كوللاجدى جاساعان – الماس ماناپ, «EQ»
سىزگە قالاي ەكەنىن بىلمەيمىن, بىراق ابايدىڭ وسى ولەڭى مەنى وسىنداي ويعا باتىرادى. سىدىق مۇحامەدجانوۆتىڭ مۋزىكاسىمەن شىرقالعان ۇيلەسىم ۇلگىسى كوڭىلىڭدى ەلەڭ-الاڭ كۇيگە تۇسىرەدى. العاشقى نوتالارىنان-اق مينورلى اككورد مۇڭعا جەتەلەپ كەتەدى. مۇڭ بولعاندا دا, جاي مۇڭ ەمەس, مۇباراك مۇڭ... ال قايىرماسىندا... «جۇرەك نالاسىن بيىكتەتە كوتەرىپ, شەكسىزدىككە شارىقتاتا جۇتىلدىرىپ, قاناتى تالعان قىرانداي, تالماۋسىراپ بارىپ بىتەدى». مۇنى ايتۋشى – ورەلى ونەرتانۋشى ءىليا جاقانوۆ. راس, ورىنداۋشىسى كەلىسسە, تىڭدارمانىن تۇڭعيىق شىڭىراۋعا دا ءتۇسىرىپ, تىم بيىك شىڭعا كوتەرەتىن شىعارما – بۇل.
كۇنى كەشە ءداستۇرلى ءانشىمىز اسقار مۇقيات وزبەكستانداعى «Ovoz The Voice» جوباسىندا ابايدىڭ وسى ءبىر عالامات ءانىن شىرقادى. ەكپىنى تاۋ تەڭسەلتەر الاپات باريتون يەسىنە قول سوقپاعان جان قالمادى. سۇيەگىن سۇتپەن جۋعانداي ءسۇيسىنىپ قالدى ءبارى. ابايدىڭ ءانى قالىڭ ءبىر وي قۇشاعىنا قالدىرعانىن جەتكىزدى. ءيا, اسقار سۇلەيمەنوۆشە ايتساق, اقىل انگە اپارمايدى, ءان اقىلعا اپارادى. جاننىڭ ءدىرىلىن, جاۋراعانىن, تاسىعانىن – يەك ارتقانمەن, ءسوزدى ارقالانباي-اق – قالتقىسىز جەتكىزەتىن – ءان.
قازاقستان اتىنان باق سىناپ كەلگەن اسقار مۇقيات وزبەكستاننىڭ حالىق ءارتىسى فاررۋح زاكيروۆتەن باستاپ, مادەنيەت جانە تۋريزم ءمينيسترى وزادبەك نازاربەكوۆ, تانىمال ءانشى سەۆارا نازارحان, توحير سوديكوۆ سىندى ونەر مايتالماندارىن ءتانتى ەتتى. قوبىز كومەي, اسپان كەۋدە جىگىتتىڭ ءانى الەۋمەتتىك جەلىدە دە كەڭىنەن تارالىپ جاتىر. ولاي بولۋى زاڭدى دا.
زامانىندا كوركەمدىك كەڭەستە جاس كومپوزيتور سىدىق مۇحامەدجانوۆتىڭ اتالعان تۋىندىسىن تىڭداعان ەۆگەني برۋسيلوۆسكي دە انگە ەرەكشە باعا بەرگەن. «تاماشا! ءبارى ءوز ورنىندا! قيسىندى, قىزىقتى. ەڭ باستىسى, مۇندا ۇلتتىڭ جانى بار, جانى! ماسەلەن, «ەرتارعىن» وپەراسىنا «ەلىم-اي» ءانىن پايدالاندىم. قاراپايىم اۋەز دەرسىز, ال ونىڭ سالماعى قانداي ءزىلماۋىر. مىنا جىگىتتىڭ ءانى دە وسىنداي. ءبىر قىزىعى, ابايدىڭ ءوزى جازعان سەكىلدى بۇل رومانستى. ايتارعا ءسوز جوق!», دەپ باعا بەرەدى اتاقتى كومپوزيتور.
كۇلاش بايسەيىتوۆا دا شىعارمانىڭ اباي رۋحىمەن ۇندەس ەكەنىن اقتارىلا اشىق ايتقان. «سەزىمگە باي ءان. ويى جيناقى, ءارى تەرەڭ. ەۆگەني گريگورەۆيچ ايتقانداي, اعىلىپ جاتقان اۋەز. «قورلانعا» قالاي ۇيىساق, «جارق ەتپەستە» ءدال سونداي ءھال كەشەسىڭ. «اباي جولى» رومانىنداعى اباي مەن توعجاننىڭ سول ءبىر سوڭعى جۇزدەسۋى كوز الدىمىزعا كەلگەنىن قاراڭىز. ءبىزدىڭ توبىقتى ەلىندە ابايدىڭ ءوز «جارق ەتپەسى» ايتىلاتىن-دى. كەلە-كەلە ول مۇلدە ۇمىتىلدى. ونى بىلەتىن جاندار بۇگىندە و دۇنيەلىك. ال مىنا «جارق ەتپەس» سول «جارق ەتپەستى» تىرىلتكەندەي بولدى. جاپ-جاس جىگىتتىڭ تولعانىسى – ابايدىڭ ءوز تولعانىسى!», دەگەن ەكەن.
ءيا, ودان كەيىن ءبىرشاما ۋاقىت ءوتتى. ەلىمىزدەگى مۋزىكالىق ۇدەرىس تۇرلەنىپ, سونى سيپات الدى. اباي ولەڭدەرىنە دە جاڭاشا اندەر شىعارىلىپ, تىڭدارمان قاۋىمعا جول تارتتى. جامان ەمەس. كوپشىلىگى كوڭىلدەن شىعىپ جاتىر. «بويى بۇلعاڭ», «كوزىمنىڭ قاراسى» سەكىلدى اندەر دجاز, بليۋز جانرىندا شىرقالدى. الايدا ەشبىرى «جارق ەتپەستىڭ» بيىگىنە شىعا قويعان جوق. شىقپاۋى دا مۇمكىن. سەبەبى مۇنداي رۋحاني ۇيلەسىمدە جارالعان ونەر تۋىندىلارى ءبىر عاسىردا ءبىر-اق كەلۋى مۇمكىن. ابايدىڭ الىپ تراگەدياسىن اڭداعان كومپوزيتور عانا مۇنداي باتىلدىققا بارا الادى.
مەنىڭشە, بۇل شىعارمانىڭ سوڭعى نوتاسى جوق. ءارى قاراي ول سەنىڭ كەۋدەڭدى تارتىلا بەرەدى. تارتىلا بەرەدى... ەشقاشان توقتامايدى...
