فوتو: ج.جۇمابەكوۆ
ەرلان قوشانوۆ جيىنعا قاتىسۋشىلارعا 2024 جىلى قازاقستاننىڭ ۇجىمدىق قاۋىپسىزدىك تۋرالى شارت ۇيىمىنا توراعالىعى كەزىندەگى باسىمدىقتارىنىڭ جۇزەگە اسۋ بارىسى تۋرالى اقپارات بەردى,
ء«بىز بەيبىتشىلىكتى, حالىقارالىق جانە وڭىرلىك قاۋىپسىزدىك پەن تۇراقتىلىقتى نىعايتۋ, مۇشە مەملەكەتتەردىڭ تاۋەلسىزدىگىن, اۋماقتىق تۇتاستىعى مەن ەگەمەندىگىن قورعاۋ ىسىندە ۇيىمىمىزدىڭ الەۋەتىن دامىتۋعا باسا نازار اۋداردىق. قازاقستان پرەزيدەنتى – ۇقشۇ ۇجىمدىق قاۋىپسىزدىك كەڭەسىنىڭ توراعاسى قاسىم-جومارت كەمەل ۇلى توقاەۆ وسى باعىتتاردى ىسكە اسىرۋ جونىندەگى ءىس-شارالار جوسپارىن بەكىتتى. بۇل قۇجات قاجەتتى مودەلدىك زاڭدار مەن ۇسىنىستاردى ازىرلەۋ ءۇشىن ءبىزدىڭ پارلامەنتتەرىمىزدىڭ دە ۇيلەسىمدى ءىس-ارەكەتىن قامتيدى», دەدى ءماجىلىس سپيكەرى.
ەرلان قوشانوۆ تەرروريزم مەن ەكسترەميزمگە, اقپاراتتىق تەحنولوگيالار مەن ەسىرتكى بيزنەسى سالاسىنداعى قىلمىستارعا قارسى كۇرەسكە باعىتتالعان ۇيىمعا مۇشە ەلدەردىڭ اۋماعىنداعى بىرقاتار ءىس-شارانى اتاپ ءوتتى. ءماجىلىس توراعاسى توتەنشە جاعدايلاردىڭ الدىن الۋ جانە زارداپتارىن جويۋ ماسەلەلەرى بويىنشا ىنتىماقتاستىقتى تەرەڭدەتۋگە ەرەكشە ءمان بەرىلىپ وتىرعانىن ايتتى. سونىمەن قاتار جيىنعا قاتىسۋشىلار الەمدەگى جالپى گەوساياسي جاعدايدى تالقىلاپ, تاياۋ شىعىستاعى احۋال ەرەكشە الاڭداۋشىلىق تۋعىزاتىنىن اتاپ ءوتتى. ءماجىلىس سپيكەرى حالىقارالىق قوعامداستىق اۋعانستانداعى كۇردەلى گۋمانيتارلىق جاعدايدى دا ۇمىتپاۋى كەرەكتىگىنە نازار اۋداردى.
«پارلامەنتارالىق دەڭگەيدەگى سىندارلى جۇمىسىمىزدىڭ اياسىندا ءبىز وسى ماسەلەلەرگە ۇنەمى ەرەكشە نازار اۋدارامىز. قازىرگى قاۋىپ-قاتەرلەرگە قارسى تۇرۋ ءۇشىن زاڭنامالىق بازانى قامتاماسىز ەتۋ ماقساتىمەن ەلدەرىمىزدىڭ پارلامەنتتەرى اراسىنداعى بەلسەندى ىقپالداستىقتى جالعاستىرۋ ماڭىزدى دەپ سانايمىن», دەدى ەرلان قوشانوۆ.
كەزدەسۋگە قازاقستان تاراپىمەن قاتار رەسەي فەدەراتسياسى مەملەكەتتىك دۋماسىنىڭ توراعاسى ۆياچەسلاۆ ۆولودين, بەلارۋس رەسپۋبليكاسىنىڭ ۇلتتىق جينالىسى وكىلدەر پالاتاسىنىڭ توراعاسى يگور سەرگەەنكو, قىرعىزستاننىڭ جوگوركۋ كەنەش توراعاسى نۋرلانبەك شاكيەۆ جانە تاجىكستان رەسپۋبليكاسى مادجليسي ولي مادجليسي ميللي توراعاسى رۋستامي ەمومالي باستاعان دەلەگاتسيالار مەن ۇقشۇ باس حاتشىسى يمانعالي تاسماعامبەتوۆ, ۇقشۇ پا اتقارۋشى حاتشىسى سەرگەي پوسپەلوۆ قاتىستى.
