فوتو: ۆيدەو كادرى/instagram.com/my.zhez
ادامداردى قاققان مەزەت ءتۇسىپ قالعان ۆيدەو الەۋمەتتىك جەلىدە تارادى. وقيعا قالانىڭ ويىن-ساۋىق ورىندارىنىڭ ءبىرىنىڭ ماڭىندا بولعان. كولىك مەيرامحانا الاڭقايىندا ءسال كولبەۋ تۇستا تۇرعان. كادرلاردا ونىڭ ارتقا قاراي ءجۇرىپ بارا جاتقانى جانە مەيرامحانادان شىققان ادامداردى سوققانى كورىنەدى, بىرنەشە سەكۋندتان سوڭ كولىكتەن بالا جۇگىرىپ شىعادى.
ۆيدەوعا قاراعاندا, كولىكتى بالا باسقارعان. تاعى بىرنەشە سەكۋندتان كەيىن كولىكتەن ايەل تۇسەدى.
ۇلىتاۋ وبلىسى پوليتسيا دەپارتامەنتىنىڭ ءباسپاسوز قىزمەتى بەينەجازباعا قاتىستى تۇسىنىكتەمە بەردى. ۆەدومستۆو جەزقازعاندا جول-كولىك وقيعاسى بولعانىن راستاپ, ونىڭ ەگجەي-تەگجەيىن ءتۇسىندىردى.
«پوليتسيا جول-كولىك وقيعاسىن تىركەدى, زارداپ شەككەندەر جوق. كولىكتە وتىرعان 5 جاسار بالانىڭ تەجەگىش تۇتقاسىن الىپ تاستاعانى انىقتالدى. سالدارىنان اۆتوموبيل وزدىگىنەن ءجۇرىپ, جاياۋ جۇرگىنشىلەرگە بارىپ سوعىستى. ءتۇرلى دەنە جاراقاتتارىن العان 4 جاياۋ جۇرگىنشى اۋرۋحاناعا جاتقىزىلدى. ءتيىستى ساراپتامالار تاعايىندالدى», دەپ ءمالىم قىلدى ءباسپاسوز قىزمەتى.
ۇلىتاۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنىڭ مالىمەتىنشە, مەديتسينالىق مەكەمەگە جاتقىزىلعان 4 ادامنىڭ ىشىندەگى ەر ادامنىڭ قابىرعالارى سىنعان جانە ىشكى مۇشەلەرى كوگەرگەن جانە ءۇش ايەلدىڭ ىشكى اعزالارى كوگەرگەن.
