اتىراۋلىق جىگىت 4 جاسار بالانى ورتتەن قۇتقاردى

اتىراۋ. 15 قاڭتار. اتىراۋلىق جاس جىگىت راشيت جاكۋپوۆ كورشىسىنىڭ پاتەرىندە جانىپ جاتقان ءورت اراسىنان 4 جاسار بالانى قۇتقاردى. بۇل تۋرالى egemen.kz ءتىلشىسى حابارلادى. وقىس وقيعا 9 قاڭتاردا بولعان. سول كۇنى ءتۇس الەتىندە قالاداعى ساۋدا ورتالىعىنىڭ وكىلى راشيت جاكۋپوۆ اناسىنىڭ ۇيىنە تۇستىك اس ىشۋگە كەلەدى. كوپ قاباتتى ۇيگە كىرەر الدىندا ءۇشىنشى قاباتتاعى تەرەزەدەن ءتۇتىندى كورەدى. باسپالداقپەن جوعارى كوتەرىلىپ, ءتۇتىن ءيىسى سەزىلگەن پاتەر ەسىگىن قاققاندا, ىشتەن جىلاعان بالانىڭ داۋسىن ەستيدى. كورشىلەرگە ءورت سوندىرۋشىلەرگە حابارلاۋدى تاپسىرىپ, ءوزى پاتەرگە قايتا جۇگىرەدى. پاتەر ەسىگىن اشىپ ىشكە ەنگەندە, كىرەبەرىستە قۇلاپ جاتقان 4 جاسار بالانى كورەدى. ءىنىسى ەكەۋى تۇتىنگە تۇنشىققان بالانى كوتەرىپ, وبلىستىق بالالار اۋرۋحاناسىنا جەتكىزەدى. كەيىن بەلگىلى بولعانداي, 4 جاسار بالا گازعا ۋلانىپتى. ءورت سوندىرۋشىلەر قىزىل جالىندى ءسوندىردى. ەڭ باستىسى – 4 جاسار بالا اجال اۋزىنان امان قالدى. قازىر كىشكەنتاي بالا دارىگەرلەردىڭ باقىلاۋىندا. ونى قۇتقارعان جاس جىگىت راشيت جاكۋپوۆتىڭ جاسى 29-دا ەكەن. ءراشيتتىڭ 7 جانە 3 جاستاعى ەكى ۇلى بار. «ءبىز كورشىمىز عوي, ءبىر-بىرىمىزگە قيىن ساتتە قول ۇشىن سوزۋىمىز قاجەت», – دەگەن جاس جىگىت بۇل ءىسىن ەرلىككە بالامايدى. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.