Cەرىكتەستىك 2004 جىلى 28 ماۋسىمدا ءوزارا تۇسىنىستىك تۋرالى مەموراندۋم ارقىلى راسىمدەلگەنىمەن, الدەقايدا ەرتەرەك, 1996 جىلى بوسنيا مەن گەرتسەگوۆينادا باستالدى. سودان بەرى بۇۇ دب مەن ەو اراسىنداعى سەرىكتەستىك ادامداردىڭ ءومىرىن جاقسارتۋعا, ولاردىڭ ءۇنىن كۇشەيتۋگە جانە ورنىقتى دامۋ ماقساتتارىنا (ودم) قول جەتكىزۋ ءۇشىن جەرگىلىكتى شەشىمدەردى ىلگەرىلەتۋگە باعىتتالىپ كەلەدى.
20 جىل ىشىندە سەرىكتەستىك ايتارلىقتاي دامىدى: بۇۇ دب ەو-نىڭ دامۋ سالاسىنداعى ىنتىماقتاستىق بويىنشا نەگىزگى سەرىكتەسى, ال ەو بۇۇ دب-نىڭ ءتورتىنشى ءىرى دونورى بولدى. ەو مەن بۇۇ دب بىرلەسە وتىرىپ داعدارىسقا, تۇراقسىزدىققا, باسقارۋ سالاسىنا جانە قورشاعان ورتانى قورعاۋعا باعىتتالعان, 70-تەن استام ەلدە جۇزەگە اسىرىلاتىن 170-تەن استام باستامانى جانە 1 ميلليارد ەۋرودان استام قاراجاتتى قامتيتىن پورتفەلدى باسقارادى.
سونىمەن قاتار بۇل سەرىكتەستىكتىڭ 2030 جىلعا دەيىنگى كۇن تارتىبىنە دەگەن ادالدىعى ەلدەردىڭ كەدەيلىكتى جويۋ, قورشاعان ورتانى قورعاۋ, سونداي-اق جالپىعا ورتاق وركەندەۋدى قامتاماسىز ەتۋ جولىنداعى ىلگەرىلەۋىن قولداۋىنان ايقىن كورىنەدى. مىسالى, ەو مەن بۇۇ دب اراسىنداعى سەرىكتەستىك 80-نەن استام ەلگە ودم-نا جەتۋگە ىقپال ەتەتىن ورنىقتى دامۋ باسىمدىقتارىن قارجىلاندىرۋ ءۇشىن قارجىلاندىرۋدىڭ كەشەندى ۇلتتىق مەحانيزمىن (INFF) ازىرلەۋگە جاردەمدەستى.
ەو مەن بۇۇ دب ورتالىق ازيادا ايماقتىق ودم پلاتفورماسىن قۇرۋعا كومەكتەستى. بۇل پلاتفورما ءبىلىم الماسۋعا جاردەمدەسۋ, ينستيتۋتتاردى نىعايتۋ جانە ورنىقتى دامۋدى قارجىلاندىرۋعا قاتىستى كەدەرگىلەردى جويۋ ارقىلى ايماقتىق ينتەگراتسياعا ىقپال ەتەدى. نەگىزگى ناتيجە – ايماقتىق ودم باقىلاۋ تاقتاسى – ايماقتا ودم-نا جەتۋ پروگرەسىن جەدەلدەتۋگە ارنالعان تسيفرلىق قۇرال. پلاتفورما نازار اۋدارۋدى كوبىرەك قاجەت ەتەتىن سالالاردى ءبولىپ كورسەتۋمەن قاتار, جالپىعا ورتاق ورنىقتى دامۋعا قول جەتكىزۋگە باعىتتالعان.
سونداي-اق ەو مەن بۇۇ دب اراسىنداعى سەرىكتەستىك ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيا قۇرۋ ارقىلى قازاقستانداعى ودم ارحيتەكتۋراسىن نىعايتۋعا كومەكتەستى. ودم-نىڭ جاڭا ءبىرتۇتاس ينستيتۋتسيونالدىق ارحيتەكتۋراسىنىڭ ارقاسىندا ۇكىمەتتىڭ ودم-نى جۇزەگە اسىرۋ جونىندەگى فۋنكتسيالارى قازىرگى ۋاقىتتا پارلامەنتتىڭ جۇيەلى قاداعالاۋ شارالارىمەن قامتاماسىز ەتىلگەن. بيۋدجەتتەۋ, نورمالاردى بەلگىلەۋ جانە وڭىرلىك دامۋ سالالارىنا ورنىقتى دامۋ قاعيداتتارىن ينتەگراتسيالاۋ جانە ەنگىزۋ ەلگە ساپالى تۇردە ىلگەرىلەۋگە مۇمكىندىك بەرەدى.
