جوعارىدا اتاپ وتكەن پرەزيدەنت باستاماسى اياسىندا قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى بىلتىر «اتا جولى» كارتاسى 5 مىڭ ادامعا بەرىلەتىنىن مالىمدەگەن ەدى. بۇل تۋرالى قۇزىرلى مينيسترلىكتىڭ 2023–2027 جىلدارعا ارنالعان دامۋ جوسپارىندا جازىلىپ, جاريالانعان. مەملەكەت باسشىسىنىڭ شەتەلدەن كاسىبي ماماندار مەن تابىستى بيزنەسمەندەردى ەلگە تارتۋ جونىندەگى تاپسىرماسىن ورىنداۋ ماقساتىندا «اتا جولى» كوشى-قون كارتاسى ەنگىزىلگەن ەدى. بىلتىر كارتا 55 ادامعا بەرىلىپ, ونىڭ 13-ءى ەلگە كەلگەن.
وتكەن اپتادا وسى جوبا اياسىندا تاريحي وتانىنا ورالعاندارمەن ۇكىمەت باسشىسىنىڭ ورىنباسارى تامارا دۇيسەنوۆا كەزدەسۋ وتكىزدى. جۇزدەسۋ بارىسىندا قانداستار جوبا تۋرالى پىكىرلەرىن ايتىپ, ەلدە اتقارار جۇمىسىنىڭ جوسپارىن تانىستىردى. ولاردىڭ اراسىندا دەنساۋلىق ساقتاۋ, مۇناي جانە گاز, قۇرىلىس, ءبىلىم بەرۋ, ءىت سالاسىنىڭ ماماندارى بار.
ماسەلەن, يزرايلدەن كەلگەن بەكجان قوڭىرباەۆ انەستەزيولوگيا قىزمەتىندەگى كەمشىلىكتەردى جەتكىزدى. ول سالاداعى جاعدايدى جاقسارتۋ ءۇشىن شەتەلدىك تاجىريبەنى قولدانۋعا ءازىر ەكەنىن ايتتى. ال سايان حابيدەنوۆ قازىر اتىراۋدا زاۋىت سالۋ جونىندەگى حالىقارالىق جوبانى ىسكە اسىرۋعا قاتىسىپ جاتىر. ونىڭ رەسەيدىڭ سۋرگۋت قالاسىندا مۇناي جانە گاز سالاسىندا 13 جىلدىق تاجىريبەسى بار. ەڭبەك جولىن قاتارداعى مامان رەتىندە باستاپ, مانساپ ساتىسىندا ورتا بۋىن باسشىسىنا دەيىن وسكەن. قازىرگى ۋاقىتتا ول ۇزدىك تاجىريبەلەردىڭ ەلىمىزدە قولدانىلۋىنا اتسالىسىپ ءجۇر. موڭعوليادان كەلگەن حامزا تىلەك – ءىت-مامان. قازىر استانا حابى اياسىندا جوبانى جۇزەگە اسىرۋدى جوسپارلاپ وتىر. حامزا تىلەك – بىرنەشە جوبانىڭ اۆتورى. ەلگە ورالۋدى كوپتەن بەرى ويلاستىرىپ جۇرگەن ول اتاجۇرتقا «اتا جولى» كارتاسىمەن كەلۋ كوپتەن كۇتكەن مۇمكىندىك دەيدى.
«موڭعوليادا 5 جىل بويى ءوز ماماندىعىم بويىنشا كاسىپ ىستەدىم. قازاقستانعا كوشىپ كەلۋ ءۇشىن وتباسىمىزبەن جوسپار قۇرعان ەدىك. الايدا بىردەن كوشىپ كەلۋ ءتيىمسىز بولعاندىقتان, ماقساتىم وسى «اتا جولى» كارتاسى ارقىلى ول جاقتاعى كاسىبىمنەن قول ۇزبەي, 2-3 جىل شاماسىندا كاسىبىمدى وسى جاقتا جالعاستىرىپ, كەيىن ءبىرجولا اتاجۇرتقا كەلۋ ەدى», دەيدى ول.
