فوتو: ن.بايبۋلين
ماۋلەن اشىمباەۆ مەيماندارعا ءىلتيپات ءبىلدىرىپ, ەكى مەملەكەت اراسىندا ديپلوماتيالىق بايلانىستار ورناعالى بەرى 30 جىل وتكەنىن, وسى ۋاقىت ىشىندە ءوزارا قارىم-قاتىناس ساپالى جوعارى دەڭگەيگە كوتەرىلگەنىن اتاپ ءوتتى. سونداي-اق ول قازىرگى تاڭدا ءارتۇرلى سالادا, ونىڭ ىشىندە پارلامەنتتەر اراسىندا دا ىنتىماقتاستىق ناتيجەلى دامىپ كەلە جاتقانىنا نازار اۋداردى.
«ءبىز مىسىرمەن ارادا قالىپتاسقان پارلامەنتارالىق ىنتىماقتاستىقتى جوعارى باعالايمىز. ەكى ەلدىڭ پارلامەنتىندە ءوزارا بايلانىستىڭ ماڭىزدى تەتىگى سانالاتىن دوستىق توپتارى تابىستى جۇمىس ىستەپ كەلەدى. الداعى ۋاقىتتا ەكىجاقتى ىنتىماقتاستىقتى ودان ءارى نىعايتۋ ءۇشىن وسىنداي توپتاردىڭ الەۋەتىن كەڭىنەن پايدالانعانىمىز ابزال. بۇل رەتتە دوستىق توپتارىنا مۇشە دەپۋتاتتاردىڭ ءوزارا ساپارلارىن ۇيىمداستىرۋدىڭ جانە تۇراقتى كوميتەتتەر اراسىندا بايلانىس ورناتۋدىڭ ماڭىزى زور. ءسىزدىڭ بۇل ساپارىڭىز ەلدەرىمىز اراسىنداعى پارلامەنتارالىق ديالوگتى دامىتۋعا ايتارلىقتاي ۇلەس قوساتىنى انىق», دەدى ماۋلەن اشىمباەۆ.
سۇحبات بارىسىندا سەنات توراعاسى قازاقستان پرەزيدەنتى قاسىم-جومارت توقاەۆتىڭ باستاماسىمەن ەلىمىزدە ىسكە اسىرىلىپ جاتقان الەۋمەتتىك-ەكونوميكالىق جانە ساياسي رەفورمالارعا دا توقتالىپ ءوتتى. سونداي-اق تاراپتار بىرلەسكەن جوبالاردى ىسكە اسىرۋ ماسەلەسىن تالقىلادى.
ءوز كەزەگىندە ابدەلۋاحاب ابدەلرازەك حاسان ناتيجەلى كەزدەسۋ ءۇشىن قازاقستان سەناتىنىڭ توراعاسىنا العىسىن ءبىلدىردى جانە پارلامەنتارالىق ىنتىماقتاستىقتى ودان ءارى نىعايتۋ باعىتىندا بىرلەسىپ جۇمىس ىستەۋگە دايىن ەكەنىن جەتكىزدى.
«قازاقستان پارلامەنتىنىڭ قازاقستان-مىسىر ىنتىماقتاستىعىن نىعايتۋ جولىنداعى اۋقىمدى جۇمىسى ءۇشىن سىزگە مىسىر پارلامەنتىندەگى ارىپتەستەرىمنىڭ جانە جەكە ءوز اتىمنان العىس بىلدىرۋگە رۇقسات ەتىڭىز. ەلدەرىمىز اراسىندا سەنىمگە نەگىزدەلگەن ديالوگ قالىپتاستى, ءبىزدىڭ ءوزارا قارىم-قاتىناسىمىزدىڭ ماڭىزى دا ايرىقشا زور. مۇنداي بايلانىس ءبىزدىڭ ىنتىماقتاستىعىمىزدىڭ بارلىق باعىتىنا وڭ ىقپالىن تيگىزەدى. الداعى ۋاقىتتا پارلامەنتارالىق قارىم-قاتىناسىمىزدى نىعايتۋ, دوستىق توپتارىنىڭ جۇمىسىنا تىڭ سەرپىن بەرۋ جانە تۇراقتى كوميتەتتەردىڭ بايلانىسىن جانداندىرۋ ەرەكشە مانگە يە دەپ ەسەپتەيمىن. مۇنىڭ ءبارى ورتاق ماقساتتارىمىزعا قول جەتكىزۋ جانە سىن-قاتەرلەردى بىرلەسىپ ەڭسەرۋ ءۇشىن ماڭىزدى», دەدى ابدەلۋاحاب ابدەلرازەك حاسان.
سونىمەن قاتار كەزدەسۋدە الەمدىك جانە ءداستۇرلى دىندەر كوشباسشىلارى سەزىنىڭ جۇمىسى, سونداي-اق بيىل قازان ايىندا وتەتىن سەزد حاتشىلىعىنىڭ وتىرىسىنا دايىندىق بارىسى ءسوز بولدى.
«قازاقستان سىندارلى دىنارالىق جانە وركەنيەتارالىق ديالوگتى قالىپتاستىرىپ, نىعايتۋعا باسا ءمان بەرەدى. سوعان سايكەس 2003 جىلى ءبىزدىڭ مەملەكەت الەمدىك جانە ءداستۇرلى دىندەر كوشباسشىلارىنىڭ سەزىن شاقىرۋ جونىندە باستاما كوتەرءدى. وسى ۋاقىت ىشىندە بۇل باستاما بەيبىتشىلىكتى جانە دىنارالىق ديالوگتىد امىتۋدى كوزدەيتىن, جالپىعا بىردەي تانىلعان ماڭىزدى حالىقارالىق پلاتفورماعا اينالدى. 2022 جىلى الەمدىك جانە ءداستۇرلى دىندەر كوشباسشىلارىنىڭ VII سەزى جوعارى دەڭگەيدە ءوتتى. وعان كوپتەگەن بەدەلدى ءدىن كوشباسشىلارى, ونىڭ ىشىندە ءال-ازھاردىڭ جوعارعى يمامى شەيح احمەد ات-تايەب قاتىستى. مىسىر وكىلدەرىنىڭ سەزد اياسىنداعى ءىس-شارالارعا تۇراقتى قاتىسىپ, ونىڭ جۇمىسىنا ەلەۋلى ۇلەس قوسىپ كەلە جاتقانى ءۇشىن العىسىمىزدى بىلدىرەمىز. الداعى ۋاقىتتا بۇل باعىتتاعىب ىرلەسكەن جۇمىسىمىزدى ءارى قاراي ناتيجەلى جالعاستىرامىز دەپ سەنەمىن», دەدى ماۋلەن اشىمباەۆ.
كەزدەسۋدىڭ قورىتىندىسى بويىنشا قازاقستان مەن مىسىر پارلامەنتتەرى سەناتتارىنىڭ توراعالارى ءوزارا تۇسىنىستىك تۋرالى مەموراندۋمعا قول قويدى. سپيكەرلەر بۇل قۇجات ىنتىماقتاستىقتىڭ اياسىن ودان ءارى كەڭەيتۋگە تىڭس ەرپىن بەرەتىن قادام ەكەنىن ايتتى.
