«بىلتىر جالپى سانى 25 سپورتشى قاتىسقان بولسا, بيىل تەك جاستاردىڭ اراسىندا 35 سپورتشى بار. وسى جاستار جانە جاسوسپىرىمدەر چەمپيوناتىندا جالپى سانى 75-كە جۋىق سپورتشى باق سىناپ جاتىر», دەدى تەڭگە ءىلۋ فەدەراتسياسىنىڭ اتقارۋشى ديرەكتورى ايبەك تۇركەباي.
جارىس ناتيجەسىندە «بەس بەلەس», «قوس قۇلاش» جانە «جەتى قۇت» ستيلدەرى بويىنشا جەڭىمپازدار انىقتالدى. اتاپ ايتساق, «بەس بەلەس» ستيلىندە ءبىرىنشى ورىندى ۇلاعات امانگەلدى (شىمكەنت), ەكىنشى ورىندى قانات باقتىباي (تۇركىستان وبلىسى) يەلەنسە, ءۇشىنشى ورىندى ەراسىل قوقانباي (قىزىلوردا وبلىسى) مەن ازات امىربەكوۆ (شىمكەنت) ءبولىستى.
ال «قوس قۇلاش» ستيلىندە ارنۇر شالحار (تۇركىستان وبلىسى) جەڭىمپاز بولدى. ەكىنشى ورىندى ءنۇرالى ەرسىن (الماتى وبلىسى), ءۇشىنشى ورىن يەگەرلەرى دارىن مىرزاعالي (الماتى قالاسى) مەن رۋسلان سەيداحمەت (قىزىلوردا وبلىسى) اتاندى.
تەڭگە ىلۋدەن «قوس قۇلاش» ءستيلى بويىنشا ەكىنشى ورىن جەڭىمپازى اتانعان الماتى وبلىسىنىڭ سپورتشىسى ءنۇرالى ەرسىن بارلىق سپورتشى جاقسى دايىندىقپەن كەلگەنىن, قارسىلاستارىنىڭ دا كەرەمەت ونەر كورسەتكەنىن العا تارتتى.
سونداي-اق «جەتى قۇت» ستيلىندە ءبىرىنشى ورىنعا مەيىرجان جۇماش (شىمكەنت قالاسى), ەكىنشى ورىنعا ەرنۇر سەرىكباي (تۇركىستان وبلىسى) يە بولسا, ءۇشىنشى ورىن نۇريسلام نامازباي (جامبىل وبلىسى) مەن ەربولسىن ماقاشەۆقا (باتىس قازاقستان وبلىسى) بۇيىردى.
ەسكە سالار بولساق, رەسپۋبليكالىق تەڭگە ءىلۋ فەدەراتسياسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە بايگە, كوكپار, اۋدارىسپاق, جامبى اتۋ, ساداق اتۋ, قۇسبەگىلىك, اسىق اتۋ, «Joryq» ات سپورتى جانە باسقا دا فەدەراتسيالار بار.
الماتى وبلىسى
