– انار, ەۆەرەستى باعىندىرۋدا مامىر مەن قاراشادا ايىندا عانا ءساتى تۋاتىن «اۋا رايى تەرەزەسىن» پايدالانىپ, كوزدەگەن بيىكتىككە ابىرويمەن كوتەرىلۋلەرىڭىزبەن قۇتتىقتايمىز!
– ەكسپەديتسيا بارىسىندا ەۆەرەستىڭ توبەسىنە جەتە الماي, ورتا جولدان قايتقان وزگە ەلدەردىڭ كوماندالارى بولدى. بىراق قولايلى كەزەڭ دەپ ەسەپتەلىنەتىن «اۋا رايى تەرەزەسىنە» قاراماستان, جورىق باستالار كۇننىڭ قارساڭىندا تۇندە قار جاۋىپ, باعىتتىڭ كەيبىر قاۋىپتى بولىكتەرىن جاسىرىپ قالدى, بۇل الپينيستەرگە قوسىمشا قاۋىپ ءتوندىردى. الىستى كورۋ مۇمكىندىگى شەكتەلدى, 8 مىڭ مەتر بيىكتەن باستاپ الپينيستەر «اجال ايماعى» دەپ اتايتىن بيىكتىكتە وتتەگى ماسكاسىن تاعۋدى مىندەتتەدى. ويتكەنى اتموسفەرادا ادامنىڭ قالىپتى ءومىر ءسۇرۋى ءۇشىن قاجەتتى وتتەگىنىڭ ۇشتەن ءبىر بولىگى عانا بولادى. بىراق ەكسپەديتسيا جەتەكشىسى ماقسۇت جۇماەۆتىڭ زور تاجىريبەسى, سونداي-اق دۇرىس تاڭدالعان قۇرال-جابدىقتار قاتىسۋشىلاردى ايتارلىقتاي قورعادى.
– مۇنداي كۇردەلى دە قيىن ءارى قىمبات ساپارعا مىندەتتى تۇردە قولداۋشىلار كەرەك ەكەنى بەسەنەدەن بەلگىلى؟
– سۇراعىڭىزدى ءتۇسىندىم. ەكسپەديتسيانى «Everest Development» ۇيىمداستىرعانى ەلگە ورالعان سوڭ, ءباسپاسوز ءماسليحاتىندا ايتىلدى. كومپانيا جورىق كەزىندەگى بارلىق شىعىندى موينىنا الىپ, گيمالايدا بىزگە جان-جاقتى قولداۋ كورسەتتى. ال مەن كومپانياعا جۇمىسقا ورنالاسۋعا ارەكەتتەنىپ, اڭگىمەلەسكەن كەزىمدە بوس ۋاقىتتا سكايراننينگپەن اينالىساتىنىمدى ايتقانمىن. سول كەزدە كومپانيا وكىلدەرى سيرەك كەزدەسەتىن سپورت تۇرىنەن جاتتىقتىرۋشى بولۋعا قالاي قارايتىنىمدى سۇراعان. كومپانيا وسى قىزىعۋشىلىعىمدى قولداپ, ناتيجەسىندە ءتىپتى افريكانىڭ ەڭ بيىك شىڭى كيليماندجارونى (5 895 م) باعىندىرعان كومپانيانىڭ ەكسپەديتسيا قۇرامىنا كىردىم. بۇل ماڭىزدى چەللەندج بولعاندىقتان, ول ەكسپەديتسيانى دا ماقسۇت جۇماەۆ باسقاردى.
سول جولى كيليماندجاروعا ءساتتى شىعۋىمىزبەن ءبىر-ءبىرىمىزدى قۇتتىقتاپ جاتىپ: «كەلەسى جولى قايدا؟ بالكىم, بۇدان دا بيىگىنە – ەۆەرەسكە شىعىپ, كومپانيانىڭ اتىن ۇلىقتارمىز؟» دەگەنىمىز ەسىمدە. سول ساتتە ماقسۇت, المير ۇشەۋمىز بۇل بيىكتىكتى دە باعىندىرا الاتىنىمىزدى, باعىندىرعىمىز كەلەتىنىن تۇسىندىك.
– ەۆەرەستى باعىندىرعان ادام ەندى ەشتەڭەدەن قايمىعا قويماس! كوزدەگەن ماقساتتارىنا جەتەتىن الپينيستەر دە ىرىمشىل بولعانىمەن, بولاشاققا قۇرعان قانداي ءورشىل جوسپارلارىڭىز بار ەكەنىن سۇراعىم كەلەدى...
– ارينە, وسى جەتىستىكپەن توقتاپ قالعىم كەلمەيدى. ەلگە ورالا سالىسىمەن, باسشىلارىما: «جالعاستىرۋ كەرەك!» دەپ ايتىپ, قاتتى تاڭعالدىرعان بولارمىن (كۇلەدى). «7 شىڭ» باعدارلاماسىنا قاتىسىپ, بارلىق قۇرلىقتىڭ ەڭ بيىك تاۋلارىنا كوتەرىلگىم كەلەدى. ونىڭ ۇستىنە قورجىنىمدا افريكالىق كيليماندجارو, جەر شارىنىڭ ەڭ بيىك شىڭى ەۆەرەست بار.
– انار, ساتتىلىك سەرىگىڭىز بولسىن!
P.S. وسى كۇندەرى «Kazakh Everest Team» ەكسپەديتسياسىن قولداۋ ماقساتىندا وتانداستارىمىزدىڭ ەۆەرەسكە كوتەرىلۋى حاقىندا دەرەكتى فيلم ءتۇسىرىلىپ جاتىر. عيبرات باقاەۆ رەجيسسەرلىك ەتكەن فيلم بيىل كۇزدە كوپكە تانىستىرىلادى. ايتا كەتەيىك, ءتۇسىرىلىم توبى نەپالدا قاتىسۋشىلارمەن بىرگە ەرە ءجۇرىپ, قۇندى كادرلار ءتۇسىرىپ العان.
اڭگىمەلەسكەن –
ايناش ەسالي,
«Egemen Qazaqstan»
الماتى