حامزانىڭ ەكى بالاسى مەن زايىبىنا دا بۇل كارتا تولىق جارامدى بولادى. مەديتسينالىق تەكسەرىستەن ەركىن ءوتىپ, ۇل-قىزدارى مەكتەپكە بارا الادى. جوعارى وقۋ ورنىنا ءتۇسۋ مۇمكىندىگى مەن جۇمىسقا ورنالاسۋ جاعدايى دا قارالعان. الايدا كارتاعا ءوتىنىش جىبەرمەس بۇرىن بىرنەشە تالاپتىڭ ورىندالۋى شارت.
باستى شارتتاردىڭ ءبىرى ەلىمىزدە جەڭىلدەتىلگەن تۇردە ماماندىقتاردىڭ تىزبەسى بار, سوعان ەنۋ كەرەك. ەكىنشىدەن, سول ەلدە تۇراتىن ءوزىنىڭ ءبىر بيزنەس كوزى بولۋى كەرەك. ەلىمىزدە تاپشى ماماندىقتار تىزىمىنە ەنۋ كەرەك.
ال قانداسىمىز بولات ءابىلدين – قۇرىلىس سالاسىنىڭ تاجىريبەلى مامانى. ينجەنەر-قۇرىلىسشى رەتىندە ماسكەۋدە (رف) بىرقاتار نىساننىڭ قۇرىلىسىنا قاتىسقان. ول تاريحي وتانىندا سالانىڭ دامۋىنا ۇلەس قوسسام دەگەن نيەتپەن كەلگەنىن اتاپ ءوتتى. قۇرىلىس ماماندارىنىڭ بىلىكتىلىگىن ۇدايى جەتىلدىرىپ وتىرۋ قاجەتتىگىنە دە ءمان بەردى. بۇل ىسكە ءوزى دە ارالاسۋعا ءازىر.
تۇركيادان كەلگەن قانداسىمىز شابان دينچتيۋرك قازاقستانعا ءتۇرلى سالادا ينۆەستورلاردى تارتۋعا كۇش سالىپ ءجۇر. كوممۋنالدىق شارۋاشىلىق, مەديتسينا باعىتتارىندا جۇزەگە اسقان جوبالارى تۋرالى ايتىپ وتكەن ول كەلەر جىلى تۋريستىك كومپانيا اشۋدى جوسپارلاپ وتىر. قازاقستانعا جىلىنا كەم دەگەندە 100 مىڭ تۋريست اكەلۋدى ماقسات ەتەدى.
كەزدەسۋگە قاتىسقان قانداستارىمىز «اتا جولى» كارتاسىن ەنگىزۋ جوباسىن ۇلكەن قۋانىشپەن قابىلداعانىن جەتكىزدى. وعان شەتەلدەگى وزگە دە شەتەلدىك قازاقتار قىزىعۋشىلىق ءبىلدىرىپ جاتقانىن ايتتى.
«ۇكىمەت «اتا جولى» كارتاسىن پايدالانعىسى كەلەتىندەرگە قولداۋ كورسەتۋگە دايىن. سىزدەردىڭ ۇسىنىستارىڭىز بويىنشا جوبانى جەتىلدىرۋگە قاتىستى ءتيىستى مەملەكەتتىك ورگاندارعا تاپسىرمالار بەرىلەتىن بولادى. قازاقستاننىڭ دامۋىنا قولدان كەلگەنشە ۇلەس قوسۋعا دەگەن نيەتتەرىڭىز قۋانتادى. بۇل رەتتە ەلىمىزدە ءتۇرلى سالالىق باعدارلاما جۇزەگە اسىپ جاتقاندىعىن اتاپ وتكىم كەلەدى. ولاردى جۇزەگە اسىرۋدا سىزدەردىڭ تاجىريبەلەرىڭىز كادەگە جارايدى دەپ سانايمىن», دەدى تامارا دۇيسەنوۆا.
