سۋرەتتى تۇسىرگەن – ن.بايبۋلين
چەمپيوناتقا قاتىسۋشىلارعا ساتتىلىك تىلەگەن ماۋلەن اشىمباەۆ بوچچادان ۇلتتىق قۇراما مۇشەلەرىن تاياۋدا فينليانديادا وتكەن بەدەلدى حالىقارالىق جارىستا جەڭىپ العان جۇلدەلەرىمەن قۇتتىقتادى. فەدەراتسيا پرەزيدەنتى بۇل ۇلكەن جەڭىستەردىڭ باسى ەكەنىن اتاپ ءوتتى. ول ءۇشىن, ەڭ باستىسى, تاباندىلىق پەن توزىمدىلىك, ەرىك-جىگەر مەن سەنىم جانە جاتتىقتىرۋشىلار مەن سپورتشىلاردىڭ ۇيلەسىمدى جۇمىسى قاجەت.
«جاقىندا فينليانديادا وتكەن جارىستا ۇلتتىق قۇرامامىزدىڭ مۇشەلەرى قۋانىش اسقاربەكوۆ, يتيانا شىڭعىسحانوۆا جانە الەكساندر قۇرمانتاەۆ العاش رەت قولا مەدال جەڭىپ الدى. بۇل جىل وتكەن سايىن سپورتشىلارىمىزدىڭ كاسىبي دەڭگەيى ءوسىپ كەلە جاتقانىن كورسەتەدى. شەبەرلىكتەرى شىڭدالىپ, وزدەرىنە دەگەن سەنىمدىلىكتەرى جانە ءىرى جەڭىستەرگە دەگەن قۇلشىنىسى ارتىپ كەلەدى. از ۋاقىتتىڭ ىشىندە بۇل سپورتتان جارىق جۇلدىزدارىمىزدىڭ شىققانىنا جانە ءار جارىس سايىن قاتىسۋشىلاردىڭ قاتارى كوبەيىپ كەلە جاتقانىنا قۋانىشتىمىن. ءبىز بارشاڭىزدى ماقتان تۇتامىز. مەملەكەت باسشىسى قاسىم-جومارت كەمەل ۇلى توقاەۆ قازاقستاندا ينكليۋزيانى دامىتۋعا ۇنەمى باسا ءمان بەرىپ كەلەدى. ءبىزدىڭ جەتىستىكتەرىمىز – وسىنداي قولداۋدىڭ جانە ۇلكەن كوماندانىڭ بىرلەسكەن جۇمىسىنىڭ ناتيجەسى», دەگەن م. اشىمباەۆ سپورتشىلارعا, ولاردىڭ اتا-انالارى مەن جاتتىقتىرۋشىلارعا العىس ءبىلدىردى.
ايتا كەتەيىك, فينليانديانىڭ لاحتي قالاسىندا وتكەن سايىستا قۋانىش اسقاربەكوۆ جەكەلەي سىندا قولا مەدال ولجالادى. سونداي-اق كوماندالىق جارىستا دا قۋانىش اسقاربەكوۆ, يتيانا شىڭعىسحانوۆا جانە الەكساندر قۇرمانتاەۆ ۇزدىك ۇشتىكتەن كورىندى. ودان بولەك, جەكەلەي سىندا يتيانا شىڭعىسحانوۆا – ءتورتىنشى, مەرۋەرت تىلەبالدى – بەسىنشى, بالجان بولەكپاەۆا – التىنشى جانە تەمىرلان التىنسارى سەگىزىنشى ورىن العانىن اتاپ وتكەن ءجون.
«كەيىنگى جىلداردا ەلىمىزدە بوچچا قارقىندى دامىپ كەلەدى. از ۋاقىتتىڭ ىشىندە اتالعان پاراليمپيادالىق سپورتپەن تۇراقتى اينالىساتىندار قاتارى شامامەن 20 پايىزعا ارتىپ وتىر. بۇل ەرەكشە قاجەتتىلىگى بار مىڭداعان ازاماتقا سپورتپەن شۇعىلدانۋعا, جاڭا دوستار تابۋعا جانە حالىقارالىق ارەنالاردا ۇلكەن جەتىستىكتەرگە جەتۋگە جول اشادى. ەلىمىزدە بوچچانىڭ وسىلاي كەڭىنەن تانىلىپ, جاڭا قوزعالىسقا اينالىپ كەلە جاتقانىنا قۋانىشتىمىن. بۇل رەتتە سىزدەر ۇلكەن ۇلگى كورسەتىپ كەلەسىزدەر», دەدى فەدەراتسيا پرەزيدەنتى.
بيىلعى چەمپيوناتقا قاتىسۋشىلار سانىنىڭ كوپ بولۋى بۇل سپورت تۇرىنە دەگەن قىزىعۋشىلىقتىڭ ارتا تۇسكەنىن دالەلدەيدى. بىلتىر ەل چەمپيوناتىنا 10 وڭىردەن 50-گە جۋىق سپورتشى كەلسە, بيىل 12 وڭىردەن 89 سپورتشى قاتىسۋعا ءوتىنىم بەردى. قازىرگى تاڭدا 10 وبلىستا قازاقستان بوچچا فەدەراتسياسىنىڭ فيليالدارى جۇمىس ىستەيدى. ال 12 وڭىردە بوچچا ۇيىرمەلەرى بار.
سونىمەن قاتار بۇگىن فەدەراتسيا كونفەرەنتسياسىنىڭ كەزەكتەن تىس وتىرىسى ءوتتى. وندا قاتىسۋشىلار ينكليۋزيۆتى سپورت تۇرلەرىن ودان ءارى دامىتۋدىڭ وزەكتى ماسەلەلەرىن, ونىڭ ىشىندە جاتتىعۋ بازاسىن دامىتۋ, قارجىلاندىرۋ, سپورتشىلار اراسىندا باسەكەلەستىكتى ارتتىرۋ, تاجىريبە جيناقتاۋ جانە تاعى باسقا باسىمدىقتاردى تالقىلادى.
