ۆەلوشاباندوزدار دوداسى اۋەلى كوكتوبە اۋىلدىق اكىمدىگى ورنالاسقان عيمارات الدىنان باستالدى. ۆەلوشەرۋدىڭ اشىلۋ سالتاناتىندا اۋدان باسشىسى اعىباي ءامىرين جۇرتشىلىقتى رامىزدەر كۇنىمەن قۇتتىقتاپ, سپورتشىلارعا ساتتىلىك تىلەدى.
«مەملەكەتتىك نىشاندارىمىز – كەز كەلگەن مەملەكەتتىڭ ەگەمەندىگى مەن بىرتۇتاستىعىن بەينەلەيتىن, ونىڭ اجىرامايتىن اتريبۋتتارىنىڭ ءبىرى. وسكەلەڭ ۇرپاقتى سالاماتتى ءومىر سالتىنا ناسيحاتتاۋ, پاتريوتتىق سەزىمدى وياتۋ, مەملەكەتتىك رامىزدەرىمىزدى قۇرمەتتەۋ ماقساتىندا بۇگىن وسىنداي سپورتتىق ءىس-شارا وتكىزۋدى ۇيعاردىق. بيىل ماي اۋدانىنىڭ قۇرىلعانىنا 85 جىل تولىپ وتىر. وسى مەرەيلى داتانى ەسكەرە وتىرىپ, ۆەلوشەرۋگە 85 سپورتشى قاتىسسا دەگەن تىلەك بولعان. شاقىرتۋىمىزدى ەسكەرىپ, بەلسەندى قاتىسىپ جاتقان تۇرعىندار مەن وقۋشىلارعا, جاستارعا العىس ايتامىز», دەدى قۇتتىقتاۋ سوزىندە اكىم.
ۆەلوشەرۋگە وقۋشىلار مەن جاستار, مەملەكەتتىك قىزمەتشىلەر, تۇرعىندار مەن ارداگەرلەر, كاسىپكەرلەر قاتىستى. ۆەلوسيپەدكە وتىرىپ الىپ, ونىمەن جەلدەي ەسۋدىڭ دەنساۋلىق ءۇشىن پايداسى مول ەكەنىن ماي اۋدانىنىڭ جۇرتشىلىعى جاقسى تۇسىنەدى. ۇلكەن شاھاردا تۇرماسا دا, جەرگىلىكتى حالىق اراسىندا ۆەلوسيپەدپەن قىدىرىستاۋ, كۇندەلىكتى جۇمىسىنا بارىپ-كەلۋ كەڭ تارالعان. دەنساۋلىققا پايداسىنان بولەك, شاپ-شاعىن ءارى ىڭعايلى بۇل كولىكتىڭ قورشاعان ورتاعا دا ەش زيانى جوق ەكەنىن ەسكە سالا كەتكەن ارتىق بولماس. ال ماي ءوڭىرى – كەزىندە اتوم سىناعىنان ەڭ كوپ زارداپ شەككەن ايماقتاردىڭ ءبىرى.
اۋداندىق بالالار-جاسوسپىرىمدەر سپورت مەكتەبىنىڭ ديرەكتورى ساعادات وتاروۆ مۇنداي ءىس-شارا جاس ۇرپاقتى دەنە تاربيەسىمەن اينالىسۋعا ۇندەۋدە ماڭىزدى ءرول اتقاراتىنىن اتاپ ءوتتى.
«جازعى ۋاقىتتا تازا اۋادا سەرۋەندەپ, سپورتپەن شۇعىلدانۋدىڭ پايدالى ەكەنى بارشاعا ءمالىم. ال ۆەلوسيپەد تەبۋدىڭ پايداسى ۇشان-تەڭىز. ۆەلوسپورت كۇندەلىكتى ادەتىڭىزگە اينالسا, جالپى دەنساۋلىققا جاعىمدى اسەرى مول. ۆەلوسيپەدتى ەكولوگيالىق كولىك رەتىندە دە ناسيحاتتاپ ءجۇرمىز. بىراق, ەڭ باستىسى, ونىڭ ادام اعزاسىنا قوسىمشا وتتەگى ءبولىپ, ەستە ساقتاۋ, ويلاۋ قابىلەتىنە جاقسى اسەر ەتەتىنىن ۇمىتپاۋىمىز كەرەك», دەيدى سپورت مامانى.
قاتىسۋشىلار ايتەكە بي, اباي, س.سەيفۋللين, ابىلاي حان كوشەلەرىن باسىپ ءوتىپ, ورتالىق الاڭدا مارە سىزىعىن قيدى. ۇيىمداستىرۋشى تاراپ – اۋدان اكىمدىگىنىڭ قىزمەتكەرلەرى قاتىسۋشىلار اراسىنان «ەڭ جاس ۆەلوشەرۋشى» مەن «ارداگەر ۆەلوشەرۋشىنى» انىقتاپ, ولارعا ارنايى اتالىمداردى تابىستادى. ال ۇزدىك شىققاندار مەن جۇلدەلى ورىنعا يە بولعاندار باعالى سىيلىقتارمەن ماراپاتتالدى.
پاۆلودار وبلىسى,
ماي اۋدانى,
كوكتوبە اۋلى