«اتا جولى» كارتاسى شەتەلدە تۇرىپ جاتقان ەتنوستىق قازاقتارعا 10 جىلعا دەيىنگى مەرزىمگە بەرىلەدى. وعان قول جەتكىزۋ ءۇشىن ۇمىتكەر كەلەسىدەي تالاپتاردىڭ بىرىنە ساي بولۋى شارت: قازاقستان ازاماتتىعىنا قابىلداۋدىڭ وڭايلاتىلعان ءتارتىبى بەلگىلەنەتىن ادامدار ءۇشىن ماماندىعىنىڭ بولۋى; قازاقستاندا سۇرانىسى جوعارى ماماندىققا يە; تۇراقتى تۇراتىن نەمەسە ازاماتتىعى بار ەلدە تىركەلگەن, جۇمىس ىستەپ تۇرعان كاسىبىنىڭ بولۋى.
كارتا يەسى قازاقستاندا جۇمىسقا ورنالاسۋ نەمەسە كاسىبىن جۇرگىزۋ, الەۋمەتتىك تولەمدەر جاساۋ, كەپىلدەندىرىلگەن مەديتسينالىق كومەككە قول جەتكىزۋ, ءبىلىم الۋ, ت.ب. قىزمەتتەردى پايدالانا الادى. الايدا مەملەكەتتىك قىزمەتتە جۇمىس اتقارۋعا, جەرگىلىكتى ءوزىن-ءوزى باسقارۋ ورگاندارىنا سايلانۋعا, رەسپۋبليكالىق رەفەرەندۋمعا قاتىسۋعا نەمەسە داۋىس بەرۋگە حاقى جوق.
جوبا بىلتىردان باستاپ جۇزەگە اسىپ كەلەدى. بۇگىنگە دەيىن 250 ادام 18 مەملەكەتتەگى ەلشىلىكتەرىمىزگە كەلىپ, كەڭەس الىپتى. كارتا الۋعا «قۇتتى مەكەن», «E-Qonaq» ءموبيلدى قوسىمشالارى ارقىلى ءوتىنىش بەرۋگە بولادى نەمەسە قازاقستاننىڭ شەتەلدەردەگى ەلشىلىكتەرىنە جۇگىنۋ قاجەت.
ونىڭ ىشىندە ۇكىمەت ايقىنداعان وڭىرلەرگە قونىستاناتىن, تۇراقتى جۇمىسى بار قونىس اۋدارۋشىلارعا ساتىپ الاتىن تۇرعىن ءۇي قۇنىنىڭ 50%-ى كولەمىندە قارجىلاي كومەك رەتىندە ەكونوميكالىق ۇتقىر سەرتيفيكاتىن بەرۋ قاراستىرىلعان. اتالعان قاراجات قۇرىلىسقا, تۇرعىن ءۇي ساتىپ الۋعا نەمەسە «وتباسى بانك» اق ارقىلى باسپانا الاتىن بولسا, باستاپقى جارنانى ەنگىزۋگە باعىتتالۋى مۇمكىن. بۇل بويىنشا رەسمي زاڭنامالىق قۇجاتتار قابىلدانعان كەزدە حابارلانباق.
«اتا جولى» بىرەگەي كارتاسى جونىندە شەتەلدە تۇراتىن ارىپتەستەرىمىزبەن بايلانىسقا شىعىپ, پىكىرىن بىلگەن ەدىك. ولاردىڭ كوز تىگىپ, قۇلاق ءتۇرىپ وتىرعانى دا وسى ەكەن. اتالعان كارتا ىسكە قوسىلىسىمەن ىسكە كىرىسۋگە دايىن شەتەل جاستارىنىڭ قاراسى مول كورىنەدى. بايقاۋىمىزشا, ولار كارتا اشىلعان كۇننەن باستاپ كەيىنگى جىلداردا بايىرقالاپ قالعان قازاقتىڭ بايسالدى كوشىن قايتا قوزعاۋعا زور سەپتىگىن تيگىزەدى دەپ سەنەدى.
