قازاقستان حالقى 17 ميلليوننان استى

وتكەن جىلدىڭ قورىتىندىسى بويىنشا ەلىمىزدەگى حالىق سانى 17 397,2 مىڭ ادامدى قۇرادى, سونىڭ ىشىندە قالالىقتار – 9 612,6 مىڭ (55,3%), اۋىلدىقتار 7 784,6 مىڭ ادامدى (44,7%) قۇراپ وتىر. 2014 جىلعى قاڭتار-قاراشادا جالپى ەلىمىزدە حالىق سانى 236,4 مىڭ ادامعا نەمەسە 1,38%-عا ءوستى, 2013 جىلعى 1 جەلتوقسانمەن سالىستىرعاندا حالىق سانى 251,5 مىڭ ادامعا نەمەسە 1,47%-عا ارتقان. بۇل جونىندە پرەزيدەنت جا­نىن­داعى ورتالىق كوممۋنيكا­تسيالار قىزمەتىندە بولعان بريفينگ بارىسىندا حابارلاعان ۇلتتىق ەكونوميكا مينيسترلىگى ستاتيستيكا كوميتەتىنىڭ توراعاسى ءاليحان سمايىلوۆ الەۋمەتتىك-ەكونوميكالىق قورىتىندىلارعا ءبىرشاما توقتالىپ ءوتتى. ونىڭ ايتۋىنشا, جىل سايىن جاقسى جاعىنان ارتىپ وتىرعان كورسەتكىشتەر بارلىق سالادا كورىنىس تاۋىپ وتىر. مىسالى, احاج ورگاندارى ۇسىن­عان ازاماتتىق حال اكتىلەرى جازبا­لارىنداعى مالىمەتتەردى وڭدەۋ ءنا­تيجەسىندە, وتكەن جىلدىڭ قاڭتار-قاراشاسىندا تۋعاندار سانى 368,9 مىڭ ادامدى قۇراپ, 2013 جىلعى قاڭتار-قاراشاعا قاراعاندا 5,8 مىڭ ادامعا نەمەسە 1,6%-عا ارتقان. ال قاراستىرىلىپ وتىرعان كەزەڭدە قايتىس بولعاندار سانى 120,8 مىڭ ادامدى قۇراپ, 2013 جىلعى قاڭتار-قاراشاعا قاراعاندا 5,9 مىڭ ادامعا نەمەسە 4,7%-عا ازايعاندىعىن مالىمدەدى. سونداي-اق, ءا.سمايىلوۆ ەلى­مىز­دەگى حالىقتىڭ باسىم كوپشىلىگىن جاستار قۇراپ وتىرعاندىعىن ناقتىلادى. ساندىق كورسەتكىشتە 15 جاسقا دەيىنگى بالالار – 27,3%, ال 16 جاستان زەينەت جاسىنا دەيىنگى ەڭبەككە جارامدى ازاماتتار 62% بولسا, زەينەت جاسىنان باستاپ قاريالار – 10,8%, ال 14 پەن 28 جاس ارالىعىنداعى جاستاردىڭ ۇلەسى 25% بولىپ وتىرعاندىعىن ايتتى. سونىمەن قاتار, وتكەن جىلدىڭ قاڭتار-قاراشاسىندا رەسپۋبليكا حالقىنىڭ تابيعي ءوسىمى 2013 جىل­دىڭ قاڭتار-قاراشاسىمەن سا­لىس­تىرعاندا 11,6 مىڭ ادامعا نەمەسە 4,9%-عا ارتىپ, ساندىق كورسەتكىشى 248,1 مىڭ ادامدى قۇراعان. ال ەكونوميكاداعى وزگەرىستەر بويىنشا قىسقا مەرزىمدى ەكونو­مي­كالىق ينديكاتور 2014 جىلعى قاڭتار-جەلتوقساندا 2013 جىلعى ءتيىستى كەزەڭمەن سالىستىرعاندا 102,8%-دى قۇرادى. سونداي-اق, نەگىزگى كاپيتالعا سالىنعان ينۆەستيتسيا­لار كولەمى 6574,7 ملرد. تەڭگەنى قۇراپ, بۇل كورسەتكىش 2013 جىلعا قاراعاندا 3,9%-عا ارتتى. ال ونەركاسىپ ءوندىرىسىنىڭ كولەمى قولدانىستاعى باعالاردا 18492,8 ملرد. تەڭگەنى قۇراسا, بۇل كورسەتكىش 2013 جىلمەن سالىستىرعاندا 0,2%-عا ارتىق, دەدى ءا.سمايىلوۆ. ونىڭ ايتۋىنشا, اۋىل شارۋاشىلىعى جالپى ءونىمىنىڭ كولەمى 2509,9 ملرد. تەڭگەنى قۇراپ, 2013 جىلمەن سالىستىرعاندا 0,8%-عا ارتقان. ەلميرا ماتىباەۆا, «ەگەمەن قازاقستان».