فوتو: kaz.tengrinews.kz
وقۋ-اعارتۋ مينيسترلىگىنىڭ تاراتقان اقپاراتىنا سۇيەنسەك, 29 مامىر مەن 10 ماۋسىم ارالاعىندا 9-سىنىپتى بىتىرۋشىلەر ءۇشىن قورىتىندى ەمتيحاندار وتەدى. ال 11-سىنىپتى بىتىرۋشىلەر قورىتىندى ەمتيحانداردى 28 مامىر مەن 11 ماۋسىم ارالىعىندا تاپسىرادى.
قوعامدا قىزۋ تالقىلانىپ, ەلدى ەلەڭ ەتكىزگەن جاڭالىقتىڭ ءبىرى بيىل العاش رەت 5-8, 10-سىنىپتاردا قازاق ءتىلىن مەڭگەرۋ دەڭگەيىن باعالاۋ ماقساتىندا قازاق جانە باسقا دا وقىتۋ تىلدەرى بار مەكتەپتەر ءۇشىن قازاق ءتىلى بويىنشا ارالىق ەمتيحاندار وتكىزىلەدى. بۇل جاڭا تالاپ وقۋشىلاردىڭ قاي تىلدە ءبىلىم بەرەتىن مەكتەپتە وقيتىنىنا قاراماستان, كەلەسى سىنىپقا ءوتۋ ءۇشىن قازاق تىلىنەن ەمتيحان تاپسىراتىنىن بىلدىرەدى. مەملەكەتتىك تىلدەن 5-8,10-سىنىپتاردىڭ وقۋشىلارى تاپسىراتىن ەمتيحان 31 مامىرعا دەيىن وتەدى. ەمتيحاننىڭ ناقتى ۋاقىتىن وقۋ وردالارى وزدەرى بەلگىلەيدى. ەمتيحان ەكى بولىكتەن تۇرادى: جازباشا جانە اۋىزشا. وقۋشىلار ەسسە جازادى, سونداي-اق ءماتىندى وقۋ, اڭگىمەلەسۋ جانە ءماتىندى تىڭداپ ءتۇسىنۋ بويىنشا ءوز شەبەرلىگىن كورسەتەدى.
وسىعان دەيىن حابارلاعانىمىزداي, پرەمەر-ءمينيستردىڭ تاپسىرماسىنا سايكەس جانە سۋ تاسقىنىنان توتەنشە جاعداي جاريالانۋىنا بايلانىستى اتىراۋ (20 مەكتەپ), اقتوبە (9 مەكتەپ), سولتۇستىك قازاقستان (5 مەكتەپ) وبلىستارىنىڭ 3 581 وقۋشىسى ارالىق جانە قورىتىندى ەمتيحانداردان بوساتىلادى. قورىتىندى باعا ولارعا جىلدىق باعالار رەتىندە قويىلادى.
قورىتىندى اتتەستاتسيانى بارلىعى 340 مىڭنان اسا 9-سىنىپتى ءبىتىرۋشى, سونداي-اق بيىل 11-سىنىپتى ءتامامدايتىن 186 مىڭ وقۋشى تاپسىرادى. مەكتەپ تۇلەكتەرىنە اتتەستاتتاردى سالتاناتتى تۇردە تاپسىرۋ 12-15 ماۋسىم ارالىعىندا وتەدى. ال 156 مىڭ تەحنيكالىق جانە كاسىپتىك ءبىلىم بەرۋ ۇيىمدارىن بىتىرۋشىلەر ءۇشىن قورىتىندى اتتەستاتتاۋ 28 ماۋسىمعا دەيىن جۇرگىزىلەدى, ولارعا ديپلوم تاپسىرۋ ءراسىمى 28 ماۋسىم مەن 1 شىلدە ارالىعىندا بولادى.
