فوتو: رۋدنىي قالاسىنىڭ اكىمدىگى
«قۇرمەتتى, رۋدنىي قالاسىنىڭ تۇرعىندارى, بۇگىن بارلىعىمىز ءۇشىن قۋانىشتى كۇن, ويتكەنى سىزدەر پاتەر يەسى اتانىپ جاتسىزدار. ادام ومىرىندەگى باستى ارمانداردىڭ ءبىرى باسپانالى بولۋ ەمەس پە؟ سىزدەردى شىن جۇرەكتەن قۇتتىقتايمىن. وبلىس اۋماعىندا, سونداي-اق رۋدنىي قالاسىندا حالىقتى تۇرعىن ۇيمەن قامتاماسىز ەتۋ ماسەلەلەرى جۇيەلى شەشىلىپ جاتىر. رۋدنىي قالاسىنىڭ تارتىمدىلىعىن, جايلىلىعىن ارتتىرا تۇسەتىن جۇمىستار جوسپاردا تۇر. ءبىز رۋدنىي قالاسىن جانداندىرۋ باعىتىندا جۇيەلى جۇمىس ىستەيمىز», دەدى وبلىس اكىمى قۇمار ىرگەباي ۇلى.
ءۇي اۋلاسىندا بالالار الاڭى, اۆتوتۇراق جانە كوگالداندىرۋ جۇمىستارى جۇرگىزىلگەن. ءبىر بولمەلى پاتەرلەر 38 شارشى مەتردى قۇراسا, ەكى بولمەلى - 56 شارشى مەتردەن 80 شارشى مەترگە دەيىن, ال ءۇش بولمەلى پاتەرلەر كولەمى 84 شارشى مەتردى قۇرادى. «سابىر» تۇك الەۋمەتتىك ساناتتار بويىنشا مەملەكەتتىك تۇرعىن ءۇي قورىنىڭ كەزەگىندە تۇرعان ازاماتتارعا بەرىلدى. ونىڭ ىشىندە حالىقتىڭ وسال توپ وكىلدەرى, كوپبالالى وتباسىلار جانە بالالار ءۇيىنىڭ تۇلەكتەرى باسپانالى بولدى.
ء«بىز كەزەكتە 2021 جىلدىڭ قاڭتار ايىنان باستاپ تۇردىق. مەن كوپبالالى انامىن, 4 بالام بار. ءوزىمىزدىڭ ءۇيىمىز ەشقاشان بولماعان, وسى كۇنگە دەيىن ءبىز جالدامالى پاتەردە تۇردىق. بۇگىن قۋانىشىمدا جەك جوق, شىنىمدى ايتسام, 3 بولمەلى پاتەر العانىمىزعا ءالى سەنە الماي تۇرمىن. بىزگە وسىنداي قولداۋ كورسەتىپ جاتقان مەملەكەتكە العىسىم شەكسىز. بۇل ءۇي دە, پاتەردىڭ ءوزى دە وتە ۇنادى. بالالار وتە ريزا, قازىردىڭ وزىندە ءبىر كىرگەننەن جۇگىرىپ, كەڭ پاتەردە ويناپ ءجۇر. ەندى جاقىن ارادا تەزىرەك كوشىپ كەلسەك دەپ وتىرمىز», دەپ كوپبالالى انا ايجارقىن ساريەۆا قۋانىشىن جەتكىزدى.
ودان بولەك, قۇمار ىرگەباي ۇلى جاڭادان سالىنىپ جاتقان كومفورت ساناتىنداعى «ايات» تۇرعىن ءۇي كەشەنىنىڭ قۇرىلىس بارىسىمەن جانە ەسكيزدىق جوباسىمەن تانىستى. بۇل قالانىڭ ورتالىعىندا ورنالاسقان 6 قاباتتى 120 پاتەرلىك تۇرعىن ءۇي كەشەنى بولماق. جوسپار بويىنشا, تۇك-ءنىڭ اۋلاسىندا ويىن الاڭى, جەكە اۆتوتۇراق, بەينەباقىلاۋ, دەمالىس ورنى بولادى.
ساپار بارىسىندا وبلىس اكىمى تاعى ءبىر قۇرىلىس نىسانىن ارالادى. ول قالاداعى جاڭا, زامان تالابىنا ساي قوناقۇي - «Abyroy apart hotel». «Abyroy apart hotel» رۋدنىي قالاسىنداعى پاتەر مەن قوناقۇي ماسەلەسىنىڭ ەڭ وڭتايلى شەشىمى ءارى قالانىڭ ينفراقۇرىلىمى مەن ساۋلەتىنىڭ ەرەكشە نىسانى بولماق.
ايتىلعان نىسانداردىڭ باس مەردىگەرى - نارىقتا 2006 جىلدان بەرى جۇمىس ىستەپ كەلە جاتقان «QC Holding» كومپانياسى. سوڭعى جىلدارى «QC Holding» رۋدنىي قالاسىنداعى ەسكى ۇيلەردى جاڭعىرتۋمەن جانە قالا كەلبەتىن اسەمدەيتىن, جاڭا تۇرعىن ءۇي كەشەندەرىن سالۋمەن اينالىسىپ جاتىر.
كومپانيا باسشىسى نۇرالحان كۋلچيكوۆتىڭ ايتۋىنشا, «QC Holding» كومپانياسىنىڭ الداعى جۇمىسى مەن جوسپارى كوپ.
ء«بىز ءبىر جىلدىڭ ىشىندە رۋدنىي قالاسىندا ءتورت ءۇيدى پايدالانۋعا بەردىك. جەرگىلىكتى اتقارۋشى ورگاندارمەن الداعى ۋاقىتتا دا تابىستى, ساپالى جانە جۇيەلى جۇمىس اتقارۋعا دايىنبىز. «QC Holding» كومپانياسى ءار تۇرعىنعا ساپا جاعىنان ءوز كەپىلدگىن بەرەدى جانە باسقا دا سۇراقتار بويىنشا دا كومەككە كەلۋگە ارقاشان دايىن», دەدى كومپانيا باسشىسى نۇرالحان ءامىرحان ۇلى.
