ساياباقتا كاۋاپ پىسىرگەندەر ايىپپۇل ارقالادى

الماتى قالالىق تجد قىزمەتكەرلەرى ىلە-الاتاۋى مەملەكەتتىك ۇلتتىق پاركىنىڭ قىزمەتكەرلەرىمەن بىرلەسىپ رەيد جۇرگىزدى. ناتيجەسىندە ءورت قاۋىپسىزدىگى ەرەجەلەرىن ورەسكەل بۇزعان ونداعان دەمالۋشىلار انىقتالدى. مامىر ايىنىڭ باسىنان بەرى ىلە-الاتاۋى ۇلتتىق تابيعي ساياباعىندا وت جاققان ءتورت ءتارتىپ بۇزۋشىعا 1,4 ميلليون تەڭگە ايىپپۇل سالىندى.

«28 مامىردا مۇتپ اۋماعىندا بوستاندىق اۋدانى تجب قىزمەتكەرلەرى ىلە-الاتاۋ ۇلتتىق تابيعي پاركىنىڭ, تابيعات قورعاۋ پوليتسياسىنىڭ قىزمەتكەرلەرىمەن بىرلەسىپ, پاترۋلگە شىقتى. ناتيجەسىندە ۇلتتىق تابيعي پاركتىڭ اۋماعىندا وت جاعۋ فاكتىسى انىقتالدى. 30 جاستاعى ەر ادام جاستارمەن بىرگە رۇقسات ەتىلمەگەن جەردە كاۋاپ دايىنداۋ ءۇشىن وت جاققان», دەدى قالالىق تجد وكىلى.

ۆەدومستۆو ەرەكشە قورعالاتىن تابيعي اۋماقتارداعى ءورت قاۋىپسىزدىگى مەن سانيتارلىق ەرەجەلەردىڭ تالاپتارىن بۇزۋ (قر اقبتك 367 - بابى) جەكە تۇلعالارعا 100 اەك (369 200 تەڭگە), لاۋازىمدى ادامدارعا, شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا 250 اەك (923 مىڭ تەڭگە) مولشەرىندە ايىپپۇل سالىناتىنىن ەسكەرتتى.

قىرمىزى جۇماعاليقىزى,

ەۇۋ ستۋدەنتى