اتىراۋدا «ەمبىمۇنايگازدىڭ» باسشىسى اۋىستى

اتىراۋ. 15 قاڭتار. اتىراۋ وبلىسىنداعى وتاندىق ءىرى كاسىپورىننىڭ كوشباسشىسى –«ەمبىمۇنايگاز» اكتسيونەرلىك قوعامىنىڭ باس ديرەكتورى اۋىستى. بۇل تۋرالى egemen.kz ءتىلشىسى حابارلادى. اتالعان اكتسيونەرلىك قوعامنىڭ ديرەكتورلار كەڭەسىنىڭ شەشىمىمەن قۇرمانعازى ەسقازيەۆ «ەمبىمۇنايگاز» باس ديرەكتورلىعىنا تاعايىندالدى. جاڭا باسشىنى ۇجىمعا «قازمۇنايگاز» ۇك» اق باسقارما توراعاسى ساۋات مىڭباەۆ تانىستىردى. ال, بۇعان دەيىن باس ديرەكتور قىزمەتىن اتقارعان ماحامبەت دوسمۇحامبەتوۆتىڭ وكىلەتتىگى باسقا جۇمىسقا اۋىسۋىنا بايلانىستى مەرزىمىنەن بۇرىن توقتاتىلدى. «ماحامبەت دوسمۇحامبەتوۆ قىزمەت ەتكەن ۋاقىت ارالىعىندا ءبىزدىڭ ەنشىلەس كومپانيامىز «ەمبىمۇنايگازدا» مۇناي ءوندىرۋ جوسپارى ورىندالىپ وتىردى, ىلەسپە گازدى زالالسىزداندىرۋ بويىنشا بىرنەشە قوندىرعى ورناتىلدى, 2014 جىلى «ەمبىمۇنايگازدىڭ» ۇجىمدىق شارتى «پارىز» بيزنەستىڭ الەۋمەتتىك جاۋاپكەرشىلىگى بايقاۋىنىڭ سىيلىعىنا يە بولدى, – دەپ اتاپ ءوتتى ساۋات مىڭباەۆ. – قۇرمانعازى ەسقازيەۆ – وندىرىستە تاجىريبەسى مول بىلىكتى باسشى. ونىڭ الدىندا مۇناي ءوندىرىسى جوسپارىن ورىنداۋ, قاۋىپسىزدىك شارالارىن قامتاماسىز ەتۋ, ەكولوگيالىق تالاپتاردى بۇلجىتپاي ورىنداۋ, يننوۆاتسيالىق تەحنولوگيالاردى ەنگىزۋ جانە ەڭبەك ۇجىمىندا الەۋمەتتىك تۇراقتىلىقتى قامتاماسىز ەتۋ سياقتى ماڭىزدى مىندەتتەر تۇر». قۇرمانعازى ەسقازيەۆ 1965 جىلدىڭ 11 مامىرىندا تۋعان. 1993 جىلى ۆ.ي. لەنين اتىنداعى قازاق پوليتەحنيكالىق ينستيتۋتىنىڭ مۇناي فاكۋلتەتىن بىتىرگەن. 2006 جىلى تومسك پوليتەحنيكالىق ۋنيۆەرسيتەتىن گەولوگيا-مينەرالوگيا عىلىمدارىنىڭ  كانديداتى كۆاليفيكاتسياسىن الۋمەن ءبىتىرىپ شىققان. ەڭبەك جولىن 1985 جىلى «ەمبانەفت» وندىرىستىك بىرلەستىگىندە باستاعان. 2004-2008 جىلدار ارالىعىندا «قازمۇنايگاز» بارلاۋ.ءوندىرۋ» كومپانياسىندا گەولوگيا جانە يگەرۋ دەپارتامەنتى ديرەكتورىنىڭ ورىنباسارى, دەپارتامەنت ديرەكتورى قىزمەتتەرىن اتقارعان. بۇدان كەيىن «قازمۇنايگاز» ۇك» اق-تا مۇناي مەن گازدى ءوندىرۋ جونىندەگى اتقارۋشى ديرەكتور, گەولوگيا, گەوفيزيكا جانە رەزەرۆۋارلار بويىنشا باسقارۋشى ديرەكتور, باس گەولوگ قىزمەتتەرىن اتقارعان. جولداسبەك شوپەعۇل, دەرەك: «ەمبىمۇنايگاز» اق ءباسپاسوز قىزمەتى. سۋرەت: egemen.kz.