پرەزيدەنت ۇلىتاۋداعى سول قۇرىلتايدا «ۇلتتىق قۇرىلتايدىڭ ۇلىتاۋدا باستالعانى دۇرىس بولدى. كيەلى ولكەمىز جاڭا قازاقستاندى قۇرۋ جولىنداعى بىرلىكتىڭ سيمۆولىنا اينالدى. وسى ورايدا, مەن تاعى ءبىر ماڭىزدى باستاما كوتەرگىم كەلەدى. بۇل جەردە بارلىق رۋلاردىڭ تاڭباسى تاسقا جازىلعان. سول ارقىلى بابالارىمىز ۇلت بىرلىگىن كورسەتكەن. قانىش ساتباەۆ «ەلىمىزدىڭ تۋ تىككەن جەرى – تاڭبالى تاس» دەگەن. وكىنىشكە قاراي, قاستەرلى جازۋلار كەيىن ابدەن ءب ۇلىندى. ەل ازاماتتارى ۇلىتاۋعا ەسكەرتكىش قويىپ, تاستاعى تاڭبالاردى جاڭعىرتتى. بىراق, بۇل جەتكىلىكسىز دەپ ويلايمىن. مۇندا قازاقتىڭ بىرلىگىن ايگىلەيتىن ساۋلەتتى نىسان تۇرۋى كەرەك. مەن اۋليەتاۋدىڭ ەتەگىندە مەملەكەتتىك رامىزدەر الاڭىن اشۋدى تاپسىرامىن. قاسيەتتى وڭىردە كوك بايراعىمىز اسقاقتاپ تۇرۋعا ءتيىس. سول ارقىلى ۇرپاقتار ساباقتاستىعى جالعاسىپ جاتقانىن كورسەتەمىز. تامىرى تەرەڭ مەملەكەتتىگىمىزدىڭ جاڭا ءداۋىرى باستالعانىن بىلدىرەمىز», دەگەن بولاتىن. بۇل باستاما ەستىگەن ەلدى تەبىرەنتىپ جىبەردى, كوڭىلدەر قۋانىشقا كەنەلدى. مىنە, سودان بەرى ەكى جىل ۋاقىت ءوتتى.
2023 جىلى كونستيتۋتسيا كۇنىنە ارنالعان سالتاناتتى جينالىستا وبلىس اكىمى بەرىك ابدىعالي ۇلى مەملەكەتتىك رامىزدەر الاڭى تۋرالى ارنايى توقتالىپ, «ەسكيزدەر جاسالىپ, بەكىتىلگەنىن, كونكۋرستىق جۇمىستاردىڭ ۇيىمداستىرىلعانىن, قۇرىلىستىڭ باستالاتىنىن جانە «قۇداي قالاسا, كەلەسى جىلعى رامىزدەر كۇنىندە اشۋ جوسپاردا بار» دەگەن ەدى. بۇعان دا جىلعا جۋىقتادى. مەملەكەتتىك رامىزدەر كۇنى قارساڭىندا «وسى نىسان اشىلىپ قالا ما؟» دەپ قىزىعۋشىلىق تانىتقاندا بىلگەنىمىز, «قۇرىلىس ەندى -ەندى عانا قىزا باستاعانعا» ۇقسايدى. سەبەپ؟
ۇلىتاۋ وبلىسىنىڭ قۇرىلىس, ساۋلەت جانە قالا قۇرىلىسى باسقارماسىنىڭ باسشىسى تيمۋر ءاليحان ۇلى بيجانوۆ مۇنىڭ ناقتى سەبەبىن اشىپ ايتپاسا دا, ءسوزىنىڭ اۋانىنان اۋا رايى قولبايلاۋ بولدى دەگىسى كەلەتىنىن اڭعارىپ قالدىق. مۇمكىن...
بىراق, تاپسىرما بەرىلگەلى ەكى جىل ءوتتى عوي. ءبىر الاڭ قۇرىلىسىن تاپ-تۇيناقتاي ەتىپ ءبىتىرىپ تاستاۋ ءۇشىن بۇل از ۋاقىت بولماسا كەرەك. وسىنىڭ ءوزى دە كوپ نارسەنى اڭعارتادى. تەرەڭدەپ كەرەگى دە جوق-اۋ... ءبارى ايتپاسا دا تۇسىنىكتى ەمەس پە؟ كىم كىنالى, نەگە بۇلاي؟ مۇنداي سۇراقتارعا مىڭ سان جاۋاپ تابۋعا دا بولادى. بىراق, ءبىر نارسە انىق, ەل باسشىسىنىڭ ەڭ العاشقى ۇلىتاۋداعى ۇلتتىق قۇرىلتايدا بەرگەن تاپسىرماسىن ورىنداۋدا ۇلىتاۋلىقتارعا ىلكىمدىلىك جەتىسپەي جاتىر. ايتپەسە, الداعى رامىزدەر كۇنىندە مەملەكەتتىك رامىزدەر الاڭى سالتاناتتى جاعدايدا اشىلىپ جاتار بولسا, ءسانى دە, ءمانى دە قابىسقان شارۋا بولماس پا ەدى؟..
