مەملەكەت باسشىسى قاسىم-جومارت توقاەۆ سۋ تاسقىنىنان زارداپ شەككەن تۇرعىندارعا جان-جاقتى قولداۋ كورسەتۋدى تاپسىرعان بولاتىن. بيىل وبلىستىڭ بىرنەشە اۋدانىن ابىگەرگە سالعان تابيعات اپاتى سالدارىنان مىڭداعان تۇرعىن باسپاناسىز قالدى. قازىر وبلىس اكىمىنىڭ تاپسىرماسى بويىنشا وڭىردە قۇرىلىس جۇمىسى قارقىندى ءجۇرىپ جاتىر. وبلىس بويىنشا جاڭادان سالىنىپ جاتقان تۇرعىن ءۇيدىڭ سانى 401-گە جەتتى. مۇنىڭ ىشىندە 60 ءۇي وسى ءبورلى اۋدانىندا سالىنۋدا. جوسپارعا سايكەس, ءار ءۇيدىڭ كولەمى 80 شارشى مەتر بولادى.
بۇگىن اۋدان بويىنشا 50 وتباسى ساتىپ الىنعان جاڭا پاتەرىنە كوشىپ باردى. سولاردىڭ ءبىرى كوپبالالى انا ءلايلا جۇماعاليەۆا مەملەكەت تاراپىنان جاسالىپ جاتقان كومەك ءۇشىن العىس ايتتى.
«سۋ تاسقىنى سالدارىنان ءبورلى اۋدانى پۋگاچەۆ اۋىلىنداعى ءۇيىمىز قاتتى ءب ۇلىندى. ءۇيىمىزدى تەكسەرىپ, «تۇرۋعا جارامسىز» دەگەن شەشىم شىعارعان كوميسسيا بىزگە اقساي قالاسىنان ءۇي ساتىپ الۋدى ۇسىندى. مىنە, بۇگىن ءتورت بولمەلى پاتەرگە كىرىپ وتىرمىز. قۋانىشىمىزدا شەك جوق. وسىنداي قامقورلىعى ءۇشىن ەڭ الدىمەن پرەزيدەنتىمىزگە العىس ايتامىز», دەدى ءلايلا جۇماعاليەۆا.
ءبورلى اۋدانىندا سۋ تاسقىنان زارداپ شەككەن اۋدان تۇرعىندارى 150 ايلىق ەسەپتىك كورسەتكىش مولشەرىندەگى الەۋمەتتىك كومەك العان ەدى. ال تۇرمىستىق زاتتار مەن جيھازداردىڭ شىعىنىن وتەۋ ءۇشىن بورلىلىك 168 وتباسىعا 63 ملن تەڭگە كولەمىندە قارجى تاعى تولەندى.
«تۇرعىنداردىڭ ءوز قالاۋى بويىنشا باتىس قازاقستان وبلىسىنىڭ تەرەكتى اۋدانىندا – 5 ءۇي, بايتەرەك اۋدانىندا – 2 ءۇي ساتىپ الىندى. ال, ورال قالاسىنداعى جالعىز باسپاناسى بولىپ ەسەپتەلەتىن, ۇيلەرى اپاتتى دەپ تانىلعان ساياجاي تۇرعىندارىنا الداعى ۋاقىتتا جاڭا ۇيلەر ساتىپ الۋ جانە سالۋ بويىنشا جۇمىس جۇرگىزىلىپ جاتىر», دەدى وبلىس اكىمىنىڭ ءباسپاسوز حاتشىسى ەرحان تاتكەن.
