكەن شىعارمانىڭ ءبىرى – اعا ۇرپاق جاتا-جاستانا وقىعان «قارتقوجا» رومانى. بۇقار جىراۋ اتىنداعى پاۆلودار وبلىستىق ادەبيەت جانە ونەر مۋزەيىندە بۇل كىتاپتىڭ تۇپنۇسقاسى ساقتاۋلى تۇر.
– مۋزەي قورىنداعى جۇسىپبەك ايماۋىت ۇلىنىڭ «قارتقوجا» رومانىنىڭ تۇپنۇسقاسى – قۇندى جادىگەردىڭ ءبىرى. 1926 جىلى قىزىلوردا قالاسىنان, اراب گرافيكاسىندا جارىق كورگەن. شىعارما تاريحتىڭ تۇتاس ءبىر كەزەڭىن, شىندىعىن جۇمسارتپاي, شىنايى, كەڭ تۇرعىدا سۋرەتتەي الۋىمەن باعالى. جالپى كىتاپتىڭ تۇپنۇسقاسى جامان ساقتالماعان. رومانداعى باس كەيىپكەر قارتقوجانىڭ ءپروتوتيپى – قارتقوجا توعانباەۆتىڭ تۋىسقاندارى ۇيىندە ۇزاق جىلدار ساقتاپ كەلگەن. كەيىن مۋزەي قىزمەتكەرى ءمارۋان حاميتوۆا اپايىمىز سۇراپ ءجۇرىپ, 2004 جىلى قورعا الدىردى,-دەيدى مەكەمەدەگى قور ساقتاۋشى ءاليا ساماتوۆا.
كىتاپتى كەلەشەكتە رەستاۆراتسيادان وتكىزۋ جوسپارلانىپ وتىر.
پاۆلودار وبلىسى