بۇۇ دب الەم بويىنشا ەو-دان الاتىن قارجىلاندىرۋدىڭ جارتىسىنان كوبىن توزىمدىلىك, داعدارىس جانە تۇراقسىزدىق ماسەلەلەرىن شەشۋگە باعىتتايدى. داعدارىس جانە تۇراقسىزدىق جاعدايىندا ءومىر سۇرەتىن ادامدارمەن جۇمىس ىستەي وتىرىپ, سەرىكتەستىك نەگىزگى قىزمەتتەر مەن ينفراقۇرىلىمدى قالپىنا كەلتىرۋگە, جۇمىس ورىندارىن قۇرۋعا جانە جەرگىلىكتى دامۋدى قولداۋعا كومەكتەسەدى.
ەو مەن بۇۇ دب ورتالىق ازيادا اۋعان ايەلدەرىنىڭ ەكونوميكالىق مۇمكىندىكتەرىن قازاقستان, وزبەكستان جانە قىرعىز رەسپۋبليكاسىندا ءبىلىم بەرۋ جانە دايىنداۋ ارقىلى كەڭەيتۋگە باعىتتالعان, ورتاق ترانسشەكارالىق باستامانى جۇزەگە اسىرادى. بۇل فلاگماندىق گەندەرلىك باستاما 2019 جىلدان باستاپ 155 اۋعان ايەلىنە ءبىلىم الۋعا مۇمكىندىك بەردى. باستاپقىدا 50 اۋعان ايەلىنە قازاقستان مەن وزبەكستاندا ءبىلىم الۋ مۇمكىندىكتەرىن ۇسىنۋ ماقساتىندا ىسكە قوسىلعان جوبا 2021 جىلى ەو-نىڭ قوسىمشا قارجىلاندىرۋىنىڭ ارقاسىندا قىرعىزستاندى قامتىپ, تاعى 105 اۋعان ايەلىنە ستيپەنديا تاعايىندادى. 2027 جىلعا قاراي 155 اۋعان ايەلى ورتالىق ازيا ۋنيۆەرسيتەتتەرىنەن اكادەميالىق جانە كاسىپتىك ءبىلىم الىپ شىقپاق.
2023 جىلدىڭ سوڭىنا دەيىن ەو بۇۇ-نىڭ بىرنەشە اگەنتتىگى, سونىڭ ىشىندە بۇۇ دب جۇزەگە اسىرعان, ورتالىق ازيا مەن اۋعانستانعا ارنالعان Spotlight باستاماسىنىڭ نەگىزگى دونورى بولدى. بۇل باعدارلاما ايەلدەر مەن جاس قىزدارعا قاتىستى زورلىق-زومبىلىقتىڭ الدىن الۋعا, وعان دەن قويۋعا جانە جويۋعا باعىتتالدى.
ەو مەن بۇۇ دب قازاقستاننىڭ «جاسىل ەكونوميكاعا» كوشۋىن قولداۋ ءۇشىن بىرلەسە وتىرىپ جۇمىس ىستەپ جاتىر. وسىعان دەيىنگى ورتاق جوبالارىمىز قورشاعان ورتانى باسقارۋ جۇيەسىن قولداۋ, سۋ رەسۋرستارىن باسقارۋ ساياساتى مەن تاجىريبەسى, قورشاعان ورتاعا دەگەن اسەردى باعالاۋدىڭ جەتىلدىرىلگەن پروتسەدۋرالارى, سونداي-اق قاۋىمداستىقتاردى سەيسميكالىق قاۋىپتەردەن قورعاۋ جانە ورتالىق ازياداعى تابيعي اپاتتار قاۋپىن ازايتۋ شارالارىن كۇشەيتۋ سياقتى سالالاردى قامتىدى.
ورتاق كۇش-جىگەر قازاقستان ۇكىمەتىنىڭ, ازاماتتىق قوعام ۇيىمدارىنىڭ, بيزنەستىڭ, عىلىمي ورتانىڭ جانە باسقا دا سەرىكتەستەردىڭ قولداۋى مەن ىنتىماقتاستىعىنىڭ ارقاسىندا نىعايا ءتۇستى. ولاردىڭ ادالدىعى مەن ۇمتىلىسى ورتاق تابىستىڭ اجىراماس بولىگى بولدى.
ەو مەن بۇۇ دب اراسىنداعى سەرىكتەستىك كەدەرگىلەردى جويۋعا, ءادىل مۇمكىندىكتەردىڭ بولۋىن قامتاماسىز ەتۋگە جانە قاۋىپسىز ورتا قۇرۋعا وڭ اسەرىن تيگىزىپ كەلەدى. ورتالىق ازيادا ودم-نا قول جەتكىزۋدى جەدەلدەتۋ باعىتىنداعى جۇمىس ايماقتى 2030 جىلعا دەيىنگى كۇن تارتىبىنە جاقىنداتقانى ءسوزسىز.
