ازاماتتار ارىزى قارالدى

باس پروكۋرور اسحات داۋىلباەۆ كەزەكتى رەت ازاماتتاردى قابىلدادى. ارىز بەرۋشىلەردىڭ وتىنىشتەرى قىلمىستىق جانە اكىمشىلىك ىستەر بويىنشا سوت اكتىلەرىنە, قىلمىستىق ءىس جۇرگىزۋدىڭ سوتقا دەيىنگى ساتىسىنداعى ۋاكىلەتتى ورگانداردىڭ شەشىمدەرىنە, سونداي-اق الەۋمەتتىك-ەكونوميكالىق سالاداعى شاعىمدارعا قاتىستى بولدى. باس پروكۋرور ازاماتتاردى تىڭداعان سوڭ شاعىمداردى مۇقيات زەردەلەپ, زاڭ بۇزۋشىلىق انىقتالعان جاعدايدا بۇزىلعان قۇقىقتاردى قالپىنا كەلتىرۋ جانە كىنالى تۇلعالاردى زاڭمەن بەلگىلەنگەن جاۋاپكەرشىلىككە تارتۋ بويىنشا تۇبەگەيلى شارالار قابىلداۋدى تاپسىردى. ال ا.داۋىلباەۆتىڭ وسىعان دەيىنگى قابىلداۋىندا بولعان ارىزدانۋشىلاردىڭ دايەكتەرىن انىقتاۋ ءۇشىن باس پروكۋراتۋرا قىلمىستىق قۋدالاۋ ورگاندارى قاۋلىلارىنىڭ كۇشىن جويىپ, سوتقا دەيىنگى تەرگەۋ قوزعاعان ەدى. سوندا  ماسەلەن,  ۆ.ايت­قو­جي­نانىڭ ءوتىنىشىن قاراعاندا اسىرا بيلىك ەتۋ دەرەگى بويىنشا قىل­مىستىق ءىستى قوزعاۋدان باس تارتۋ تۋرالى قاۋلىنىڭ كۇشى جويىل­دى, ءسويتىپ ءىس جۇرگىزۋشىلىك شەشىم قابىلدانىپ, سوتقا دەيىنگى تەر­گەۋ تاعايىندالدى. الماتى قالا­سىنىڭ پروكۋرورىنا تەرگەۋگە دەيىنگى تەكسەرىس جۇرگىزۋ كەزىندە زاڭدىلىقتىڭ بۇزىلۋىنا جول بەرگەن, سونداي-اق ءتيىستى قادا­عا­لاۋ­دى قامتاماسىز ەتپەگەن كىنالى تۇلعالارعا قاتىستى شارالار قا­بىل­داۋ تۋرالى تاپسىرما بەرىلدى. سول سياقتى ك.امىرەنوۆتىڭ شاعىمى بويىنشا دەنەگە زا­قىم كەلتىرۋ فاكتىسى بويىنشا قىل­مىستىق ءىس قوزعاۋدان باس تارتۋ تۋرالى اقمولا وبلىسىنىڭ بۇلاندى اۋداندىق ءىىب شەشىمىنىڭ كۇشى جويىلدى, سوتقا دەيىنگى تەرگەۋ باستالدى. ارىزدانۋشى ج.بايمەنوۆتىڭ دايەكتەرىن زەردەلەۋ ناتيجەسىمەن الماتى گارنيزونى بويىنشا ۇقك اسكەري پوليتسيا باسقارماسىنىڭ لاۋازىمدى تۇلعالارىنا قاتىستى قىلمىستىق ءىستى قىسقارتۋ تۋرالى قاۋلىنىڭ كۇشى جويىلدى. سوتقا دەيىنگى تەرگەۋ جۇرگىزۋ ءۇشىن قىلمىستىق ءىس ءىىم تەرگەۋ كومي­تەتىنىڭ اسكەري-تەرگەۋ باسقار­ماسىنا جولداندى, دەپ حابارلادى باس پروكۋراتۋرانىڭ ءباسپاسوز قىزمەتى.